(ភ្នំពេញ)៖ លោក ឃួង ស្រេង សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជារាជធានីភ្នំពេញ នាល្ងាចថ្ងៃទី២៨ ខែសីហា ឆ្នាំ២០២៥នេះ បានអញ្ជើញចុះជួបសំណេះសំណាលជាមួយសមាជិក សមាជិកា គណៈកម្មាធិការគណបក្សសង្កាត់ជ័យជំនះ ខណ្ឌដូនពេញ នៅទីស្នាក់ការគណបក្សប្រជាជនកម្ពុជា ខណ្ឌដូនពេញ។

នាឱកាសនោះ លោក ឃួង ស្រេង បានលើកឡើងថា វិស័យទេសចរណ៍ ជាឧស្សាហ៍កម្មគ្មានផ្សែង ហើយរដ្ឋទទួលបានថវិកាជាច្រើនពីវិស័យនេះ ដូច្នេះយើងត្រូវរួមគ្នាធ្វើយ៉ាងណាបង្កើតឱ្យមានតំបន់ទេសចរណ៍ឱ្យបានច្រើន ខណៈដែលផ្លូវថ្មើរជើងចតុមុខ ទទួលបានការពេញនិយមយ៉ាងខ្លាំងពីភ្ញៀវទេសចរជាតិ និងបរទេស មកដើរលេងកំសាន្តច្រើនកុះករ រហូតធ្វើឱ្យរាជធានីភ្នំពេញ ជាប់ចំណាត់ថ្នាក់លេខ២ លើពិភពលោក ឈ្មោះថា ជាទីក្រុងប្រជុំដោយភាពរីករាយនៅពេលរាត្រី។

លោក ឃួង ស្រេង បានបញ្ជាក់ថា ការពេញនិយមខ្លាំងពីណាក់ភ្ញៀវទេសចរជាតិ និងបរទេស មកដើរលេងកំសាន្តច្រើនកុះករនៅផ្លូវថ្មើរជើងចតុមុខដោយសារផ្លូវថ្មើរជើងចតុមុខ មិនមានយានយន្តឆ្លងកាត់ ជាកន្លែងដើរលេងកំសាន្តផង ជាកន្លែងសំរាប់ដើរហាត់ប្រាណ ដែលមានប្រវែងជាង ២គីឡូម៉ែត្រផង ហើយក៏ជាកន្លែងដែលបណ្តុំទៅដោយការសម្ដែងសិល្បៈប្រពៃណីខ្មែរ សៀករហ័សកម្ម បណ្ណាល័យចល័ត ជាមួយនិងការលក់គ្រឿងហូបចុកច្រើនសំបូរបែបផងដែរ។

ពាក់ព័ន្ធនឹងផ្លូវថ្មើជើងនេះដែរ លោក ឃួង ស្រេង ក៏បានណែនាំឱ្យអាជ្ញាធរខណ្ឌដូនពេញ សូមពិនិត្យមើលលើបញ្ហាសណ្តាប់ធ្នាប់ឱ្យបានម៉ត់ចត់ ចំពោះបារបារាំង ធ្វើយ៉ាងណាកុំឱ្យហៀរមកលើផ្លូវថ្មើរជើងចតុមុខ។ ការសម្តែងសិល្បៈ ដាច់ខាតមិនឱ្យស្លៀកពាក់លេចលើ លេចក្រោម ធ្វើឱ្យខូចប្រពៃណីខ្មែរឡើយ។ ជាងនេះទៅទៀត អាជ្ញាធរក៏ត្រូវពិនិត្យឱ្យបានម៉ត់ចត់ផងដែរ ចំពោះទីតាំងផ្ញើកង់ ម៉ូតូ កុំឱ្យយកតម្លៃផ្ញើថ្លៃហួសហេតុពេក ហើយក៏មិនត្រូវចតបិទផ្លូវនាំឱ្យស្ទះ ដោយទុកផ្លូវកាត់ទទឹងទាំងអស់ ឱ្យរថយន្តចូលទៅសង្គ្រោះ នៅពេលមានហានិភ័យអ្វីមួយកើតឡើង នៅលើផ្លូវថ្មើរជើងចតុមុខនេះ។

លោក ឃួង ស្រេង ក្នុងឱកាសនោះដែរក៏បានថ្លែងនូវការកោតសរសើរ និងវាយតម្លៃខ្ពស់ ចំពោះលទ្ធផលស្នាដៃរបស់គណៈកម្មាធិការគណបក្សសង្កាត់ជ័យជំនះ ដែលបានរួមចំណែក ធ្វើឱ្យគណបក្សទទួលបាននូវជ័យជម្នះ ក្នុងការបោះឆ្នោតយ៉ាងភ្លូកទឹកភ្លូកដី ជាប្រវត្តិសាស្ត្រ។

លោក ឃួង ស្រេង បានគូសបញ្ជាក់ទៀតថា ការជួបជុំគ្នានេះ គឺដើម្បីពិភាក្សា ពិគ្រោះយោបល់រកចំណុចខ្លាំង ចំណុចខ្សោយ ធ្វើយ៉ាងណាឱ្យគណបក្សប្រជាជនកម្ពុជា សម្រេចបានមហិច្ចតារបស់គណបក្ស គឺដឹកនាំប្រទេសជារៀងរហូត។

ក្នុងឱកាសនោះដែរ លោកប្រធានគណៈកម្មាធិការគណបក្ស សង្កាត់ជ័យជំនះ បានមានលើកឡើងពីវឌ្ឍនភាពកាេងារនៅក្នុងសង្កាត់ ដែលមានចំនួន ១១ភូមិ។ គណៈបញ្ជាការឯកភាពសង្កាត់ជ័យជំនះ បានរៀបចំសណ្តាប់ធ្នាប់ជាប្រចាំ ចុះពិនិត្យ ល្បាត ការពារសន្តិសុខ សុវត្ថិភាពជូនប្រជាពលរដ្ឋ។ ប្រធានភូមិទាំង១១ បានចុះតាមមូលដ្ឋាន ដើម្បីពិនិត្យទប់ស្កាត់ល្បែងតាមអនឡាញ។ សមាជិកបក្សមានសាមគ្គីភាពផ្ទៃក្នុងបក្សល្អ ។

ប្រជាពលរដ្ឋបានគាំទ្រពេញទំហឹង ចំពោះការដឹកនាំរបស់សម្តេចធិបតី ហ៊ុន ម៉ាណែត ជានាយករដ្ឋមន្ត្រី បន្តពីសម្តេច តេជោ ហ៊ុន សែន អតីតនាយករដ្ឋមន្ត្រី ក្នុងកិច្ចការការពារបូរណភាពទឹកដី ពីចោរសៀមឈ្លានពាន ដោយការប្តឹងទៅតុលាការអន្តរជាតិ ICJ៕