(កណ្ដាល)៖ លោក គួច ចំរើន អភិបាលខេត្តកណ្ដាល រួមទាំងលោកគ្រូ អ្នកគ្រូ អនុរក្ស និងបេក្ខជនមកប្រឡងបានពិនិត្យផ្ទៀងផ្ទាត់នៃការបើកហិបសុវត្តិភាព និងកាត់កញ្ចប់វិញ្ញាសារប្រឡងសញ្ញាបត្រ ទុតិយភូមិ នៅព្រឹកថ្ងៃទី២៨ ខែតុលា ឆ្នាំ២០២៥ នៅមណ្ឌលប្រឡងនៃវិទ្យាល័យហ៊ុន សែន សេរីភាព។

អភិបាលខេត្ត បានលើកឡើងថា អ្នកចេះគឺជាប់ ហើយខិតខំប្រឡងឲ្យអស់ពីសមត្ថភាពយកនិទ្ទេស A ឲ្យបានគ្រប់ៗគ្នា ហើយខេត្តនឹងមានរង្វាន់ជូនជាពិសេស។ ការប្រឡងសញ្ញាបត្រទុតិយភូមិ គឺជាការវាស់ស្ទង់នូវរាល់កម្រិត នៃចំណេះដឹង ដែលបានខិតខំសិក្សារៀនសូត្រ នៅមធ្យមសិក្សាទុតិយភូមិ ដើម្បីឈានចូលទៅបន្តការសិក្សានៅកម្រិតថ្នាក់មហាវិទ្យាល័យ សាកលវិទ្យាល័យបន្តទៀត ដូច្នេះត្រូវខិតខំឱ្យអស់ពីលទ្ធភាព ដើម្បីឱ្យការប្រឡងនេះ បានជាប់គ្រប់ៗគ្នា។ ពិសេសជាងនេះត្រូវអនុវត្តឱ្យបានតាមការណែនាំរបស់ក្រសួងអបរំ យុវជន និងកីឡា ដោយគោរពឱ្យបាននូវគោលការណ៍ទាំង៤នៃការប្រឡង គឺគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន (អ្នកចេះគឺជាប់)។

អភិបាលខេត្ត បានជូនពរសិស្សទាំងអស់មានសេចក្តីសុខសាន្ត ចិត្តរឹងមាំ ប្រើប្រាស់ចំណេះដឹង និងភាពជឿជាក់លើខ្លួនឯងឲ្យបានពេញលេញត្រូវមានការប្តេជ្ញាចិត្ត និងអត់ធ្មត់ក្នុងប្រឡងនាំឱ្យទទួលបានជោគជ័យ (ជាប់និទ្ទេសA) ដែលលទ្ធផលល្អនេះបានសម្រេចតាមបំណង និងក្លាយជាកម្លាំងចំណេះដឹងដ៏មានតម្លៃសម្រាប់គ្រួសារ សង្គម និងជាតិ។

សូមបញ្ជាក់ថា ការប្រឡងមធ្យមសិក្សាទុតិយភូមិ ពិតជាមានសារៈសំខាន់យ៉ាងខ្លាំងសម្រាប់ជីវិតសិស្ស ព្រោះវាជាជំហានមួយក្នុងការបន្តអប់រំ និងអនាគតការងារ ការប្រឡងវាជាវិធីសាស្រ្តមួយក្នុងការវាស់វែងចំណេះដឹង និងសមត្ថភាពដែលសិស្សទទួលបាន ក្នុងអំឡុងពេលសិក្សានៅមធ្យមសិក្សាទុតិយភូមិ។

សញ្ញាបត្រប្រឡងនេះ គឺជាច្រកទ្វារសំខាន់សម្រាប់បន្តការសិក្សាទៅកម្រិតឧត្តមសិក្សា សាកលវិទ្យាល័យ ឬវិទ្យាស្ថានជំនាញផ្សេងៗ សញ្ញាបត្រមធ្យមសិក្សាទុតិយភូមិ ក៏ជាមូលដ្ឋានសម្រាប់សិស្សមួយចំនួន ដែលចង់ចូលធ្វើការងារនៅក្នុងវិស័យរដ្ឋ ឬឯកជនដោយមានការទាមទារថ្នាក់កំរិតវប្បធម៌ ជាងនេះការប្រឡងជួយឲ្យសិស្សមានវិន័យ ការប្រឹងប្រែង និងការត្រៀមខ្លួនសម្រាប់ប្រឈមមុខ នឹងការប្រកួតប្រជែងក្នុងជីវិតពិតមួយដែលអាចប្រើប្រាស់ក្នុងការចុះបញ្ជីសិក្សាបំពេញការងារ ឬឆ្ពោះទៅរកជីវភាពល្អប្រសើរនាពេលអនាគត។

សម្រាប់ការប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី២៨-២៩ ខែតុលា ឆ្នាំ២០២៥ ខេត្តកណ្ដាលមានមណ្ឌលប្រឡងសញ្ញាបត្រមធ្យមសិក្សាទុតិយភូមិចំនួន ១៩មណ្ឌល ស្មើនឹង ៥០៤បន្ទប់ កើន ៣៩បន្ទប់ ដែលមានថ្នាក់វិទ្យាសាស្ត្រ ០៦មណ្ឌល និងថ្នាក់វិទ្យាសាស្ត្រសង្គម១៣មណ្ឌល។

មណ្ឌលទាំង១៩ នៅតាមសាលាក្នុងក្រុង-ស្រុក ចំនួន៦ទីតាំង៖

១-ក្រុងតាខ្មៅ មាន ៥មណ្ឌល
២-ស្រុកស្អាង មាន ៣មណ្ឌល
៣-ស្រុកកណ្ដាលស្ទឹង មាន ៣មណ្ឌល
៤-ស្រុកកៀនស្វាយ មាន ២មណ្ឌល
៥-ស្រុកពញាឮ មាន ៣មណ្ឌល
៦-ស្រុកខ្សាច់កណ្តាល មាន ៣មណ្ឌល៕