(អូស្ត្រាលី)៖ ក្នុងអំឡុងពេលកំពុងបំពេញបេសកកម្មទាក់ទាញ និងជំរុញវិនិយោគនៅប្រទេសអូស្ត្រាលី ចាប់ពីថ្ងៃទី២៤ ដល់ថ្ងៃទី២៨ ខែសីហា ឆ្នាំ២០២៥ ក្រោមការដឹកនាំដោយឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា គណៈប្រតិភូសមាគមកម្ពុជា ដែលដឹកនាំដោយអ្នកឧកញ៉ា សៀ ឬទ្ធី និងមានសមាសភាពចូលរួមដូចជា អ្នកឧកញ៉ា ហ៊ុន ឡាក់ អគ្គលេខាធិការ, អ្នកឧកញ៉ា គួន ធីតា, អ្នកឧកញ៉ា លី សុភាព, ឧកញ៉ា សូ សុខប៊ុនលីម និងឧកញ៉ា ម៉ៅ បញ្ចពណ៌ បានចូលរួមយ៉ាងសកម្មនៅក្នុងកិច្ចប្រជុំពិភាក្សាការងារ ជាមួយស្ថាប័នជំនាញៗ ព្រមទាំងជំនួបជាមួយបណ្តាធុរជន និងវិនិយោគិនធំៗ ក៏ដូចជាការបំពេញដំណើរទស្សនកិច្ចជាបន្តបន្ទាប់រួមទាំងកិច្ចពិភាក្សាតុមូល ជាមួយតំណាងក្រុមហ៊ុន និងធុរជននៅក្នុងប្រទេសអូស្ត្រាលីផងដែរ។

ជាក់ស្តែង ពេញមួយថ្ងៃទី២៥ ខែសីហា ឆ្នាំ២០២៥ អ្នកឧកញ៉ា សៀ ឬទ្ធី បានដឹកនាំគណៈប្រតិភូសមាគមកម្ពុជា អមឧបនាយករដ្ឋមន្ត្រី ស៊ុន ចាន់ថុល នៅក្នុងជំនួបដូចជា៖

១. ជំនួបពិភាក្សាការងារជាមួយលោក Robert Seidler សមាជិកក្រុមប្រឹក្សាភិបាលក្រុមហ៊ុន CIMIC Group ដែលជាក្រុមហ៊ុនឈានមុខមួយលើវិស័យសំណង់ វិស័យរ៉ែ និងដៃគូដ៏មានសក្តានុពលជាមួយ ស្ថាប័នសាធារណៈលើគម្រោងសាង់សង់ហេដ្ឋារចនាសម្ព័ន្ធនានា។

២. ជំនួបជាមួយលោកលោក John Hopkins តំណាង EFA នាយកប្រតិបតិ្តទីភ្នាក់ងារឥណទាន សម្រាប់ការនាំចេញរបស់រដ្ឋាភិបាលអូស្ត្រាលី (Export Finance Australia – EFA) លោក John Hopkins ដែលជាស្ថាប័នគាំទ្រពាណិជ្ជកម្មនាំចេញរបស់អូស្ត្រាលី និងជួយដល់ការអភិវឌ្ឍហេដ្ឋារចនាសម្ព័ន្ធពាក់ព័ន្ធនៅក្នុងប្រទេសជាដៃគូ។ EFA មានគោលដៅជំរុញកំណើនប្រកបដោយនិរន្តរភាព ដែលផ្តល់អត្ថប្រយោជន៍ដល់ប្រទេសអូស្ត្រាលី និងប្រទេសជាដៃគូរបស់ខ្លួន តាមរយៈការផ្តល់ជំនួយហិរញ្ញវត្ថុ និងដំណោះស្រាយជំនាញបច្ចេកទេសផ្សេងៗ ដើម្បីលើកកម្ពស់ការវិនិយោគពីអូស្ត្រាលី នៅក្នុងប្រទេសជាដៃគូនោះឱ្យកាន់តែមានភាពប្រកួតប្រជែងខ្ពស់នៅក្នុងទីផ្សារអន្តរជាតិ។

