(ព្រៃវែង)៖ លោកស្រី ទន់ សាអ៊ឹន អនុរដ្ឋលេខាធិការក្រសួងអប់រំ យុវជន និងកីឡា និងជាប្រធានគណៈមេប្រយោគទូទាំងប្រទេសប្រចាំខេត្តព្រៃវែង និងលោក សួន សុម៉ាលីន អភិបាលខេត្តព្រៃវែង នៅព្រឹកថ្ងៃទី២៨ ខែសីហា ឆ្នាំ២០២៥ បានដឹកនាំក្រុមការងារអាជ្ញាធរពាក់ព័ន្ធ មន្ទីរអង្គភាព បានអញ្ជើញបើកវិញ្ញាសារ ប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា២០២៤-២០២៥ ដែលមានរយៈពេលពីរថ្ងៃ នៅមណ្ឌលវិទ្យាល័យសម្តេចតេជោ ហ៊ុន សែន កំពង់លាវ ក្រុងព្រៃវែង។

លោក សួន សុម៉ាលីន បានផ្តាំផ្ញើបេក្ខជនបេក្ខនារី សូមយកចិត្តទុកដាក់ប្រឹងប្រែងបញ្ជេញសមត្ថភាពចំណេះដឹងដែលខ្លួនមាន មិនត្រូវបង្កការរំខាននៅក្នុងបន្ទប់ ឬក៏លួចមើលប្រយ៉ុង ពិសេសមិនត្រូវចម្លងគ្នានោះឡើយ ហើយក្រោយពេលទទួលលទ្ធផលប្រឡងជាប់ ត្រូវបន្តការសិក្សានៅសកលវិទ្យាល័យបន្តទៀតដើម្បីទទូលបានជំនាញដែលខ្លួនស្រឡាញ់។

ជាមួយគ្នានេះ បេក្ខជន បេក្ខនារី លោកគ្រូអនុរក្សទាំងអស់ ត្រូវអនុវត្តឲ្យបានខ្ជាប់ខ្ជួន នៅបទបញ្ញាត្តិផ្ទៃក្នុង នៃការប្រលងនេះធ្វើយ៉ាងណាដើម្បីទទួលបាននូវចំណេះដឹងពិតប្រាកដ ដើម្បី មានសមត្ថភាពក្នុងការបម្រើការងារ និងជួយអភិវឌ្ឍប្រទេសជាតិយើង ហើយសូមជូនពរដល់បេក្ខជន បេក្ខនារីទាំងអស់សូមឲ្យប្រឡងជាប់គ្រប់ៗគ្នា។

លោក ប៉ាវ សុធីរ ប្រធានមន្ទីរអប់រំ យុវជន និងកីឡាខេត្តព្រៃវែង បានឲ្យដឹងថា នៅថ្ងៃទី២៨-២៩ ខែសីហា ឆ្នាំ២០២៥ នេះ ចំពោះការរៀបចំការប្រឡងសញ្ញាបត្រមធ្យមសិក្សាទុតិយភូមិ ខេត្តព្រៃវែង មានមណ្ឌល ប្រឡងចំនួន ១៧មណ្ឌល ស្មើនឹង ៣៧៥ បន្ទប់ ចែកចេញជាថ្នាក់វិទ្យាសាស្ត្រចំនួន៤ មណ្ឌលស្មើរ ៨៧ បន្ទប់ និងថ្នាក់វិទ្យាសាស្ត្រសង្គម ចំនួន ១៣ មណ្ឌលស្មើរ ២៨៨ បន្ទប់ ដែលមានបេក្ខជនប្រឡងសរុបចំនួន ៩.២០១ នាក់ ស្រី ៥.១៤៣ នាក់ ក្នុងនោះ ក្រុងព្រៃវែងចំនួន ០៩មណ្ឌល, ស្រុកស្វាយអន្ទរចំនួន ០៣មណ្ឌល, ស្រុកបាភ្នំចំនួន ០៣មណ្ឌល និង ស្រុកពាមរក៍ចំនួន ០២មណ្ឌល។

ប្រធានមន្ទីរ បានបន្ថែមថា ដើម្បីប្រព្រឹត្តទៅដោយរលូន និងទទួលបានជោគជ័យតាមការ គ្រោងទុកក្នុងភូមិសាស្ត្រខេត្តព្រៃវែង លោក អភិបាលខេត្ត បានរៀបចំគណៈកម្មការ ការពារសុវត្ថិភាពមណ្ឌលប្រឡងខេត្តព្រៃវែង ដែលមានភារកិច្ចក្នុងការដឹកនាំ សម្របសម្រួល និងការពារ សុវត្ថិភាព សណ្តាប់ធ្នាប់ របៀបរៀបរយ នៃដំណើរការប្រឡងតាមមណ្ឌលនីមួយៗដោយស្មារតីទទួលខុសត្រូវខ្ពស់ ជៀសវាងឲ្យបានដាច់ខាតនូវបាតុភាពអសកម្ម ដែលបង្កឲ្យមានអនាធិបតេយ្យក្នុងពេលប្រឡងផងដែរ៕