(ស្វាយរៀង)៖ លោក ម៉ែន វិបុល ប្រធានក្រុមប្រឹក្សាខេត្តស្វាយរៀង នៅព្រឹកថ្ងៃទី២៨ ខែសីហា ឆ្នាំ២០២៥ បានអញ្ជើញបេីកវិញ្ញាសារប្រឡងសញ្ញាបត្រមធ្យមសិក្សាទុតិយភូមិ នៅមណ្ឌលសាលាបឋមសិក្សាព្រះសីហនុ ក្រុងស្វាយរៀង និងលោក ប៉េង ពោធិ៍សា អភិបាលខេត្តស្វាយរៀង បានអញ្ជើញបើកវិញ្ញាសាប្រឡងបញ្ញាបត្រមធ្យមសិក្សាទុតិយភូមិ នៅមណ្ឌលវិទ្យាល័យស្វាយរៀង ខាងត្បូង។

ពិធីនេះមានការអញ្ជេីញចូលរួមពីលោកតំណាងក្រសួងអប់រំ យុវជន និងកីឡា លោកអភិបាលរងខេត្ត លោកស្នងការនគរបាលខេត្ត លោកមេបញ្ជាការរងកងរាជអាវុធហត្ថខេត្ត លោកនាយករដ្ឋបាលសាលាខេត្ត លោកអភិបាលក្រុងស្វាយរៀង គណៈមេប្រយោគ អប្បមាទ ជំនួយការអប្បមាទ ប្រធាន អនុប្រធាន មណ្ឌល អ្នកត្រួតពិនិត្យ តាមអាគារ ប្រធាន អនុប្រធានមន្ទីរក្នុងខេត្ត អង្គភាពប្រឆាំងអំពើពុករលួយ អ្នកសង្កេតការណ៍ និងអ្នកពាក់ព័ន្ធមួយចំនួនទៀត។

ក្នុងឱកាសនោះ លោកអភិបាលខេត្ត បានលើកទឹកចិត្តដល់បេក្ខជនទាំងអស់ ត្រូវខិតខំប្រឹងប្រែងឲ្យអស់ពីសមត្ថភាព ធ្វើឲ្យបានរួចរាល់លើគ្រប់វិញ្ញាសារដែលបានដាក់ក្នុងការប្រឡង គោរពឲ្យបានខ្ជាប់ខ្ជួននូវបទប្បញ្ញត្តិ និងបទបញ្ជាផ្ទៃក្នុងនៃការប្រឡង ដោយមិនត្រូវលួចចម្លងគ្នា មើលគ្នា ពិភាក្សាគ្នា មិនត្រូវគូសសញ្ញាសម្គាល់លើក្រដាស វិញ្ញាសារ និងលួចលាក់ប្រើប្រាស់ឧបករណ៍អេឡិចត្រូនិចនោះឡើយ។ លោកបានជូនពរឲ្យបេក្ខជនទទួលបានជោគជ័យក្នុងការប្រឡង ក្នុងនោះរដ្ឋបាលខេត្ត នឹងនៅតែបន្តផ្តល់រង្វាន់លើកទឹកចិត្តសម្រាប់ក្មួយៗណាដែលបានជាប់និទ្ទេសល្អ (A) ផងដែរ។

លោកបានបន្តថា ចំពោះការងារសន្តិសុខសណ្ដាប់ធ្នាប់ក្នុងពេលប្រឡងនេះដែរ អាជ្ញាធរខេត្តបានរៀបចំកម្លាំងគ្រប់មណ្ឌលប្រឡងទាំងអស់ ដើម្បីការពារសុខសុវត្ថិភាពដល់សិស្សានុសិស្ស ពិសេសផ្លូវជាតិលេខ១ ដែលមានរថយន្តឆ្លងកាត់ច្រើន ដូច្នេះកម្លាំងសមត្ថកិច្ចយើងបានដាក់បារ៉ាសតាមផ្លូវសំខាន់ៗ ដើម្បីបញ្ជៀសការស្ទះចរាចរណ៍ផងដែរ។

