(ភ្នំពេញ)៖ លោក ស៊ាង ថៃ រដ្ឋលេខាធិការក្រសួងពាណិជ្ជកម្ម បានថ្លែងបញ្ជាក់ថា វេទិកាជំរុញពាណិជ្ជកម្មកម្ពុជា-វៀតណាម ពិតជាមានតម្លៃ និងជាឱកាសដ៏សំខាន់ដែលអនុញ្ញាតឲ្យភាគីទាំង២ កម្ពុជា វៀតណាម បានរួមគ្នាដោះស្រាយបញ្ហាប្រឈម និងលើកកម្ពស់កិច្ចសហការក្នុងវិស័យយុទ្ធសាស្ត្រនានាឱ្យបានកាន់តែល្អប្រសើរ ជាពិសេសលើវិស័យកសិកម្ម, កសិ-ឧស្សាហកម្ម, ភស្តុភារកម្ម និងការអភិវឌ្ឍខ្សែច្រវាក់ផ្គត់ផ្គង់។

លោក ស៊ាង ថៃ បញ្ជាក់ទៀតថា បរិយាបទពិភពលោកបច្ចុប្បន្ន តម្រូវឲ្យយើងធ្វើការរួមគ្នា ដើម្បីកសាងបណ្តាញពាណិជ្ជកម្មឆ្លងដែន ប្រកបដោយប្រសិទ្ធភាព កែលម្អហេដ្ឋារចនាសម្ព័ន្ធដឹកជញ្ជូន និងបង្កើនតម្លៃបន្ថែមនៃផលិតកម្មកសិកម្ម ហើយកិច្ចខិតខំប្រឹងប្រែងទាំងនេះ ពិតជាមានសារៈសំខាន់សម្រាប់កំណើនសេដ្ឋកិច្ច និងលើកកម្ពស់សុខុមាល ភាពរបស់ប្រជាជន។

លោក ស៊ាង ថៃ បានបញ្ជាក់ដូចនេះ នារសៀលថ្ងៃទី២៨ ខែសីហា ឆ្នាំ២០២៥នេះ នាឱកាសដែលលោកតំណាងលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម អញ្ជើញជាអធិបតី ក្នុងពិធីបើក «កម្មវិធីជំរុញពាណិជ្ជកម្មកម្ពុជា-វៀតណាម» និងដោយមានការចូលរួមពីលោក Bui Quang Hung អគ្គនាយករងនៃទីភ្នាក់ងារជំរុញពាណិជ្ជកម្មវៀតណាម លោកស្រី Nguyen Duy Linh Thao អគ្គនាយករងនៃមន្ទីរឧស្សាហកម្ម និងពាណិជ្ជកម្ម ខេត្តអានយ៉ាង ប្រទេសវៀតណាម, លោក Do Viet Phuong ប្រធានការិយាល័យពាណិជ្ជកម្មវៀតណាមប្រចាំកម្ពុជា លោក ហោ ដារ៉េត អនុព័ន្ធពាណិជ្ជកម្មកម្ពុជាប្រចាំសាធារណរដ្ឋសង្គមនិយមវៀតណាម រួមទាំងលោក លោកស្រី មកពីស្ថាប័នរដ្ឋ និងវិស័យឯកជន នៃប្រទេសទាំងពីរជាច្រើនរូបទៀត។

លោក ស៊ាង ថៃ បានបន្ថែមថា ក្នុងគោលដៅសម្រេចឲ្យបាននូវសមិទ្ធិផលសមប្រកបជូនវិស័យឯកជន ជាពិសេសបណ្តាក្រុមហ៊ុន និងផលិតករ ដែលមានតម្រូវការនាំចេញទំនិញទៅទីផ្សារដែលមានស្រាប់ និងទីផ្សារសក្តានុពលនៅក្រៅប្រទេស លោកស្រីរដ្ឋមន្ត្រីក្រសួងពាណិជ្ជកម្ម និងថ្នាក់ដឹកនាំក្រសួងពាណិជ្ជកម្ម បានយកចិត្តទុកដាក់ ណែនាំចង្អុលបង្ហាញឱ្យផលិតករកម្ពុជា ខិតខំផលិតទំនិញដែលប្រកបដោយគុណភាព ធានាសុវត្ថិភាព មានស្តង់ដារខ្ពស់ ការវេចខ្ចប់បានត្រឹមត្រូវ និងតម្លៃសមរម្យ សំដៅលើកកំពស់សមត្ថភាពប្រកួតប្រជែង ជំរុញការនាំចេញទំនិញទៅកាន់ទីផ្សារក្រៅប្រទេសឱ្យបានកាន់តែច្រើន។

ក្រសួងពាណិជ្ជកម្ម ដែលមានអគ្គនាយកដ្ឋានជំរុញពាណិជ្ជកម្មជាសេនាធិការ មានតួនាទី និងភារ កិច្ច ស្វែងរកទីផ្សារ លើកកម្ពស់ផលិតផលជាតិ ជំរុញការនាំចេញផលិតផល និងសេវាកម្ម។ ជាក់ស្តែងកាលពីពេលកន្លងទៅ និងពេលបច្ចុប្បន្ន អគ្គនាយកដ្ឋានជំរុញពាណិជ្ជកម្មបាន និងកំពុងបំពេញកិច្ចការជាច្រើន សំដៅពង្រីកទីផ្សារក្នុង និងក្រៅប្រទេស តាមរយៈការរៀបចំសិក្ខាសាលាស្តីពីការផ្សព្វផ្សាយពី តម្រូវការនាំចូលផលិតផលរបស់ប្រទេសជាដៃគូ, សិក្ខាសាលាស្តីពីការលើកកម្ពស់ផលិតផលខ្មែរ រួមទាំងមានសិក្ខាសាលាជាច្រើនទៀតផងដែរ។

ជាក់ស្តែងកម្មវិធីជំរុញពាណិជ្ជកម្មកម្ពុជា-វៀតណាម គឺជាព្រឹត្តិការណ៍ដ៏សំខាន់សម្រាប់សហគ្រិន ពាណិជ្ជករ អាជីវករ និងធុរជន កម្ពុជា-វៀតណាម មានឱកាសបានសិក្សាស្វែងយល់, ចែករំលែកគំនិត, បង្កើតភាពជាដៃគូពាណិជ្ជកម្មរវាងពាណិជ្ជករនៃប្រទេសទាំងពីរ, ធ្វើការយ៉ាងជិតស្និទ្ធជាមួយគ្នា ដើម្បីសម្រួលកិច្ចសហប្រតិបត្តិការឲ្យដំណើរការបានដោយរលូន និងជោគជ័យផងដែរ។

ជាមួយគ្នានោះ ក្នុងនាមលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម លោក ស៊ាង ថៃ បានលើកទឹកចិត្តដល់អ្នកចូលរួមទាំងអស់ខិតខំស្តាប់នូវបទបង្ហាញរបស់វាគ្មិនកិត្តិយស ព្រមទាំងស្វែងយល់ពីតម្រូវការទីផ្សារ និងអភិវឌ្ឍផលិតផលរបស់ខ្លួន ឱ្យឆ្លើយតបទៅនឹងតម្រូវការទីផ្សារ ជាក់ស្តែង ប្រកបដោយប្រសិទ្ធភាពខ្ពស់ផងដែរ៕