(សៀមរាប)៖ ព្រះមន្រ្តីសង្ឃខេត្តសៀមរាប នៅរសៀលថ្ងៃទី២៧ ខែសីហា ឆ្នាំ២០២៥ បាននាំយកស្បៀងអាហាររបស់សម្ដេចព្រះព្រហ្មរតនមុនី ពិន សែម សិរីសុវណ្ណោ ប្រធានថេរសភាសង្ឃព្រះពុទ្ធសាសនាកម្ពុជា និងបច្ច័យមួយចំនួន របស់ព្រះមង្គលមុនី គង់ ហេមរង្សី ព្រះចៅអធិការវត្តខេមរារាមសហរដ្ឋអាមេរិក ទៅចែកជូនដល់ប្រជាពលរដ្ឋចំនួន១២គ្រួសារ ស្ថិតនៅភូមិជោគជ័យ និងភូមិព្រៃចាន់ ឃុំអូបីជាន់ ស្រុកអូរជ្រៅ ខេត្តបន្ទាយមានជ័យ ដែលទាហានថៃបានរាយបន្លាលួសព័ទ្ធយកផ្ទះសម្បែងរបស់ពួកគាត់។

ព្រះបវរវិជ្ជា ទេព ភឿន ព្រះវិន័យធរគណខេត្តសៀមរាប មានសង្ឃដីកាថា ទុក្ខលំបាករបស់ប្រជាពលរដ្ឋ ក៏ជាទុក្ខលំបាករបស់ព្រះសង្ឃ និងយើងទាំងអស់គ្នាផងដែរ ដែលត្រូវការយកចិត្តទុក្ខដាក់ និងចែករំលែកគ្នាទៅវិញទៅមក ក្នុងគ្រាដ៏លំបាកនេះ ដោយឈរលើស្មារតី រួបរួមសាមគ្គី ជួយទុក្ខធុរៈគ្នា។

ព្រះបវរវិជ្ជា ទេព ភឿន មានសង្ឃដីកាបន្តថា រាជរដ្ឋាភិបាល និងអាជ្ញាធរគ្រប់លំដាប់ថ្នាក់ រួមជាមួយព្រះសង្ឃ និងសប្បុរសជន តែងតែគិតគូរដោះស្រាយពីទុក្ខលំបាកនោះ ដោយមិនទៅណាចោលបងប្អូនប្រជាពលរដ្ឋឡើយ។

ព្រះតេជគុណ មានសង្ឃដីកា ណែនាំឱ្យបងប្អូនប្រជាពលរដ្ឋទាំងអស់ សូមថែរក្សាសុខភាពឱ្យបានល្អត្រូវរស់នៅប្រកបដោយអនាម័យ។ ចំពោះស្បៀងអាហារនេះ ទោះបីតែតិចតួចតែអាចជួយសម្រាលទុកលំបាក របស់ជាតិញោមបានមួយរយៈពេលផងដែរ៕