៣. ជំនួបពិភាក្សាជាមួយលោកស្រី Susannah Patton ប្រធានស្តីទីផ្នែកស្រាវជ្រាវ នៃវិទ្យាស្ថាន Lowy Institute ដែលជាវិទ្យាស្ថានឯករាជ្យឈានមុខគេមួយ នៅក្នុងប្រទេសអូស្ត្រាលី ដែលទទួលបានការវាយតម្លៃខ្ពស់លើលទ្ធផលនៃការស្រាវជ្រាវ និងឥទ្ធិពលនៃការសិក្សាទាំងនេះ ទៅលើគោលនយោបាយទាំងក្នុងប្រទេសអូស្ត្រាលី និងនៅទូទាំងពិភពលោកហើយនាពេលថ្មីៗនេះ វិទ្យាស្ថាន Lowy Institute ក៏បានសិក្សាអំពីលំហូរហិរញ្ញវត្ថុ និងជំនួយសម្រាប់ការអភិវឌ្ឍនៅក្នុងតំបន់អាស៊ីអាគ្នេយ៍ និងយុទ្ធសាស្រ្តពាក់ព័ន្ធមួយចំនួននៅក្នុងតំបន់។

៤. ជំនួបពិភាក្សាជាមួយតំណាងដៃគូ គ្រប់គ្រងក្រុមហ៊ុន Blackrock Investment Management (Global Infrastructure Partners) ដឹកនាំដោយលោក Ari Droga ដែលជាក្រុមហ៊ុនវិនិយោគពហុជាតិសាសន៍លំដាប់ពិភពលោកដែលត្រូវបានបង្កើតឡើងក្នុងឆ្នាំ១៩៨៨ ហើយបានបណ្ដាក់ទុនវិនិយោគនៅក្នុងហេដ្ឋារចនាសម្ព័ន្ធសំខាន់ៗ នៅក្នុងប្រទេសអូស្ត្រាលី ដូចជាអាកាសយានដ្ឋាននៅទីក្រុងស៊ីដនី កំពង់ផែនៅទីក្រុងម៊ែលប៊ន និងហេដ្ឋារចនាសម្ព័ន្ធដឹកជញ្ជូនសំខាន់ៗផ្សេងទៀត នៅលើពិភពលោករួមមានចក្រភពអង់គ្លេសជាដើម។

៥. ជួបពិភាក្សាការងារជាមួយលោក Paul Serra នាយកប្រតិបត្តិក្រុមហ៊ុន SunRice Group ដែលត្រូវបានគេដឹងថាជាក្រុមហ៊ុនសញ្ជាតិអូស្ត្រាលីដំបូងគេ ដែលបាននាំចេញអង្ករពីកម្ពុជាទៅកាន់ទីផ្សារអូស្ត្រាលី និងនូវែលហ្សេឡង់ផងដែរ និងកំពុងមានចំណាប់អារម្មណ៍ ក្នុងការធ្វើទស្សនកិច្ចមកកាន់ប្រទេសកម្ពុជា ដើម្បីពិនិត្យលទ្ធភាពបណ្តាក់ទុនវិនិយោគបង្កើតរោងចក្រ និងនាំយកពូជ ព្រមទាំងបច្ចេកវិទ្យាបង្កបង្កើនផលស្រូវ Japonica មកប្រទេសកម្ពុជា។

លុះដល់ថ្ងៃទី២៦ ខែសីហា ឆ្នាំ២០២៥ គណៈប្រតិភូសមាគមឧកញ៉ាកម្ពុជា បានបន្តចូលរួមអមឧបនាយករដ្ឋមន្ត្រី ស៊ុន ចាន់ថុល នៅក្នុងកិច្ចប្រជុំមួយចំនួនទៀតរួមមាន៖

