(សៀមរាប)៖ លោក អ៉ិន ចន្ថា រដ្ឋលេខាធិការតំណាងលោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី២៨ ខែសីហា ឆ្នាំ២០២៥នេះ បានដឹកនាំក្រុមការងារចុះត្រួតពិនិត្យ វាយតម្លៃលើការងារសាងសង់ផ្លូវមួយខ្សែដែលទើបសាងសង់រួច និងវាយតម្លៃបញ្ចប់សុពលភាព សម្រាប់ការងារស្ថាបនាផ្លូវក្រាលដីល្បាយក្រួស និងសាងសង់លូគ្រប់ប្រភេទ ស្ថិតនៅខេត្តសៀមរាប។

ផ្លូវទាំងពីរខ្សែនេះរួមមាន៖ គម្រោងទី១៖ ការងារជួសជុលស្តារឡើងវិញផ្លូវក្រាលដីល្បាយក្រួសចំនួន ១ខ្សែ ប្រវែងជាង ៥គីឡូម៉ែត្រ ទទឹង ៨ម៉ែត្រ ស្ថាបនាលូប្រអប់មុខពីរចំនួន ១កន្លែង លូប្រអប់មុខមួយចំនួន ២កន្លែង លូមូលមុខពីរចំនួន ២កន្លែង លូមូលមុខមួយចំនួន ៥កន្លែង និងផ្លាកឈ្មោះផ្លូវចំនួន ២កន្លែង ស្ថិតនៅភូមិតាគួយ ទៅភូមិដូនមៀវ ឃុំគោល ស្រុកអង្គរជុំ ខេត្តសៀមរាប។

គម្រោងទី២៖ ការងារស្ថាបនាផ្លូវក្រាលដីល្បាយក្រួសចំនួន ១ខ្សែ មាន ៣កំណាត់ ប្រវែងសរុប ៨គីឡូម៉ែត្រ ទទឹង ៨ម៉ែត្រ សាងសង់លូប្រអប់មុខពីរចំនួន ២កន្លែង លូប្រអប់មុខមួយចំនួន២កន្លែង លូមូលមុខមួយចំនួន ៦កន្លែង និងផ្លាកឈ្មោះផ្លូវចំនួន ១កន្លែង ស្ថិតនៅភូមិរើល ភូមិព្រៃខ្យង ភូមិគោកចំបក់ ឃុំក្រូចគរ ស្រុកក្រឡាញ់ និងភូមិព្រៃអារ ឃុំគោល ស្រុកអង្គរជុំ ខេត្តសៀមរាប (បញ្ចប់សុពលភាព) ។ គម្រោងទាំងពីរនេះអនុវត្តដោយវិស្វកម្មសម្ដេចតេជោខេត្តសៀមរាប (ឯកឧត្តម សៀង ណាំ)។

នាឱកាសនោះលោក អ៉ិន ចន្ថា បានឱ្យដឹងថា ក្រសួងអភិវឌ្ឍន៍ជនបទបាន កំពុងបន្តបេសកម្មរបស់ខ្លួនប្រកបដោយការយកចិត្តទុកដាក់ខ្ពស់ ជំរុញការស្ថាបនា ការស្តារ និងការថែទាំ ព្រោះផ្លូវមានសារៈសំខាន់ណាស់ ក្រៅពីការធ្វើដំណើរ ផ្លូវគឺជាសរសៃឈាមនៃសេដ្ឋកិច្ចបម្រើដល់ការដឹកជញ្ជូនកសិផលទៅកាន់ទីផ្សារ, ឧស្សាហកម្ម រោងចក្រ និងសហគ្រាសនានា និងបានសម្រួលដល់ការធ្វើដំណើរ និងការប្រកបមុខរបរផ្សេងៗរបស់ប្រជាពលរដ្ឋនៅមូលដ្ឋានផងដែរ។

លោករដ្ឋលេខាធិការ ក៏បានកោតសរសើរ និងវាយតម្លៃខ្ពស់ដល់វិស្វកម្មសម្ដេចតេជោ ខេត្តសៀមរាប ដែលបានរក្សាគុណភាពផ្លូវល្អប្រសើរ សម្រាប់ជាប្រយោជន៍សាធារណជនប្រើប្រាស់ ជាពិសេសគាំទ្រដល់ការរស់នៅរបស់ប្រជាជននៅមូលដ្ឋាន មានផ្លូវល្អសម្រាប់ធ្វើដំណើរ ក៏ដូចជាការកែប្រែនូវលក្ខខណ្ឌរស់នៅ របស់សហគមន៍ជនបទ លើផ្នែកសេដ្ឋកិច្ច និងសង្គម តាមរយៈការលើកកម្ពស់ និងការប្រែក្លាយតំបន់ជនបទ ឱ្យទៅជាតំបន់មានភាព រីកចម្រើន ក្រោមការដឹកនាំដ៏មុតស្រួចរបស់រាជរដ្ឋាភិបាល។

លោក ក៏បានរំលេចនូវពីគុណបំណាច់របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា ដែលសម្តេចបានជំរុញអភិវឌ្ឍសម្រេចនូវសមិទ្ធផលលើគ្រប់វិស័យ ជាក់ស្តែងហេដ្ឋារចនាសម្ព័ន្ធនៅតាមជនបទ បាននិងកំពុងកើតឡើងជាបន្តបន្ទាប់ គាំទ្រដល់ការរស់នៅរបស់ប្រជាជន ដែលនេះបានកើតចេញពីកត្តាសុខសន្តិភាព ស្ថិរភាព នយោបាយក្នុងប្រទេស ដែលបានបង្កលក្ខណៈឱ្យប្រជាជន មានលទ្ធភាពប្រកបរបរចិញ្ចឹមជីវិតតាមប្រក្រតីភាព ហើយក៏ជាមូលដ្ឋាសម្រាប់រាជរដ្ឋាភិបាលបន្តវេន ដែលដឹកនាំដោយសម្តេច មហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាផងដែរ៕