ការប្រឡងសញ្ញាបត្របាក់ឌុប សម្រាប់ថ្ងៃទី១ ត្រូវបានបញ្ចប់ ខណៈការប្រឡងត្រូវបន្ដនៅថ្ងៃស្អែកដែលជាថ្ងៃចុងក្រោយ ! (Video inside)
28-08-2025 16:59
(ភ្នំពេញ)៖ ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង៖ ២៨ សីហា ២០២៥ សម្រាប់ថ្ងៃទី១ ថ្ងៃទី២៨ ខែសីហា ឆ្នាំ២០២៥នេះ ត្រូវបានបញ្ចប់គិតត្រឹមម៉ោង៥ល្ងាចនេះ ខណៈការប្រឡងនេះត្រូវបន្ដមួយថ្ងៃទៀត នៅថ្ងៃទី២៩ ខែសីហា ឆ្នាំ២០២៥ ដែលជាថ្ងៃចុងក្រោយ។
ការប្រឡងបាក់ឌុប ថ្ងៃដំបូងត្រូវនឹងថ្ងៃទី២៨ ខែសីហា ឆ្នាំ២០២៥ រួមមាន៖
* ពេលព្រឹក សម្រាប់ថ្នាក់វិទ្យាសាស្ត្រសង្គម៖ ម៉ោងទី១ មុខវិជ្ជា៖ ផែនដី និងបរិស្ថានវិទ្យា និង ម៉ោងទី២ មុខវិជ្ជា៖ ប្រវត្តិវិទ្យា។
* ពេលព្រឹក សម្រាប់ថ្នាក់វិទ្យាសាស្ត្រ៖ ម៉ោងទី២ មុខវិជ្ជា៖ ប្រវត្តិវិទ្យា និង ម៉ោងទី២ មុខវិជ្ជា៖ ជីវវិទ្យា។
* ពេលរសៀល ថ្នាក់វិទ្យាសាស្ត្រសង្គម៖ ម៉ោងទី១ មុខវិជ្ជា៖ ភូមិវិទ្យា និងម៉ោងទី២ មុខវិជ្ជា៖ ភាសាបរទេស។
* ពេលរសៀល ថ្នាក់វិទ្យាសាស្ត្រ៖ ម៉ោងទី១មុខវិជ្ជា៖ គីមីវិទ្យា និងម៉ោងទី២ មុខវិជ្ជា៖ ភាសាបរទេស។
ដោយឡែក សម្រាប់ការប្រឡងនៅថ្ងៃទី២ ត្រូវនឹងថ្ងៃទី២៩ ខែសីហា ឆ្នាំ២០២៥ស្អែកនេះ រួមមាន៖
* ពេលព្រឹក សម្រាប់ថ្នាក់វិទ្យាសាស្ត្រសង្គម៖ ម៉ោងទី១ មុខវិជ្ជា៖ គណិតវិទ្យា និង ម៉ោងទី២ មុខវិជ្ជា៖ សីលធម៌ ពលរដ្ឋវិជ្ជា។
* ពេលព្រឹក សម្រាប់ថ្នាក់វិទ្យាសាស្ត្រ៖ ម៉ោងទី២ មុខវិជ្ជា៖ អក្សរសាស្ត្រខ្មែរ និង ម៉ោងទី២ មុខវិជ្ជា៖ រូបវិទ្យា។
* ពេលរសៀល ថ្នាក់វិទ្យាសាស្ត្រសង្គម៖ មុខវិជ្ជា៖ អក្សរសាស្ត្រខ្មែរ។
* ពេលរសៀល ថ្នាក់វិទ្យាសាស្ត្រ៖ មុខវិជ្ជា គណិតវិទ្យា។
ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២៨ សីហា ២០២៥ មានបេក្ខជនចុះឈ្មោះប្រឡងសរុបចំនួន ១៤៦ ៧២០ នាក់ (ស្រី ៨១ ៤៤២ នាក់) ក្នុងនោះ បេក្ខជនថ្នាក់វិទ្យាសាស្ត្រ មានចំនួន ៤០ ៦៧៨ នាក់ (ស្រី ២៤ ៥១៩ នាក់) បេក្ខជនថ្នាក់វិទ្យាសាស្ត្រសង្គមមានចំនួន ១០៦ ០៤២ នាក់ (ស្រី ៥៦ ៩២៣ នាក់)។
បេក្ខជនត្រូវបានរៀបចំ ចំនួន២៥នាក់ ក្នុងមួយបន្ទប់ ទៅតាមមណ្ឌលសំណេរនីមួយៗ តាមរាជធានី ខេត្ត លើកលែងតែបន្ទប់ចុងក្រោយ និងបន្ទប់ដែលមានបេក្ខជនមកពីវិទ្យាល័យអប់រំពិសេស។
មណ្ឌលសំណេរមានចំនួនសរុប ២៤១ មណ្ឌល ត្រូវជា ៥ ៩២៤ បន្ទប់ ក្នុងនោះថ្នាក់វិទ្យាសាស្ត្រមានចំនួន ៧២ មណ្ឌល ត្រូវជា ១ ៦៥៥ បន្ទប់ និងថ្នាក់វិទ្យាសាស្ត្រសង្គម មានចំនួន ១៦៩ មណ្ឌល ត្រូវជា ៤ ២៦៩ បន្ទប់។ សម្រាប់ការប្រឡងឆ្នាំនេះ មានការចូលរួមដោយគណៈមេប្រយោគ និងគណៈកម្មការនានា ចូលរួមក្នុងដំណើរការប្រឡងសរុបចំនួន ៣១ ២០៣ នាក់។
ក្រសួងអប់រំ យុវជន និងកីឡា គ្រោងនឹងប្រកាសលទ្ធផលប្រឡងនៅថ្ងៃទី២០ ខែកញ្ញា ឆ្នាំ២០២៥ សម្រាប់រាជធានីខេត្ត ទូទាំងប្រទេស ព្រមទាំងមានផ្សាយនៅលើទំព័រហ្វេសប៊ុកផ្លូវការ ក្រសួងអប់រំ យុវជន និងកីឡា៕