(ភ្នំពេញ)៖ តបតាមការអញ្ជើញរបស់សម្តេចតេជោ ហ៊ុន សែន ប្រធានគណបក្ស​ប្រជា​ជន​កម្ពុជា, លោក អ៊ូ ឃីន យី (U Khin Yi) ប្រធានគណបក្សសហភាពសាមគ្គី និងអភិវឌ្ឍន៍ នៃប្រទេសមីយ៉ាន់ម៉ា បានអញ្ជើញបំពេញទស្សនកិច្ច​ការងារ​នៅកម្ពុជា ចាប់ពីថ្ងៃទី២៧ ដល់ថ្ងៃទី២៩ ខែសីហា ឆ្នាំ២០២៥។

ក្នុងដំណើរទស្សនកិច្ចនេះ គណៈប្រតិភូ បានជួបប្រជុំទ្វេភាគីជាមួយ​សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងបានជួបសម្តែងការគួរសមចំពោះ​សម្តេច​មហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជានាយករដ្ឋមន្ត្រីកម្ពុជា ព្រមទាំងបានទស្សនកិច្ចនៅវិមានឈ្នះ-ឈ្នះ ដើម្បី​ស្វែង​យល់អំពីដំណើរការកសាង និងថែរក្សាសន្តិភាព និងគោលនយោបាយ ឈ្នះ-ឈ្នះ​របស់កម្ពុជា។

គណបក្សប្រជាជនកម្ពុជា បានឱ្យដឹងថា ក្នុងជំនួបទ្វេភាគី សម្តេចតេជោ ហ៊ុន សែន បានជម្រាបគណៈប្រតិភូអំពីប្រវត្តិស្នាដៃ និងសមិទ្ធផលធំៗរបស់គណបក្ស​ប្រជាជន​កម្ពុជា តាំងពីដំណាក់កាលរំដោះជាតិ ការកសាងនិងការការពារជាតិ ក៏ដូចជាការស្វែង​រកសន្តិភាព និងការអភិវឌ្ឍលើគ្រប់វិស័យរហូតដល់ពេលបច្ចុប្បន្ន។

ក្នុងជំនួបទ្វេភាគីនោះ ភាគីទាំងពីរក៏បានជម្រាបជូនគ្នាទៅវិញទៅមកអំពីសភាព​ការណ៍​របស់គណបក្ស និងប្រទេសនីមួយៗ និងបានផ្លាស់ប្ដូរយោបល់អំពីស្ថានភាព​តំបន់ និងពិភពលោក ព្រមទាំងបានឯកភាពគ្នាដាក់ចេញនូវទិសដៅកិច្ចសហប្រតិ​បត្តិ​ការ​រវាងគណបក្សទាំងពីរសម្រាប់ពេលអនាគត។

គណបក្សទាំងពីរបានចុះហត្ថលេខាលើអនុស្សរណៈនៃការយោគយល់គ្នា សំដៅជំរុញ​កិច្ចសហប្រតិបត្តិការ អន្តរគណបក្សនយោបាយ និងភាពជាដៃគូ តាមរយៈការផ្លាស់​ប្ដូរ​បទ​ពិសោធន៍គ្នាទៅវិញទៅមកដោយ ផ្អែកលើគោលការណ៍សមភាព ការគោរព និងការជឿទុកចិត្តគ្នាទៅវិញទៅមក។

គណបក្សប្រជាជនកម្ពុជា បានគូសរំលេចថា ដំណើរទស្សនកិច្ចនាពេលនេះធ្វើឡើង​ស្រប​​ពេលដែល​ប្រទេសទាំងពីរបាននិងកំពុងអបអរសាទរខួបអនុស្សាវរីយ៍​លើក​ទី៧០ឆ្នាំ នៃទំនាក់ទំនងការទូត ដែលនឹងរួមចំណែកយ៉ាងសកម្មក្នុងការបន្ថែម សន្ទុះថ្មីដល់ការពង្រឹងពង្រីកចំណងមិត្តភាព សាមគ្គីភាព និងកិច្ចសហប្រតិ​បត្តិការ​រវាងគណបក្ស និងប្រជាជននៃប្រទេសទាំងពីរ ក៏ដូចជាកិច្ចសហប្រតិបត្តិការ​អនុ​តំបន់​ទន្លេមេគង្គ និងអាស៊ានផងដែរ។

បើតាមគណបក្សប្រជាជនកម្ពុជា នៅក្នុងកិច្ចប្រជុំទ្វេភាគី លោក អ៊ូ ឃីន យី ប្រធាន​គណបក្សសហភាពសាមគ្គី និងអភិវឌ្ឍន៍របស់មីយ៉ាន់ម៉ា បានអញ្ជើញសម្តេចតេជោបំពេញទស្សនកិច្ចនៅមីយ៉ាន់ម៉ា។ សម្តេចតេជោ ហ៊ុន សែន បានទទួលយកការអញ្ជើញ និងត្រៀមទស្សនកិច្ចនៅប្រទេសមីយ៉ាន់ម៉ា​តាមពេលវេលាសមស្រប៕