(ភ្នំពេញ)៖ ថ្ងៃទី២២ ខែសីហា ២០២៥ កន្លងមកជាថ្ងៃរំលឹកខួប២ឆ្នាំ ទិវាបង្កើតរាជរដ្ឋាភិបាលថ្មីដឹកនាំបន្តវេនដែលមាន សម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តីថ្មី ជំនួសម្តេចអគ្គមហាសេនាបតីតេជោ ហ៊ុន សែន ដែលស្មគ្រចិត្តចុះពីតំណែង។

ជាការគាប់ជួនជាប្រវត្តិសាស្រ្តចំឱកាសនៃខួបពីរឆ្នាំនេះ សម្តេចធិបតី ហ៊ុន ម៉ាណែត ទទួលបានសារកោតសរសើរវាយតម្លៃខ្ពស់ ចេញពីបុគ្គលលដ៏មានឥទ្ធិពលសំខាន់បំផុត នៃប្រទេសមហាអំណាចសហរដ្ឋអាមេរិក គឺលោកប្រធានាធិបតី ដូ ណាល់ ត្រាំ និងប្រមុខរដ្ឋស្តីទីនៃប្រទេសកម្ពុជាគឺសម្តេចតេជោ ហ៊ុន សែន។

ក្នុងសារចុះថ្ងៃទី២០ ខែសីហា ឆ្នាំ២០២៥ លោក ដូណាល់ ត្រាំ បានសរសើរសម្តេចធិបតី ហ៊ុន ម៉ាណែត «I can tell that you are a strong leader who values human life and appreciates peace ( ខ្ញុំសូមអះអាងថា ឯកឧត្តមគឺជាមេដឹកនាំដ៏ខ្លាំងមួយរូប ដែលឱ្យតម្លៃលើជីវិតមនុស្ស និងស្រឡាញ់សន្តិភាព)»។

ចំណែកសម្តេចតេជោ ហ៊ុន សែន បានសរសើរសម្តេចធិបតី តាមរយៈសារផុសជាសាធារណៈនាថ្ងៃទី២៣ ខែសីហា ឆ្នាំ២០២៥ បានសរសេរថា «២ឆ្នាំគ្រប់គ្រាន់និងយល់បានពីការដឹកនាំ និងការគ្រប់គ្រងបានល្អពីសំណាក់ថ្នាក់ដឹកនាំជំនាន់ថ្មីលើគ្រប់វិស័យទាំងនៅក្នុងរាជរដ្ឋាភិបាលទាំងមូល ទាំងនៅគ្រប់ស្ថាប័នថ្នាក់ជាតិ និងថ្នាក់ក្រោមជាតិ»។

តាមរយៈសារកោតសរសើររបស់ឥស្សរជនដ៏ឆ្នើមទាំងពីរនេះកាន់តែបង្ហាញឱ្យឃើញថា ពលិកម្ម និងការខិតខំប្រឹងប្រែងយ៉ាងពេញទំហឹង ទាំងកម្លាំងកាយ ចិត្ត ប្រាជ្ញា ស្មារតី ឆន្ទះដ៏ស្វិតស្វាញ និងមោះមុតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ត្រូវបានទទួលស្គាល់ជាអន្តរជាតិ។ ចំណែកប្រជាជនកម្ពុជាទូទាំងប្រទេសដែលបានស្គាល់ បានមើលឃើញសកម្មភាពដ៏ស្វាហាប់អស្ចារ្យ និងការបូជាគ្រប់យ៉ាងដើម្បីជាតិ សាសនា ព្រះមហាក្សត្រក្នុងរយះពេល៧៣៦ថ្ងៃ ជានាយករដ្ឋមន្រ្តីនៃព្រះរាជាណាចក្រកម្ពុជាកន្លងមកនេះ គឺសម្តេចធិបតី មិនត្រឹមតែជាតារារះដ៏ត្រចះត្រចង់លើវេហាកម្ពុជាប៉ុណ្ណោះទេ តែបានក្លាយជាមេដឹកនាំកំពូលជាតិដ៏ពេញលេញជាទីគោរពស្រឡាញ់ ជាទីទុកចិត្តដ៏រឹងមាំដែលបានឆ្លងកាត់បទពិសោធន៍កំពូលដឹកនាំជាតិក្នុងស្ថានភាពប្រទេសមានសុខសន្តិភាពផង និងមានសង្គ្រាមឈ្លានពានផង។

ហើយរាល់កិច្ចការណា ទោះជាលំបាកយ៉ាងណាក៏ដោយក្នុងរយៈពេល២ឆ្នាំចុងក្រោយនេះ ក៏សម្តេចធិបតីអាចដឹកនាំដោះស្រាយបានប្រកបដោយជោគជ័យ មានប្រសិទ្ធភាពខ្ពស់ហួសការរំពឹងទុក ជាពិសេសរយះពេលចុងក្រោយនេះដូចជាការចរចារពន្ធបដិការដ៏ទាន់ពេលជាមួយសហរដ្ឋអាមេរិក ពី៤៩% ចុះមក១៩% ការចរចារការទូតដើម្បីសម្រេចបទឈប់បាញ់គ្នា ការតស៊ូយោធាប្រដាប់អាវុធការពារទឹកដីប្រឆាំងសត្រូវឈ្លានពាន ការដោះស្រាយការងារជូនពលករចំណាកស្រុកវិលមកពីប្រទេសថៃចំនួនជិត១លាននាក់ ការដោះស្រាយជីវភាពជនភាសសឹករាប់សិបម៉ឺននាក់ ដោះស្រាយគោលនយោបាយចំពោះយុទ្ធជនពលី របួស។ល។

និយាយដោយត្រង់ នៅពេលសម្តេចធិបតីជាប់ឆ្នោតជានាយករដ្ឋមន្រ្តី មានមតិមហាជនមួយចំនួននៅមានការកង្វល់ថា តើសម្តេចធិបតីអាចស្នងតំណែងប្រមុខនីតិប្រតិបត្តិពី សម្តេចអគ្គមហាសេនាបតីតេជោ ហ៊ុន សែន បិតាសន្តិភាព និងអភិវឌ្ឍន៍ជាតិបានជោគជ័យដែរឬទេ?
ចម្លើយនាពេលនេះគឺទទួលជោគជ័យហួសការរំពឹងទុកទៅទៀត ដោយមានភស្តុតាងច្បាស់បំផុតគឺសារកោតសរសើរចេញពីលោក ដូណាល់ត្រាំ និងសម្តេចតេជោ ហ៊ុនសែន៕