១. ជំនួបពិសារអាហារពេលព្រឹក និងពិភាក្សាការងារជាមួយលោក Glenn Keys AO ស្ថាបនិក និងប្រធានក្រុមហ៊ុន Aspen Medical ដែលជាក្រុមហ៊ុនដ៏ធំ និងទទួលបានជោគជ័យនាពេលកន្លងមកលើគម្រោងសុខាភិបាលនៅក្នុងប្រទេសអូស្ត្រាលី ប្រទេសឥណ្ឌូនេស៊ី និងប្រទេសហ្វីជី។ បន្ថែមពីនោះ ក្រុមហ៊ុនក៏មានប្រតិបត្តិការសេវាសុខាភិបាល នៅក្នុងប្រទេសធំៗមួយចំនួនលើពិភពលោកដូចជាសហរដ្ឋអាម៉េរិក និងចក្រភពអង់គ្លេសផងដែរ។ ក្រុមហ៊ុននឹងសិក្សាលម្អិតលើវិសាលភាពគ្របដណ្តប់ សម្រាប់ការវិនិយោគនៅកម្ពុជា ហើយស្វែងរកកិច្ចសហការជាមួយអង្គភាពពាក់ព័ន្ធសំដៅបណ្តាក់ទុនវិនិយោគនាពេលអនាគត។២. ជំនួបជាមួយនាយកប្រតិបត្តិក្រុមប្រឹក្សាវិនិយោគអូស្ត្រាលី (Australia Investment Council) លោកស្រី Navleen Prasad ដែលជាស្ថាប័នដ៏សំខាន់មួយ ក្នុងការសម្របសម្រួល និងចាត់ចែងទុនវិនិយោគឯកជនអូស្ត្រាលី ដោយផ្ដល់សេវាគាំទ្រដល់ក្រុមហ៊ុនវិនិយោគសំខាន់ៗរបស់អូស្ត្រាលី រាប់បញ្ចូលទាំងក្រុមហ៊ុនមូលធនសម្ព័ន្ធ (Venture Capital), Private Equity, Private Credit។ល។ ក្រុមប្រឹក្សាវិនិយោគអូស្ត្រាលីក៏បំពេញមុខងារជាស្ថាប័នជំរុញវិនិយោគ និងចាត់ចែងមូលនិធិប្រាក់សន្សំចូលនិវត្តន៍របស់ប្រទេសអូស្ត្រាលី ដើម្បីប្រើប្រាស់ជាទុនសម្រាប់ទ្រទ្រង់ការវិនិយោគឯកជនផងដែរ។

៣. ដំណើរទស្សនកិច្ចអាកាសយានដ្ឋានអន្តរជាតិស៊ីដនី (SYD) របស់អូស្ត្រាលី ដែលវិនិយោគដោយក្រុមហ៊ុន Global Infrastructure Partners (GIP) ដើម្បីស្វែងយល់ពីការអភិវឌ្ឍ និងគ្រប់គ្រងអាកាសយានដ្ឋានអន្តរជាតិស៊ីដនី (SYD) ដែលជាគម្រោងវិនិយោគមួយរបស់ក្រុមហ៊ុន GIP និងមានឯកទេសក្នុងការវិនិយោគ កាន់កាប់ និងប្រតិបត្តិការទ្រព្យសកម្ម ហេដ្ឋារចនាសម្ព័ន្ធដ៏ធំ និងប្រទាក់ក្រឡានៅក្នុងវិស័យផ្សេងៗ រួមមាន ថាមពលកកើតឡើងវិញ, ការផលិត និងចែកចាយថាមពល, ហេដ្ឋារចនាសម្ព័ន្ធឧស្ម័ន និងប្រេង, វិស័យដឹកជញ្ជូនដូចជាអាកាសយានដ្ឋាន, កំពង់ផែ, ផ្លូវដែក, និងហេដ្ឋារចនាសម្ព័ន្ធដឹកជញ្ជូនផ្សេងទៀត, ហេដ្ឋារចនាសម្ព័ន្ធឌីជីថល រួមមានមជ្ឈមណ្ឌលទិន្នន័យ, បណ្តាញខ្សែកាប Fiber Optic និងបង្គោលអង់តែនទូរសព្ទ និង ការគ្រប់គ្រងកាកសំណល់ និងហេដ្ឋារចនាសម្ព័ន្ធទឹកជាដើម។។

បន្ទាប់មកទៀតនា ថ្ងៃទី២៧ ខែសីហា ឆ្នាំ២០២៥ ដែលជាថ្ងៃចាប់ផ្តើម នៃបេសកកម្មនៅក្នុងនៅទីក្រុងមែលប៊ន អ្នកឧកញ៉ា ហ៊ុន ឡាក់ បានបន្តដឹកនាំគណៈប្រតិភូសមាគមឧកញ៉ាកម្ពុជា ចូលរួមអមឧបនាយករដ្ឋមន្ត្រី ស៊ុន ចាន់ថុល នៅក្នុងសកម្មភាពមួយចំនួនទៀតដូចជា៖

