(តាកែវ)៖ ក្នុងឱកាសអញ្ជើញកាត់វិញ្ញាសារប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នៅមណ្ឌលប្រឡងវិទ្យាល័យ ជា ស៉ីម តាកែវ នៅព្រឹកថ្ងៃទី២៨ ខែសីហា ឆ្នាំ២០២៥នេះ លោក វ៉ី សំណាង អភិបាលខេត្តតាកែវ បានណែនាំដល់បេក្ខជនប្រឡងទាំងអស់ ត្រូវខិតខំប្រឹងប្រែងឲ្យអស់ពីសមត្ថភាព និងគោរពវិន័យឲ្យបានត្រឹមត្រូវ។

លោកអភិបាលខេត្តបានបញ្ជាក់ទៀតថា ការប្រឡងសញ្ញាបត្រមធ្យមសិក្សាទុតិយភូមិឆ្នាំនេះ ក៏មិនខុសពីឆ្នាំមុនៗដែរ គឺនៅតែមានការរឹតបន្តឹងដដែល ដែលតម្រូវឲ្យបេក្ខជនម្នាក់ៗ ត្រូវតែធ្វើការប្រឡងដោយសមត្ថភាពពិតៗ ពោល អ្នកចេះ គឺជាប់។ ដូច្នោះបេក្ខជនទាំងអស់ត្រូវតែគោរពទៅតាមបទបញ្ជា ដោយមិនអនុញ្ញាតឲ្យបេក្ខជនណាម្នាក់យកសំណៅឯកសារ សៀវភៅ ទូរស័ព្ទដៃ និងឧបករណ៍អេឡិចត្រូនិចមួយចំនួនទៀត ចូលមណ្ឌលប្រឡងឡើយ ប្រសិនបើអនុរក្សរកឃើញ បេក្ខជនអាចនឹងបានពិន្ទុសូន្យ ឬធ្លាក់ដោយស្វ័យប្រវត្តិតែម្តង។

លោក វ៉ី សំណាង បានថ្លែងបន្តថា ការប្រឡងនេះ មានអ្នកសង្កេតការណ៍មកពីអង្គភាពប្រឆាំងអំពើពុករលួយ បានចូលរួមត្រួតពិនិត្យនៅគ្រប់មណ្ឌលប្រឡងទាំងអស់។

បើតាមការបញ្ជាក់ពីលោក ឡោ វីរិទ្ធិ ប្រធានមន្ទីរអប់រំ យុវជន និងកីឡាខេត្ត បានឲ្យដឹងថា នៅខេត្តតាកែវ មានមណ្ឌលប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨-២៩ ខែសីហា ឆ្នាំ២០២៥ មានមណ្ឌលចំនួន១៧មណ្ឌល ស្មើនឹង៣៩៦បន្ទប់ កើន១១បន្ទប់ មានបេក្ខជនសរុប៩,៨១៦នាក់ ស្រី៥,២៨៧នាក់។ ក្នុងនោះ ថ្នាក់វិទ្យាសាស្រ្ត មាន៤មណ្ឌល ស្មើនឹង៩៧បន្ទប់ មានបេក្ខជនសរុប២,៣៨៥នាក់ ស្រី១,៤៧៦នាក់ និងថ្នាក់វិទ្យាសាស្រ្តសង្គម មាន១៣មណ្ឌល ស្មើនឹង២៩៩បន្ទប់ មានបេក្ខជនសរុប៧,៤៣១នាក់ ស្រី៣,៨១១នាក់៕