(ព្រះសីហនុ)៖ ដើម្បីអបអរសាទរខួបលើកទី៧៥ ឆ្នាំនៃទំនាក់ទំនងការទូតរវាងសហរដ្ឋអាម៉េរិក និងកម្ពុជា នៅព្រឹកថ្ងៃទី២៨ ខែសីហា ឆ្នាំ២០២៥ លោក ម៉ាង ស៊ីណេត អភិបាលខេត្តព្រះសីហនុ និងលោកស្រី ប្រ៊ីដហ្គេត អិល វ៉កឃើ (Bridgette L.Walker) ភារធារីស្តីទីនៃស្ថានទូតសហរដ្ឋអាមេរិកប្រចាំកម្ពុជា បានអញ្ជើញលើកស្លាកអបអរសាទរខួប ៧៥ឆ្នាំនៃមិត្តភាពកម្ពុជា-សហរដ្ឋអាមេរិក នៅផ្លូវជាតិលេខ៤ ជិតច្រកចេញ-ចូលផ្លូវល្បឿនលឿន ខេត្តព្រះសីហនុ។

កម្មវិធីនេះបានធ្វើឡើងដើម្បីសម្តែងការគោរពចំពោះគុណតម្លៃ និងចក្ខុវិស័យរួមដែលបានកំណត់ភាពជាដៃគូយូរអង្វែង រវាងអាម៉េរិក និងកម្ពុជា ចាប់តាំងពីឆ្នាំ ១៩៥០មកម្លេះ ហើយសហរដ្ឋអាមេរិកមានមោទនភាពដែលបានឧបត្ថម្ភការសាងសង់ផ្លូវមិត្តភាពខ្មែរ-អាមេរិក (ផ្លូវជាតិលេខ៤) និងជានិមិត្តរូបនៃមិត្តភាព និងភាពជាដៃគូចីរកាល។

ការរៀបចំពិធីលើស្លាកនេះដែរក៏ចំពេលដែលលោកស្រីភារធារីនៃទូតស្ថានទូត Bridgette Walker អញ្ជើញទៅបំពេញទស្សនកិច្ចការងារ នៅខេត្តព្រះសីហនុ ចាប់ពីថ្ងៃទី ២៦ ដល់ ៣០ ខែសីហា ដើម្បីអបអរសាទរខួបលើកទី ៧៥ ឆ្នាំនៃទំនាក់ទំនងការទូតរវាងសហរដ្ឋអាម៉េរិក និងកម្ពុជា។ កម្មវិធីនេះដើម្បីសម្តែងការគោរពចំពោះគុណតម្លៃ និងចក្ខុវិស័យរួម ដែលបានកំណត់ភាពជាដៃគូយូរអង្វែង រវាងអាម៉េរិក និងកម្ពុជា ចាប់តាំងពីឆ្នាំ ១៩៥០មក។

ក្នុងឱកាសនេះលោកស្រីភារធារី និងមន្រ្តីស្ថានទូតតំណាងឱ្យទីភ្នាក់ងារនានារបស់រដ្ឋាភិបាលអាម៉េរិកចំនួន៦រូប ជួបជាមួយ លោក ម៉ាង ស៊ីណេត ដើម្បីពង្រឹងទំនាក់ទំនងទ្វេភាគី និងពង្រឹងបន្ថែម នូវទំនាក់ទំនងសេដ្ឋកិច្ច។ ភាគីទាំងពីរ ថែមទាំងបានបើកសម្ពោធស្លាក អបអរសាទរខួបលើកទី ៧៥ឆ្នាំ នៅលើផ្លូវជាតិលេខ៤ ជាផ្លូវសំខាន់មួយដែលសហរដ្ឋអាមេរិកបានកសាងនៅឆ្នាំ ១៩៥៩ ដើម្បីតភ្ជាប់កំពង់ផែក្រុងព្រះសីហនុ ទៅកាន់តំបន់ផ្សេងទៀតនៃប្រទេសកម្ពុជា។

លោកស្រីភារធារី Walker បានចាត់ទុកព្រឹត្តិការណ៍ដ៏សំខាន់នេះ បង្ហាញពីភាពរឹងមាំនៃទំនាក់ទំនងរវាងអាម៉េរិក និងកម្ពុជា និងការប្តេជ្ញារួមគ្នា ក្នុងការកសាងអនាគតដ៏ភ្លឺស្វាងជាមួយគ្នា។ សប្តាហ៍ស្ថានទូតនៅខេត្តព្រះសីហនុ បង្ហាញពីការប្តេជ្ញាក្នុងការលើកស្ទួយទំនាក់ទំនងដ៏មានន័យនៅទូទាំងកម្ពុជា ហើយបង្កើតឱកាសដែលមានប្រយោជន៍សម្រាប់ប្រទេសទាំងពីរ។

គួរបញ្ជាក់ថា សកម្មភាពសំខាន់ៗនៃកម្មវិធី «សប្តាហ៍ស្ថានទូត ខេត្តព្រះសីហនុ ២០២៥ ៖ ៧៥ ឆ្នាំនៃភាពជាដៃគូ និងមិត្តភាព» រួមមានការពង្រឹងភាពជាដៃគូផ្នែកសេដ្ឋកិច្ច និង កាលានុវត្តភាពផ្នែកធុរកិច្ច និងការតភ្ជាប់ទំនាក់ទំនងគ្នារវាងអ្នកដឹកនាំធុរកិច្ចអាម៉េរិក និងកម្ពុជា ដើម្បីលើកកម្ពស់សុវត្ថិភាព សន្តិសុខ និង សហប្រតិបត្តិការផ្នែកសុខភាព មន្រ្តីស្ថានទូតបានផ្តល់ការបណ្តុះបណ្តាលលើកកម្ពស់សមត្ថភាពដល់មន្ត្រីមានសមត្ថកិច្ច សន្តិសុខនៅខេត្តព្រះសីហនុ និង បានចុះពិនិត្យមន្ទីរពេទ្យព្យាបាលជំងឺអេដស៍ ដែលទទួលបានការជួយគាំទ្រថវិកាពីអាម៉េរិក៕