(ភ្នំពេញ)៖ កញ្ញា អ៉ឹង ទេពីបញ្ចពណ៌ ជានិស្សិតម្នាក់ក្នុងចំណោមនិស្សិតកម្ពុជាដែលទទួលបានជ័យលាភីឈ្នះការប្រកួត បានផ្តល់ចំណាប់អារម្មណ៍ថា៖ កម្មវិធីដែលកញ្ញា និងមិត្តភក្តិចូលរួមប្រកួតមានឈ្មោះថា Asian Undergraduate Symposium ដែលរៀបចំឡើងដោយសកលវិទ្យាល័យជាតិសិង្ហបុរី (National University of Singapore) ប្រារព្ធនៅប្រទេសសិង្ហបុរី ចាប់ពីថ្ងៃទី៦ ដល់ទី១៩ ខែកក្កដា ឆ្នាំ២០២៥។ កម្មវិធីនេះ ធ្វើឡើងក្នុងគោលបំណងដើម្បីធ្វើការផ្លាស់ប្ដូរការសិក្សារវាងនិស្សិត ដែលជាបេក្ខជនមកពីបណ្ដាប្រទេសក្នុងទ្វីបអាស៊ី រួមមានកម្ពុជា វៀតណាម ឡាវ ចិន កូរ៉េ ជប៉ុន ឥណ្ឌា ជាដើម ក្នុងនោះក៏មានការបណ្ដុះបណ្ដាលអំពីការថែរក្សាបរិស្ថាន អភិរក្សវប្បធម៌ និងពិពិធភាព សមធម៌ បរិយាបន្ន។

ការប្រកួតនៅក្នុងកម្មវិធីនេះ គឺធ្វើឡើងដោយតម្រូវឲ្យបេក្ខជនចូលរួមអាចដាក់ស្នើនូវគម្រោង (Project) រៀងៗខ្លួន ក្នុងគោលបំណងធ្វើការស្នើសុំប្រាក់ឧបត្ថម្ភពីអ្នករៀបចំកម្មវិធី ដើម្បីយកទៅអនុវត្តគម្រោងការទាំងនោះ។ ក្នុងចំណោមគំនិតរាប់រយដែលបានស្នើឡើង គេជ្រើសរើសយកគំនិតចំនួន៤០តាមរយៈការបោះឆ្នោត មុននឹងចែកចេញជា១០ក្រុមចុងក្រោយ ដើម្បីកំណត់ជាអ្នកឈ្នះ និងទទួលបានប្រាក់រង្វាន់(ប្រាក់ឧបត្ថម្ភ)។

កញ្ញា បានពន្យល់បន្ថែមពីការប្រកួតរបស់ក្រុមខ្លួនថា៖ គម្រោងរបស់ពួកយើងមានឈ្មោះជាភាសាអង់គ្លេសថា «Releaf Hub» ជាគម្រោងដឹកនាំដោយយុវជន ដែលមានបំណងជួយលើកកម្ពស់ដល់យុវជនកម្ពុជាឲ្យក្លាយជាអ្នកជំនាញផ្នែកបរិស្ថាន តាមរយៈការបណ្តុះបណ្តាល ការណែនាំ និងកិច្ចសហការផ្សេងៗ។ Releaf Hub ផ្តល់ចំណេះដឹងមូលដ្ឋាន និងជំនាញដល់យុវជនដើម្បីប្រឈមមុខនឹងបញ្ហាបរិស្ថាន ជាមួយនឹងការផ្តោតជាសំខាន់លើការចូលរួមជាមួយសហគមន៍មូលដ្ឋាន និងការប្រើប្រាស់ធនធានធម្មជាតិប្រកបដោយចីរភាព។ គម្រោងទី១ របស់ Releaf Hub គឺជាវេទិកាយុវជនមួយ ដោយផ្ដោតលើការអភិរក្សព្រៃកោងកាងនៅប្រទេសកម្ពុជា។

ឆ្លើយនឹងសំណួររបស់អ្នកសារព័ត៌មាន កញ្ញា អ៉ឹង ទេពីបញ្ចពណ៌ បានបង្ហាញពីគោលបំណង និងក្តីរំពឹងដែលទទួលបានពីកម្មវិធីខាងលើថា «បច្ចុប្បន្ននេះ ក្រុមរបស់កញ្ញា កំពុងតែរៀបចំវេទិការយុវជនមួយដែលគ្រោងនឹងធ្វើឡើងនៅខេត្តកំពត ដោយមានការចូលរួមពីសិស្សានុសិស្សវិទ្យាល័យ និងនិស្សិតសកលវិទ្យាល័យមួយចំនួននៅកម្ពុជា ហើយក៏នឹងមានការអញ្ជើញចូលរួមពីសាស្ដ្រាចារ្យមកពីប្រទេសសិង្ហបុរីផងដែរ។ នៅថ្ងៃអនាគត ក្រុមរបស់កញ្ញា នឹងបន្ដពង្រីកគម្រោងនេះឱ្យកាន់តែមានទ្រង់ទ្រាយធំ និងអាចមានការចូលរួមពីយុវជនជានិស្សិតមកពីបណ្តាប្រទេសនានាផងដែរ ដើម្បីជាការផ្សព្វផ្សាយពីប្រទេសកម្ពុជាទៅកាន់ពិភពលោក»។

គួរបញ្ជាក់ថា កញ្ញា អ៉ឹង ទេពីបញ្ចពណ៌ និងនិស្សិតកម្ពុជា២រូបទៀតមានឈ្មោះ ហ៊ុត ម៉ីឡាង, ជឹង សុខ បញ្ញា បានប្រកួតឈ្នះក្នុងការស្នើគម្រោង Releaf Hub និងទទួលបានប្រាក់រង្វាន់ពីកម្មវិធី Asian Undergraduate Symposium នៅប្រទេសសិង្ហបុរី ដែលបានរៀបចំឡើងនៅពាក់កណ្តាលខែកក្កដា ឆ្នាំ២០២៥ កន្លងមកនេះ។