អភិបាលខេត្តព្រះវិហារ អញ្ជើញបើកប្រអប់វិញ្ញាសាប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៥ នៅមណ្ឌលអនុវិទ្យាល័យ ហ៊ុន សែន ត្បែងមានជ័យ ក្រុងព្រះវិហារ

28-08-2025 16:10

(ព្រះវិហារ)៖ លោក គីម រិទ្ធី អភិបាលខេត្តព្រះវិហារ នៅព្រឹកថ្ងៃទី២៨ ខែសីហា ឆ្នាំ២០២៥ បានអញ្ជើញកាត់វិញ្ញាសា ដើម្បីបើកដំណើរការប្រឡងយកសញ្ញាបត្រទុតិយភូមិ (បាក់ឌុប)ឆ្នាំ២០២៥ នៅមណ្ឌលអនុវិទ្យាល័យ ហ៊ុន សែន ត្បែងមានជ័យ ស្ថិតក្នុងសង្កាត់កំពង់ប្រណាក ក្រុងព្រះវិហារ ខេត្តព្រះវិហារ។

លោក គីម រិទ្ធី បានថ្លែងផ្ដល់ការលើកទឹកចិត្ត និងបានផ្តាំផ្ញើដល់បេក្ខជនប្រឡងទាំងអស់ ត្រូវខិតខំបញ្ចេញឱ្យអស់សមត្ថភាព និងចំណេះដឹងក្នុងការប្រឡង ដើម្បីទទួលបានលទ្ធផលល្អគ្រប់ៗគ្នា ជាពិសេសត្រូវគោរពតាមការណែនាំរបស់គណៈមេប្រយោគឱ្យបានល្អ។

បើតាមលោក ចេង លឹមហ៊ាន់ ប្រធានមន្ទីរអប់រំ យុវជន និងកីឡា ខេត្តព្រះវិហារ បានថ្លែងឱ្យដឹងថា៖សម្រាប់បេក្ខជន បេក្ខនារី ត្រូវចូលរួមប្រឡងយកសញ្ញាបត្រទុតិយភូមិ(បាក់ឌុប)ឆ្នាំ២០២៥ នៅខេត្តព្រះវិហារ មានចំនួនសរុប១៩១៣នាក់ ក្នុងនោះ៤នាក់ប្រឡងនៅខេត្តផ្សេង និងអវត្តមានចំនួន១០នាក់ ស្រីចំនួន៦នាក់។

លោកប្រធានមន្ទីរថ្លែងបញ្ជាក់ទៀតថា ចំពោះមណ្ឌលប្រឡងនៅខេត្តព្រះវិហារ មានចំនួន៤មណ្ឌលគឺ៖ ទី១.មណ្ឌលសាលាគរុកោសល្យខេត្តព្រះវិហារ ទី២.មណ្ឌលវិទ្យាល័យ ជា សុីម ត្បែងមានជ័យ ទី៣.មណ្ឌលអនុវិទ្យាល័យ ហ៊ុន សែន ត្បែងមានជ័យ និងទី៤.មណ្ឌលសាលាបឋមសិក្សាត្បែងមានជ័យ៕