(ស្ទឹងត្រែង)៖ ថ្លែងនាឱកាសអញ្ជើញជាអធិបតីក្នុងកិច្ចប្រជុំពិនិត្យមើលវឌ្ឍនភាពនៃការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព សម្រាប់ឆមាសទី១ ឆ្នាំ២០២៥ របស់ដ្ឋបាលខេត្តស្ទឹងត្រែង ថ្ងៃទី២៨ ខែសីហា ឆ្នាំ២០២៥នេះ លោក ទូច ណារ៉ុថ រដ្ឋលេខាធិការក្រសួងមហាផ្ទៃ បានណែនាំដល់កងកម្លាំងមានសមត្ថកិច្ចគ្រប់លំដាប់ថ្នាក់ បន្តទប់ស្កាត់បទល្មើសសំខាន់ៗដែលជាកង្វល់របស់ប្រជាពលរដ្ឋ រួមមាន ចោរលួច ចោរប្លន់ ជាដើម។

កិច្ចប្រជុំនេះក៏មានការចូលរួមពីលោក ឈាង ឡាក់ ប្រធានក្រុមប្រឹក្សាខេត្ត និងលោក សរ សុពុត្រា អភិបាលខេត្តស្ទឹងត្រែង រួមទាំងមានអ្នកពាក់ព័ន្ធជាច្រើនរូបទៀត។

លោក ទូច ណារ៉ុថ បានបន្ថែមថា ភាពជោគជ័យនៃការអនុវត្តគោលនយោបាយភូមិ ឃុំ មានសុវត្ថិភាពនេះ ទាមទារឲ្យមានការចូលរួមពីគ្រប់ភាគីពាក់ព័ន្ធទាំងអស់ ទាំងអាជ្ញាធរ កងកម្លាំងមានសមត្ថកិច្ច មន្ទីរ អង្គភាព អាជ្ញាធរមូលដ្ឋាន និងប្រជាពលរដ្ឋផ្ទាល់។

បន្ថែមពីនេះលោក ទូច ណារ៉ុថ បានវាយតម្លៃខ្ពស់ និងកោតសរសើរចំពោះការខិតខំប្រឹងប្រែងរបស់ថ្នាក់ដឹកនាំ និងអាជ្ញាធរខេត្តស្ទឹងត្រែងក្នុងការរក្សាសន្តិសុខ និងចូលរួមអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព នាពេលកន្លងមកផងដែរ។

នាឱកាសនោះ លោក សរ សុពុត្រា បានឱ្យដឹងថា ទោះបីប្រទេសកម្ពុជាកំពុងប្រឈមនឹងការឈ្លានពានពីប្រទេសសៀមក៏ដោយ ក៏ខេត្តស្ទឹងត្រែងនៅតែរក្សាបាននូវសន្តិសុខ និងសណ្តាប់ធ្នាប់ល្អប្រសើរគួរឲ្យកត់សម្គាល់ កងកម្លាំងសមត្ថកិច្ចគ្រប់លំដាប់ថ្នាក់បានសហការគ្នាយ៉ាងសកម្ម ដើម្បីបង្កើនការល្បាត និងដាក់វេនយាមប្រចាំការក្នុងការទប់ស្កាត់បទល្មើសនានា។

លោកអភិបាលខេត្ត បានបន្ថែមថា អាជ្ញាធរខេត្តបានបង្ក្រាបបទល្មើសគ្រឿងញៀនជាបន្តបន្ទាប់ ហើយថ្មីៗនេះក៏បានបំបែកករណីជំរិតទារប្រាក់តាមរយៈបណ្ដាញសង្គមហ្វេសប៊ុក ដែលកើតឡើងនៅក្នុងពន្ធនាគារខេត្តទៀតផង៕