(ឧត្តរមានជ័យ)៖ ដើម្បីធានាបានដំណើរការប្រឡងប្រកបដោយតម្លាភាព ភាពត្រឹមត្រូវ និងយុត្តិធម៌ នាព្រឹកថ្ងៃទី២៨ ខែសីហា ឆ្នាំ២០២៥ លោក មាន ចាន់យ៉ាដា អភិបាលខេត្តឧត្តរមានជ័យ និងលោក ប្រាក់ សោភ័ណ អភិបាលខេត្តសៀមរាប បានអញ្ជើញចូលរួមជាអធិបតីក្នុងពិធីកាត់វិញ្ញាសាប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២៥ នៅមណ្ឌលវិទ្យាល័យចំណេះដឹងទូទៅ និងបច្ចេកទេពួក ស្ថិតក្នុងស្រុកពួក ខេត្តសៀមរាប។

ការកាត់វិញ្ញាសារប្រឡងនេះ បានប្រព្រឹត្តទៅក្រោមការឃ្លាំមើលយ៉ាងយកចិត្តទុកដាក់ពីសំណាក់គណៈកម្មការប្រឡង និងមន្ត្រីពាក់ព័ន្ធជាច្រើនរូប ដើម្បីធានាថាដំណើរការនៃការប្រឡងទាំងមូលគឺមានភាពត្រឹមត្រូវ ច្បាស់លាស់ និងចៀសវាងបានរាល់ហានិភ័យដែលអាចកើតមានឡើង ជាពិសេសគោរពយកនូវគោលការណ៍ «អ្នកចេះជាប់ អ្នកមិនចេះធ្លាក់» ជាធំ ដើម្បីលើកកម្ពស់គុណភាពអប់រំនៅកម្ពុជា។

ថ្លែងនៅក្នុងឱកាសនេះលោក មាន ចាន់យ៉ាដា អភិបាលខេត្ឧត្តរមានជ័យថា ការប្រឡងយកសញ្ញាបត្រមធ្យមសិក្សាទុតិយភូមិ (បាក់ឌុប) គឺដើម្បីដឹងពីសមត្ថភាពចំណេះដឹង ក្នុងការស្វែងរកនូវធនធានមនុស្ស ដែលជាទំពាំងស្នង ឫស្សី ក្នុងការចូលរួមអភិវឌ្ឍន៍ប្រទេសជាតិយើង ប្រកបទៅដោយសុខសន្តិភាព និងមានការរីកចម្រើនគ្រប់វិស័យផងដែរ ដែលទាមទាឱ្យបេក្ខជនទាំងអស់ត្រូវខិតខំអស់ពីសមត្ថភាព។

អភិបាលខេត្តថ្លែងបញ្ជាក់ទៀតថា ទោះបីបេក្ខជន បេក្ខនារី ត្រូវប្រឡងយកសញ្ញាបត្រទុតិយភូមិ (បាក់ឌុប)សរុបចំនួន១៧៧២នាក់ នៅខេត្តឧត្តរមានជ័យ ត្រូវផ្ទេរមកប្រឡងនៅស្រុកពួក ខេត្តសៀមរាប ក៏ពិតមែន ប៉ុន្តែអាជ្ញាធរខេត្ត បានឃ្លាំមើលតាមដានយ៉ាងយកចិត្តទុកដាក់ ពិសេសលើការស្នាក់នៅ ហូបចុករបស់បេក្ខជន និងកិច្ចការជាច្រើនទៀត ក្នុងទិសដៅផ្តល់ទឹកចិត្ត ផ្តល់កម្លាំងចិត្ត និងភាពកក់ក្តៅដល់បេក្ខជន បេក្ខនារី ប្រឡងរបស់យើង។

លោក ប្រាក់ សោភ័ណ អភិបាលខេត្តសៀមរាប បានថ្លែងជូនពរបេក្ខជនបេក្ខនារីទាំងអស់ឲ្យទទួលបានលទ្ធផលល្អប្រសើរ និងសម្រេចបាននូវក្តីស្រមៃក្នុងការបន្តការសិក្សាទៅថ្នាក់ឧត្តមសិក្សា ដើម្បីក្លាយជាធនធានមនុស្សដ៏ មានតម្លៃសម្រាប់អនាគតខ្លួនឯង ក្រុមគ្រួសារ និងប្រទេសជាតិ។

បើតាមការបញ្ជាក់របស់លោក ប៉ិច រតនា ប្រធានមន្ទីរអប់រំយុវជន និងកីឡាខេត្តឧត្ដរមានជ័យ បានឱ្យដឹងថា៖សម្រាប់ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប)២០២៥នេះ ប្រព្រឹត្តទៅក្នុងរយៈពេល២ថ្ងៃ ពោលចាប់ពីថ្ងៃទី២៨ដល់ថ្ងៃទី២៩ ខែសីហា ឆ្នាំ២០២៥។បេក្ខជនសរុបមកពីខេត្តឧត្តរមានជ័យ មានចំនួនសរុប១៧៧២នាក់ ស្រី១០១៤នាក់ ដោយត្រូវប្រឡងនៅទីរួមស្រុកពួក ខេត្តសៀមរាបមាន០៣ មណ្ឌលគឺ៖

*ទី១៖ មណ្ឌលបឋមសិក្សាទៀបាញ់គំរូរ មាន១៣បន្ទប់ បេក្ខជនមានចំនួន៣០៨នាក់ ស្រីចំនួន១៨៥
*ទី២៖ មណ្ឌល វិទ្យាល័យចំណេះដឹងទូទៅ និងបច្ចេកទេពួក (ខាងលិច) មាន២៧បន្ទប់ បេក្ខជនមានចំនួន៦៦៤នាក់ ស្រីចំនួន៣៥០នាក់
*ទី៣៖ មណ្ឌលវិទ្យាល័យ វិទ្យាល័យចំណេះដឹងទូទៅ និងបច្ចេកទេពួក (ខាងកើត) មាន៣២បន្ទប់ បេក្ខជនមានចំនួន ៨០០នាក់ ស្រី៤៧៩នាក់។ចំពោះបេក្ខជនដែលមានជីវភាពខ្វះខាត រដ្ឋបាលខេត្តឧត្ដរមានជ័យ និងផ្ដល់កន្លែងស្នាក់នៅ ការដឹកជញ្ជូននិងផ្ដល់អាហារបីពេលជូនផងដែរ៕