១. ដំណើរទស្សនកិច្ចមជ្ឈមណ្ឌលសន្និបាត និងពិព័រណ៍មែលប៊ន (Melbourne Convention and Exhibition Centre - MCEC) ព្រមទាំងជំនួបជាមួយតំណាងក្រុមហ៊ុន Plenary Group ដែលជាក្រុមហ៊ុនវិនិយោគហេដ្ឋារចនាសម្ព័ន្ធឯករាជ្យដ៏លេចធ្លោមួយនិងមានជំនាញក្នុងការអភិវឌ្ឍ វិនិយោគ និងគ្រប់គ្រងហេដ្ឋារចនាសម្ព័ន្ធសាធារណៈ ជាពិសេសគម្រោងនៅក្រោមទម្រង់ភាពជាដៃគូរវាងរដ្ឋ និងឯកជន (Public-Private Partnerships - PPP)។ ក្រុមហ៊ុននេះបានចូលរួមក្នុងគម្រោងហេដ្ឋារចនាសម្ព័ន្ធជាច្រើនប្រភេទ រួមមាន៖ មន្ទីរពេទ្យ, សាលារៀន, តុលាការ, មជ្ឈមណ្ឌលសន្និបាត និងពិព័រណ៍ MCEC, ផ្លូវថ្នល់, ផ្លូវរថភ្លើង (Sydney Metro), ប្រព័ន្ធដឹកជញ្ជូនសាធារណៈ, និងការគ្រប់គ្រងទឹក និងកាកសំណល់ជាដើម។

២. កិច្ចពិភាក្សាតុមូលជាមួយតំណាងក្រុមហ៊ុន សមាគមធុរកិច្ច និងអ្នកជំនាញក្នុងវិស័យធុរកិច្ច និងវិនិយោគរបស់អូស្ត្រាលីដែលរៀបចំដោយ លោក Peter Horn អ្នកគ្រប់គ្រងទូទៅផ្នែកវិនិយោគ នៃគណៈកម្មការពាណិជ្ជកម្ម និងវិនិយោគអូស្ត្រាលី (The Australian Trade and Investment Commission – Austrade) ដើម្បីស្វែងយល់អំពីបច្ចុប្បន្នភាព និងសក្តានុពលរបស់កម្ពុជាសម្រាប់ការវិនិយោគ ព្រមទាំងការចែករំលែកបទពិសោធ និងការផ្តល់សក្ខីភាពនៃការវិវត្តន៍ជាវិជ្ជមានរបស់កម្ពុជាដោយ
លោក Stephen Higgins និងលោក Morgan Hart ជាវិនិយោគិនអូស្ត្រាលីកំពុងបណ្ដាក់ទុនវិនិយោគនៅកម្ពុជាផ្ទាល់។

៣. ទស្សនកិច្ចសិក្សាអំពីបច្ចេកទេសថ្មីៗ នៅមជ្ឈមណ្ឌលអភិវឌ្ឍន៍បច្ចេកទេស Bundoora របស់ក្រុមហ៊ុន Rio Tinto ដើម្បីសិក្សាស្វែងយល់ពីសកម្មភាពវិនិយោគ ក្នុងវិស័យរ៉ែដែលប្រើប្រាស់បច្ចេកវិទ្យាទំនើបចុងក្រោយ និងនវានុវត្តន៍ថ្មីៗ នៅមជ្ឈមណ្ឌលស្រាវជ្រាវ និងអភិវឌ្ឍន៍របស់ក្រុមហ៊ុន Rio Tinto (Rio Tinto Research and Development facility) នៅតំបន់ Bundoora ដោយមានការទទួលបដិសណ្ឋារកិច្ចពីលោក Stuart Watson ប្រធានផ្នែកយុទ្ធសាស្ត្របច្ចេកទេស។

តាមរយៈបេសកកម្មទាក់ទាញ និងជំរុញវិនិយោគនៅប្រទេសអូស្ត្រាលីនេះ សមាគមឧកញ៉ាកម្ពុជា បានជម្រាបជូនធុរជន ក៏ដូចជាវិនិយោគិនអូស្ត្រាលីនូវសាវតារបស់សមាគម ដែលជាស្ថប័នឯកជនប្រមូលផ្តុំដោយធុរជនសុទ្ធសឹងជាពាណិជ្ជករ ដែលកំពុងវិនិយោគដោយផ្ទាល់លើពហុវិស័យនៅក្នុងប្រទេសកម្ពុជា ដែលបានរួមចំណែកក្នុងការបង្កើតការងារជូនប្រជាជនកម្ពុជា ក៏ដូចជាជំរុញកំណើនសេដ្ឋកិច្ចជាតិ ព្រមទាំងជាដៃគូដែលមានសក្តានុពល សម្រាប់បណ្តាវិនិយោគិនបរទេស ដើម្បីបង្កើតឱកាសក្នុងការវិនិយោគ នៅក្នុងប្រទេសកម្ពុជាបន្ថែមទៀត៕