(កំពង់ធំ)៖ លោក នួន ផារ័ត្ន អភិបាលខេត្តកំពង់ធំ នៅថ្ងៃទី២៨ ខែសីហា ឆ្នាំ២០២៥ បានអញ្ជើញជាគណៈអធិបតី ក្នុងពិធីបើកប្រធានវិញ្ញាសាប្រឡងមធ្យមសិក្សាទុតិយភូមិ ឆ្នាំសិក្សា២០២៥ នៅមណ្ឌលវិទ្យាល័យកំពង់ធំ។

លោក នួន ផារ័ត្ន បានធ្វើការលើកទឹកចិត្ត ដល់បេក្ខជនប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០២៥នេះ ត្រូវខិតខំសរសេរវិញ្ញាសាដោយប្រុងប្រយ័ត្ន និងពិនិត្យមើល ឱ្យបានត្រឹមត្រូវច្បាស់លាស់ សរសេរឱ្យបានត្រូវច្រើនល្អ ដើម្បីយកលទ្ធផលបានជោគជ័យ និងទទួលបាននិទ្ទេស A នៅពេលប្រកាសលទ្ធផល នាពេលខាងមុខ។

លោកបានផ្តាំផ្ញើដល់បេក្ខជនប្រឡងទាំងអស់ ត្រូវខិតខំប្រឹងប្រែងឱ្យអស់ពីសមត្ថភាព ធ្វើឱ្យបានរួចរាល់លើគ្រប់វិញ្ញាសា ដែលបានដាក់ក្នុងការប្រឡង គោរពឱ្យបានខ្ជាប់ខ្ជួននូវបទប្បញ្ញត្តិ និងបទបញ្ជាផ្ទៃក្នុងនៃការប្រឡង ដោយមិនត្រូវលួចចម្លងគ្នា មើលគ្នា ពិភាក្សាគ្នា មិនត្រូវគូសសញ្ញាសម្គាល់លើក្រដាស វិញ្ញាសា និងលួចលាក់ប្រើប្រាស់ឧបករណ៍ អេឡិចត្រូនិចនោះឡើយ។

លោក តាន់ ប៊ុនហុង ប្រធានមន្ទីរអប់រំយុវជន និងកីឡា ខេត្តកំពង់ធំ បានឱ្យដឹងថា ក្រសួងអប់រំ យុវជន និងកីឡា បេក្ខជនទាំងអស់ បានចូលក្នុងមណ្ឌលប្រឡង នៅគ្រប់រាជធានី/ខេត្ត ដោយមានការត្រួតពិនិត្យ និងផ្ទៀងផ្ទាត់យ៉ាងយកចិត្តទុកដាក់ ពីសំណាក់គណៈមេប្រយោគ។ បេក្ខជនទាំងអស់ ត្រូវអនុវត្តឱ្យបានខ្ជាប់នូវបទប្បញ្ញត្តិ កម្រិតវិន័យសម្រាប់ ការប្រឡងសញ្ញាបត្រមធ្យមសិក្សាទុតិយភូមិ។

ក្រសួងអប់រំ យុវជន និងកីឡា បានអំពាវនាវដល់បេក្ខជនទាំងអស់ត្រូវគោរពបទប្បញ្ញត្តិ នៃការប្រឡងឱ្យបានល្អប្រសើរ ជាពិសេសមិនត្រូវលាក់ទុក ជាប់នឹងខ្លួននូវឯកសារនានា ឧបករណ៍អេឡិចត្រូនិកគ្រប់ប្រភេទ ចូលក្នុងមណ្ឌលប្រឡង ឬបន្ទប់ប្រឡងជាដាច់ខាត។ ក្នុងករណីរកឃើញថា បានប្រព្រឹត្តសកម្មភាពផ្ទុយនឹងបទប្បញ្ញត្តិ និងកម្រិតវិន័យ បេក្ខជននឹងត្រូវបានកំណត់ឱ្យធ្លាក់ជាស្វ័យប្រវត្តិ។

លោកបន្តថា សម្រាប់មណ្ឌលប្រឡង នៅក្នុងខេត្តកំពង់ធំ មានចំនួន១៣មណ្ឌល ចំនួនបន្ទប់មាន២៣៤បន្ទប់ បេក្ខជនប្រឡងមានចំនួន៥,៧៩៥នាក់ ស្រី៣,៣១៩នាក់។ មានការបែងចែក២មុខវិទ្យា គឺថ្នាក់វិទ្យាសាស្រ្តមាន០២មណ្ឌល មានបន្ទប់៥១បន្ទប់ ថ្នាក់វិទ្យាសាស្រ្តសង្គម មាន១១មណ្ឌល មានបន្ទប់១៨៥បន្ទប់ផងដែរ៕