(ភ្នំពេញ)៖ នៅព្រឹកថ្ងៃទី២៨ ខែសីហា ឆ្នាំ២០២៥ លោក រិន វីរៈ ទីប្រឹក្សាផ្ទាល់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា រដ្ឋលេខាធិការក្រសួងផែនការ និងជាប្រធានក្រុមប្រឹក្សាភិបាលនៃវិទ្យស្ថានជាតិស្ថិតិ បានអញ្ជើញចូលរួមជា អធិបតីក្នុងពិធីបើកសិក្ខាសាលាពិគ្រោះយោបល់ភាគីពាក់ព័ន្ធស្តីពី ការផ្តល់ធាតុចូលលើបញ្ជីសំណួរអង្កេតកសិកម្មកម្ពុជាឆ្នាំ២០២៥ ដើម្បីគាំទ្រដល់សូចនាករយុទ្ធសាស្ត្របញ្ចកោណដំណាក់កាលទី១ សូចនាករគោលដៅអភិវឌ្ឍន៍ប្រកបដោយចីរភាពកម្ពុជា និងផែនការយុទ្ធសាស្ត្រអភិវឌ្ឍន៍ជាតិ នៅសណ្ឋាគារកាំបូឌីយ៉ាណា រាជធានីភ្នំពេញ។

សិក្ខាសាលានេះ​មាន​គោល​បំណងដើម្បីប្រមូលធាតុចូលបន្ថែមទៀតលើបញ្ជីសំណួរអង្កេតកសិកម្មកម្ពុជាឆ្នាំ២០២៥ ដើម្បីទទួលបានលទ្ធផលពីការអង្កេតនេះដែលអាចឆ្លើយតបនទៅនឹងគោលដៅ អភិវឌ្ឍន៍ប្រកបដោយចីរភាព កម្ពុជា និងសកល (CSDG, SDG) ក៏ដូចជា ផែនការយុទ្ធសាស្រ្តអភិវឌ្ឍន៍ជាតិ និងយុទ្ធសាស្រ្តបច្ចកោណ ដំណាក់កាលទី១។

នាឱកាសនោះលោក រិន វីរៈ បានជម្រាបជូនអង្គសិក្ខាសាលាថា វិទ្យាស្ថានជាតិស្ថិតិនៃក្រសួងផែនការ សហការជាមួយដៃគូអភិវឌ្ឍអង្គការ FAO បានរៀបចំកម្រងបញ្ជីសំណួរអង្កេតកសិកម្មកម្ពុជា សម្រាប់អនុវត្តឆ្នាំ២០២៥ ដើម្បីសម្ភាសន៍គ្រួសារកសិកម្មសំណាកគំរូប្រមាណជិត១៦០០០គ្រួសារនៅរាជធានី ខេត្តទាំង២៥ ដែលនឹងត្រូវអនុវត្តនៅក្នុងខែតុលា ឆ្នាំ២០២៥ ខាងមុខនេះ។

ជាក់ស្តែងនៅពេលបច្ចុប្បន្ននេះ អង្កេតកសិកម្មកម្ពុជា អាចទាញបានពីអថេរទិន្នន័យ និងអាចគណនាបាននូវសូចនាករសំខាន់ៗមួយចំនួន ក្នុងផ្នែកកសិកម្មនៃគោលដៅអភិវឌ្ឍន៍ប្រកបដោយចីរភាពកម្ពុជា និងសាកល។ ប៉ុន្តែទោះជាយ៉ាងនេះក្តី ក៏នៅមានសូចនាករជាច្រើនទៀត ដែលពាក់ព័ន្ធនឹងវិស័យកសិកម្មដែលអាចទាញបានពីប្រភពទិន្នន័យផ្សេងៗដែលទទួលបន្ទុកដោយក្រសួង ស្ថាប័ន ឬអង្គភាពនានា ក្នុងការផ្តល់ទិន្នន័យស្ថិតិ រដ្ឋបាលផ្សេងៗទៀត។

ក្នុងន័យនេះ លោកបានបញ្ជាក់បន្ថែមថា សិក្ខាសាលាពិគ្រោះយោបល់នៅព្រឹកថ្ងៃនេះ គឺមានសារៈសំខាន់បំផុតក្នុងការពិភាក្សាដើម្បីពិនិត្យ និងផ្តល់ធាតុចូលបន្ថែមនូវចំណុចខ្វះខាតលើតារាងសំណួរ អង្កេតកសិកម្មកម្ពុជាដែលអាច បញ្ចូលបន្ថែម ឬកាត់បន្ថយចំណុចពុំចាំបាច់ ដើម្បីកែលម្អ និងធ្វើបច្ចុប្បន្នភាពស្ថិតិថ្មីៗឱ្យបានគ្រប់ជ្រុងជ្រោយតាមតម្រូវការចាំបាច់របស់ក្រសួង ស្ថាប័ន ឬអង្គភាពពាក់ព័ន្ធ សម្រាប់គាំទ្រដល់ការប្រើប្រាស់ឱ្យចំគោលដៅ គោលនយោបាយ ផែនការយុទ្ធសាស្រ្ត និងកម្មវិធីអភិវឌ្ឍន៍នានារបស់ក្រសួង ស្ថាប័ន ឬអង្គភាពសាមីផងដែរ។

ឆ្លងតាមកម្មវិធីសិក្ខាសាលាពិគ្រោះយោបល់ លោកមានជំនឿយ៉ាងមុតមាំថា អង្គសិក្ខាសាលាទាំងអស់ នឹងចូលរួមយ៉ាងសកម្មក្នុងកិច្ចពិភាក្សា និងផ្តល់ធាតុបន្ថែមដើម្បីកែលម្អលើតារាងសំណួរអង្កេតកសិកម្មកម្ពុជា ដែលអាចគាំទ្រដល់គោលដៅអភិវឌ្ឍន៍ប្រកបដោយចីរភាពកម្ពុជា និងសកល៕