(បាត់ដំបង)៖ នៅព្រឹកថ្ងៃទី២៨ ខែសីហា ឆ្នាំ២០២៥នេះ ក្រុមការងារកាកបាទក្រហមកម្ពុជាស្រុករុក្ខគីរី ដឹកនាំដោយ លោកស្រី ប៊ិន បូឡែន អភិបាលស្រុក និងជាប្រធានអនុសាខាស្រុក ចុះសាកសួរសុខទុក្ខ និងនាំយកអំណោយមនុស្សធម៌ គ្រួសារកុមាររីរងគ្រោះ ដោយការរំលោភផ្លូវភេទ ស្ថិតនៅភូមិស្តុកប្រវឹក ឃុំស្តុកប្រវឹក ស្រុករុក្ខគិរី ខេត្តបាត់ដំបង។

ក្នុងឱកាសនោះ លោកស្រី ប៊ិច ប៊ូឡែន បាននាំការផ្ដាំផ្ញើសាកសួរសុខទុក្ខ ដោយក្តីអាណិតអាសូពីសំណាក់ លោក សុខ លូ អភិបាលខេត្ត និងជាប្រធានគណៈកម្មាធិការសាខាខេត្ត ជាពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះកុមារីរងគ្រោះ និងក្រុមគ្រួសារ ដែលរងទុក្ខដោយសារការបំពានលើរាងកាយ និងផ្លូវចិត្តយ៉ាងព្រៃផ្សៃ និងដោយចេតនាពីបុគ្គលព្រៃផ្សៃ។

ទោះក្នុងកាលៈទេសៈណាក៏ដោយ បើមានករណីរងគ្រោះនានា ដោយសាររំលោភបំពាន លើរាងកាយ ផ្លូវចិត្ត ផ្លូវភេទ ពលរដ្ឋក្រីក្រ រងទុក្ខលំបាកនានាកាកបាទក្រហមកម្ពុជា តែងតែនៅជាមួយដោយមិនទុកនរណាម្នាក់ចោលឡើយ។

ដើម្បីជាការលើកទឹកចិត្ត និងផ្ដល់កម្លាំងចិត្តដល់កុមារងគ្រោះ កុំឱ្យបាក់ទឹកចិត្ត មានវិបត្តិផ្លូវចិត្តពីការគំរាមកំហែង អនុសាខាកាកបាទក្រហមកម្ពុជាស្រុក ផ្ដល់នូវអំណោយមួយចំនួនរួមមាន៖ អង្ករ២៥គីឡូក្រាម, មី១កេស, ទឹកត្រី១យួរ, ទឹកស៉ីអ៉ីវ១យួរ, ត្រីខ១យួរ, ទឹកសុទ្ធ១កេស និងថវិកាមួយចំនួនផងដែរ៕