(រតនគិរី)៖ ការប្រឡងសញ្ញបត្រ មធ្យមសិក្សាទុតិយភូមិនៅខេត្តរតនគិរី ឆ្នាំ២០២៥ មានបេក្ខជនចូលប្រឡង ចំនួន ១ ៩១០នាក់ (ស្រី ១ ០១៥នាក់) មានមណ្ឌលប្រឡងចំនួន៣មណ្ឌល មានបន្ទប់សរុបចំនួន ៧៧បន្ទប់ ខណៈដំណើរការប្រឡងប្រព្រឹត្តទៅប្រកបដោយភាពរលូន នៅព្រឹកថ្ងៃទី២៨ ខែសីហា ឆ្នាំ២០២៥នេះ។

លោក ខាត់ សាម៉ាល់ ប្រធានមន្ទីរអប់រំ យុវជន និងកីឡាខេត្តរតនគិរី បានឲ្យដឹងថា ការប្រឡងសញ្ញបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា២០២៤-២០២៥ ប្រព្រឹត្តទៅចំនួន២ថ្ងៃ ចាប់ពីទី២៨-២៩ ខែសីហា ឆ្នាំ២០២៥។ ដំណើរការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា សម្រាប់ខេត្តរតនគិរី ឆ្នាំ២០២៥ មានបេក្ខជនចូលរួមប្រឡងសរុបមាន ១ ៩១០នាក់ (ស្រី ១០១៥នាក់)។

ក្នុងនោះ ជនជាតិដើមភាគតិច ចំនួន ៧៨៣នាក់ (ស្រី៣៩៤នាក់) រួមមាន៖ គ្រឹង ១៨៦នាក់ (ស្រី៨៦នាក់), ទំពួន២៩១នាក់ (ស្រី១៦៥នាក់), ព្រៅ ៧៧នាក់ (ស្រី៣៨នាក់), ចារ៉ាយ១៥៨នាក់ (ស្រី៧៦នាក់), កាចក់ ២៥នាក់ (ស្រី ១៣នាក់ ), កាវែត៣៩នាក់ (ស្រី១១ នាក់), ព្នង២នាក់(ស្រី), លុន ៥នាក់(ស្រី)ស្មើ ៤០.៩៩% ស្រី ៣៨.៨៥%។ ក្នុងចំនួនបេក្ខជនសរុបខាងលើ មានបេក្ខជនចំណេះទូទៅចំនួន ១ ៥៩០នាក់ (ស្រី៨៦១នាក់), បេក្ខជនថ្នាក់បំពេញវិជ្ជា១៧៥នាក់(ស្រី៨៦នាក់), បេក្ខជនស្វយរិនចំណេះទូទៅ១០០នាក់ (ស្រី៥១), បេក្ខជនស្វយរិនបំពេញវិជ្ជា៤៥នាក់(ស្រី១៧នាក់)។

ចំពោះមណ្ឌលប្រឡង ត្រូវបានកំណត់ជា ៣មណ្ឌល សរុប ៧៧បន្ទប់ ក្នុងនោះ៖ មណ្ឌលវិទ្យាល័យសម្តេចឪ សម្តេចម៉ែ ៣៦បន្ទប់, មណ្ឌលវិទ្យាល័យហ៊ុន សែន ភូមិថ្មី ២៩បន្ទប់ និង មណ្ឌល អនុវិទ្យាល័យ ប៊ូ ថង ទេសអន្លុង១២បន្ទប់។

លោកប្រធានមន្ទីរបន្តថា ការប្រឡសញ្ញាបត្រមធ្យមសិក្សាទុតិយភូមិ ឆ្នាំ២០២៥នេះ មិនខុសគ្នាពីឆ្នាំមុនៗទេ បេក្ខជន-បេក្ខនារីទាំងអស់បានចូលក្នុងបន្ទប់ប្រឡងរៀងៗខ្លួន នៅតាមមណ្ឌលប្រឡង ដោយមានការត្រួតពិនិត្យ និងផ្ទៀងផ្ទាត់យ៉ាងយកចិត្តទុកដាក់ពីសំណាក់គណៈកម្មការអនុរក្ស និងក្រោមការពិនិត្យដោយអង្គភាពប្រឆាំងអំពើពុករលួយ មុននឹងឱ្យចូលក្នុងបន្ទប់ប្រឡង ធានាថាបេក្ខជនបេក្ខនារីទាំងអស់ មិនមានឱកាស បានយកសំណៅឯកសារ ព្រីយ៉ុង ឬម៉ាស៊ីនគិតលេខ ទូរសព្ទចូលក្នុងបន្ទប់ប្រឡងបានដាច់ខាត។ ដោយឡែក នៅក្រៅបរិវេណមណ្ឌលប្រឡង មានក្រុម ស.ស.យ.ក. ខេត្តបានជួយរៀបចំកន្លែងផ្ញើម៉ូតូដោយមិនគិតថ្លៃ និងមានកងកម្លាំងនគរបាល អាវុធហត្ថ ក្រុមគ្រូពេទ្យ ក៏មានវត្តមាន នៅមណ្ឌលប្រឡងទាំង៣នោះថែមទៀតផង។

លោក ញ៉ែម សំអឿន អភិបាលខេត្តរតនគិរី ដែលបានអញ្ជើញចូលរួមបើកកញ្ចប់វិញ្ញាសារប្រឡង នៅមណ្ឌលប្រឡងវិទ្យាល័យសម្តេចឪ សម្តេចម៉ែ ដោយបានលើកទឹកចិត្តដល់ក្មួយៗដែលជាបេក្ខជន បេក្ខនារីទាំងអស់ ត្រូវខិតខំធ្វើឱ្យអស់ពីលទ្ធភាព និងថែទាំសុខភាពឱ្យបានល្អសម្រាកឱ្យបានគ្រប់គ្រាន់ និងជូនពរក្មួយៗប្រឡងជាប់និទ្ទេសល្អៗទាំងអស់គ្នា។

លោកអភិបាលខេត្ត បានអំពាវនាវដល់បេក្ខជនទាំងអស់ ត្រូវគោរពបទប្បញ្ញត្តិនៃការប្រឡងឱ្យបានល្អប្រសើរ ជាពិសេសមិនត្រូវលាក់ទុកជាប់នឹងខ្លួននូវឧបករណ៍អេឡិចត្រូនិចគ្រប់ប្រភេទចូលក្នុងមណ្ឌលប្រឡង ឬបន្ទប់ប្រឡងជាដាច់ខាត។ ក្នុងករណីរកឃើញថា បានប្រព្រឹត្តសកម្មភាពផ្ទុយនឹងបទប្បញ្ញត្តិ និងកម្រិតវិន័យ បេក្ខជននឹងត្រូវបានកំណត់ឱ្យធ្លាក់ជាស្វ័យប្រវត្តិ មានន័យថា «អ្នកចេះ គឺជាប់»៕