សូមបញ្ជាក់ថា ខេត្តស្វាយរៀង ការប្រឡងសញ្ញាបត្រមធ្យមសិក្សាទុតិយភូមិនៅឆ្នាំ២០២៤-២០២៥នេះ មានការចុះឈ្មោះដាក់ពាក្យសុំប្រឡងសញ្ញាបត្រមានបេក្ខជនសរុបរួម៤,៩៥៣នាក់ ស្រី២,៦៤៩នាក់ ស្មើនឹង១៩៩បន្ទប់។ ថ្នាក់វិទ្យាសាស្ត្រ បេក្ខជន១,១៧២នាក់ ស្រី៧២២នាក់ស្មើនឹង៤៧បន្ទប់។ ថ្នាក់វិទ្យាសាស្ត្រសង្គមបេក្ខជន ៣,៧៨០នាក់ ស្រី១,៩២៧នាក់ ស្មើនឹង១៥២បន្ទប់។

ក្នុងនោះ បេក្ខជននៅសល់ជាក់ស្តែងក្រោយដកបេក្ខភាព មានបេក្ខជនសរុបរួម៤,៨៨២នាក់ ស្រី២,៦៣៤នាក់ ស្មើនឹង១៩៦បន្ទប់។ ក្នុងនោះថ្នាក់វិទ្យាសាស្ត្រមានបេក្ខជន១,១៦៣នាក់ ស្រី៧១៩នាក់ ស្មើនឹង៤៧បន្ទប់។ ថ្នាក់វិទ្យាសាស្ត្រសង្គមមានបេក្ខជន ៣,៧១៩នាក់ ស្រី១៩១៥នាក់ ស្មើនឹង១៤៩បន្ទប់។

ចំណែកមណ្ឌលសម្រាប់ការប្រឡងមានចំនួន៨ មណ្ឌលរួមមាន៖ មណ្ឌលថ្នាក់វិទ្យាសាស្ត្រ មាន២មណ្ឌល ស្មើនឹងចំនួន៤៧បន្ទប់។ មណ្ឌលថ្នាក់វិទ្យាសាស្ត្រសង្គមមាន៦ មណ្ឌល ស្មើនឹងចំនួន១៨៩បន្ទប់។ ចំពោះមណ្ឌលសម្រាប់ដំណើរការប្រឡងសំណេរទាំង៨ គឺមានចំនួន៧មណ្ឌលស្ថិតក្នុងក្រុងស្វាយរៀង និងមួយមណ្ឌលទៀតស្ថិតនៅទីរួមស្រុកស្វាយជ្រំ។ មណ្ឌលនីមួយៗត្រូវធានាឲ្យមានបរិស្ថានក្នុង និងក្រៅមណ្ឌលល្អមានរបងក្លោងទ្វារ បិទបើកសុវត្ថិភាព មានកន្លែងផ្ញើរមធ្យោបាយសមរម្យ មានដើមឈើជ្រកម្លប់ផងដែរ។

សម្រាប់តាមអគារនីមួយៗ រៀបចំតុ កៅអីចំនួន២៥ក្នុងមួយបន្ទប់ ក្តារខៀនគ្មានស្នាមឆ្នូត ទ្វារ បង្អួច ដំបូល គត់មុត មានអំពូលភ្លើង កង្ហា ក្នុងបន្ទប់ប្រឡង។ រៀបចំបន្ទប់ទឹកឲ្យមានអនាម័យ មានទឹកគ្រប់គ្រាន់ ត្រៀមឧបករណ៍បំពងសំឡេងឲ្យឮច្បាស់សម្រាប់ជូនដំណឹងក្នុងមណ្ឌលប្រឡង។ ដូច្នេះមណ្ឌលទាំង ៨ នឹងដំណើរការប្រឡងសញ្ញាបត្រមធ្យមសិក្សាទុតិយភូមិប្រកបដោយរលូន៕