(សៀមរាប)៖ ក្រោយបញ្ចប់សិក្ខាសាលាស្ដីពីឌីជីថលូបនីយកម្មក្នុងរដ្ឋបាលសាធារណៈ សិក្ខាកាមនៃប្រទេសជាសមាជិកអាស៊ាន និងទីម័រឡេស្តេ បានជួបជុំគ្នាចែករំលែកនូវបទពិសោធគ្នាទៅវិញទៅមក អំពីដំណើរការរៀបចំ និងអនុវត្តឌីជីថលូបនីយកម្មក្នុងរដ្ឋបាលសាធារណៈក្នុងបរិបទប្រទេសខ្លួន។ កិច្ចប្រជុំនេះធ្វើឡើងនាថ្ងៃទី២៨ ខែសីហា ឆ្នាំ២០២៥នេះដឹកនាំដោយលោក គង់ សុភី រដ្ឋលេខាធិការក្រសួងមុខងារសាធារណៈ និងជាប្រធានក្រុមការងាររៀបចំសិក្ខាសាលា។

នាឱកាសនោះលោក គង់ សុភី បានថ្លែងអំណរគុណដល់គណៈប្រតិភូនៃប្រទេសសមាជិកអាស៊ាន និងប្រទេសទីម័រឡេស្តេ រួមទាំងលេខាធិការដ្ឋានអាស៊ាន ព្រមទាំងបានលើកឡើងយ៉ាងលម្អិតអំពីតួនាទី និងអត្ថប្រយោជន៍នៃឌីជីថលូបនីយកម្មក្នុងរដ្ឋបាលសាធារណៈ សម្រាប់គ្រប់ប្រទេសទាំងអស់ មិនត្រឹមតែក្នុងក្របខ័ណ្ឌតំបន់ប៉ុណ្ណោះទេ ប៉ុន្តែក្នុងក្របខ័ណ្ឌអន្តរជាតិផងដែរ។

លោក គង់ សុភី បន្ថែមថា សិក្ខាសាលានេះ ដោយមានការសម្របសម្រួលពីលេខាធិការដ្ឋានអាស៊ាន ដោយសិក្ខាកាមបានបង្ហាញពីអារម្មណ៍រីករាយ និងបានថ្លែងអំណរគុណកម្ពុជា ដែលបានធ្វើបដិសណ្ឋារកិច្ចយ៉ាងកក់ក្ដៅ និងរៀបចំសិក្ខាសាលាបានយ៉ាងល្អ ធ្វើឱ្យសិក្ខាកាមគ្រប់រូបបានរៀនសូត្រ យល់ដឹងពីស្ថានភាពផ្សេងៗគ្នា។ ជាពិសេសសិក្ខាកាមនៃប្រទេសនីមួយៗបានរៀនសូត្រពីគ្នាទៅវិញទៅមកនូវបទពិសោធល្អៗ និងបញ្ហាប្រឈមរបស់ប្រទេសនីមួយៗក្នុងដំណើរធ្វើជីថលូបនីយកម្ម តាមរយៈបទបង្ហាញ និងវេទិកាពិភាក្សានិងសំណួរ-ចម្លើយ ក្នុងក្របខ័ណ្ឌប្រទេសសមាជិកអាស៊ាន និងទីម័រឡេស្តេ ព្រមទាំងក្របខ័ណ្ឌប្រទេសអាស៊ានបូកបីរយៈពេល២ថ្ងៃកន្លងទៅ។

សិក្ខាសាលានេះក៏មានការចែករំលែកលម្អិតបន្ថែមអំពីបច្ចុប្បន្នភាព តួនាទីដ៏ចាំបាច់ និងការកំណត់យកវិធីសាស្ត្រក្នុងការធ្វើឌីជីថលូបនីយកម្ម ក្នុងរដ្ឋបាលសាធារណៈរបស់ប្រទេសរៀងៗខ្លួនក្នុងក្របខ័ណ្ឌប្រទេសសមាជិកអាស៊ាន និងប្រទេសទីម័រឡេស្តេ។

លោក គង់ សុភី ក៏បានលើកឡើងនូវមូលដ្ឋានបីចំណុចក្នុងការជំរុញការធ្វើឌីជីថលូបនីយកម្មក្នុងរដ្ឋបាលសាធារណៈ រួមមាន៖ ១) ការផ្ដោតលើមនុស្ស (សំដៅផ្នត់គំនិតសមត្ថភាព) ២) រដ្ឋាភិបាល (សំដៅលើគោលនយោបាយ ច្បាប់ ការកែទម្រង់) ៣) ការប្រើប្រាស់បច្ចេកវិទ្យា (សំដៅលើសម្ភារៈឧបករណ៍ទាន់សម័យកាល)។

សូមបញ្ជាក់ថា នៅរសៀលនេះដែរ គណៈប្រតិភូនៃប្រទេសសមាជិកអាស៊ាន និងប្រទេសទីម័រឡេស្តេ ព្រមទាំងលេខាធិការដ្ឋានអាស៊ាន ក៏បានទៅទស្សនានៅប្រាសាទតាព្រហ្ម ដើម្បីបន្ថែមការឈ្វេងយល់ពីវប្បធម៌ដ៏ឧត្តុង្គឧត្តមរបស់កម្ពុជា ក៏ដូចជាផ្នែកមួយនៃការចូលរួមលើកកម្ពស់វិស័យទេសចរ នៅខេត្តសៀមរាបផងដែរ៕