(ភ្នំពេញ)៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃកម្ពុជា បានផ្ញើសាលិខិតចូលរួមអបអរសាទរយ៉ាងកក់ក្តៅបំផុតជូនចំពោះលោកបណ្ឌិត តាន់ ស្រ៊ី ដាតូ ចូហារី ប៊ីន អាប់ឌុល ប្រធានរដ្ឋសភានៃប្រទេសម៉ាឡេស៊ី ក្នុងឱកាសដ៏មហោឡារិកនៃការប្រារព្ធខួបអនុស្សាវរីយ៍លើកទី៦៨ ទិវាបុណ្យឯករាជ្យជាតិនៃប្រទេសម៉ាឡេស៊ី។

នៅក្នុងសារលិខិតរបស់សម្តេចមហារដ្ឋសភាធិការធិបតី ឃួន សុដារី មានខ្លឹមសារដូចនេះថា៖ តាងនាមរដ្ឋសភានៃព្រះរាជាណាចក្រកម្ពុជា និងក្នុងនាមរូបខ្ញុំផ្ទាល់ ខ្ញុំសូមចូលរួមអបអរសាទរយ៉ាងកក់ក្តៅបំផុតជូនចំពោះ ឯកឧត្តមបណ្ឌិតប្រធានរដ្ឋសភា និងសហការី ព្រមទាំងប្រជាជនម៉ាឡេស៊ី ក្នុងឱកាសដ៏មហោឡារិកនៃការប្រារព្ធខួបអនុស្សាវរីយ៍លើកទី៦៨ ទិវាបុណ្យឯករាជ្យជាតិនៃប្រទេសម៉ាឡេស៊ី។ យើងខ្ញុំសូមប្រសិទ្ធពរជ័យជូនចំពោះ រដ្ឋសភា រដ្ឋាភិបាល និងប្រជាជនម៉ាឡេស៊ី សូមទទួលបានជោគជ័យគ្រប់ភារកិច្ច ដ៏ឧត្តុង្គឧត្តម និងវិបុលភាពដ៏ត្រចះត្រចង់នាពេលអនាគត ជាពិសេសតួនាទីឈានមុខក្នុងតំបន់ និងលើឆាក អន្តរជាតិរបស់ឯកឧត្តមបណ្ឌិតប្រធានរដ្ឋសភា។

ខ្ញុំមានសេចក្តីរីករាយពេញចិត្តជាអនេក ដែលបានសង្កេតឃើញថា ចំណងមិត្តភាពដ៏យូរអង្វែង និងកិច្ចសហប្រតិបត្តិការគ្រប់ជ្រុងជ្រោយរវាងស្ថាប័ននីតិប្បញ្ញត្តិ និងប្រទេសយើងទាំងពីរ បានចាក់ឫសយ៉ាងជ្រៅប្រកបដោយភាពរឹងមាំនារយៈពេលជាច្រើនឆ្នាំកន្លងមកនេះ។ ខ្ញុំមានជំនឿចិត្តថាទំនាក់ទំនងដែលមានស្រាប់ទាំងនេះ នឹងបន្តរីកចម្រើនលូតលាស់ ដើម្បីផ្តល់ផលប្រយោជន៍ដល់ប្រជាជនយើងទាំងពីរ។

ឆ្លៀតក្នុងឱកាសនេះ ខ្ញុំសូមថ្លែងអំណរគុណយ៉ាងជ្រាលជ្រៅចំពោះប្រទេសម៉ាឡេស៊ី ក្រោមការដឹកនាំដ៏ឈ្លាសវៃរបស់ឯកឧត្តមនាយករដ្ឋមន្ត្រី អាន់វ៉ារ អីប្រាហ៊ីម និងក្នុងនាមឯកឧត្តមជាប្រធានអាស៊ាន ដែលមានតួនាទីមិនអាចខ្វះបាន និងការខិតខំប្រឹងប្រែងឥតឈប់ឈរដើម្បីសម្រេចបាននូវបទឈប់បាញ់ក្នុងជម្លោះព្រំដែនរវាងប្រទេសកម្ពុជា និងប្រទេសថៃ ដើម្បីជាបុព្វហេតុសន្តិភាពយូរអង្វែង មិនត្រឹមតែសម្រាប់ប្រទេស ជិតខាងទាំងពីរប៉ុណ្ណោះទេ ថែមទាំងសម្រាប់តំបន់ទាំងមូលផងដែរ។

ប្រទេសកម្ពុជា នៅតែបន្តប្តេជ្ញាចិត្តយ៉ាងមុតមាំក្នុងការដោះស្រាយបញ្ហាជម្លោះព្រំដែនជាមួយប្រទេសថៃ តាមរយៈមធ្យោបាយសន្តិភាព និងសុច្ឆន្ទៈ ដោយប្រកាន់ខ្ជាប់យ៉ាងម៉ឺងម៉ាត់នូវធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងច្បាប់អន្តរជាតិ ដើម្បីឈានទៅរកសន្តិភាពជាអចិន្ត្រៃយ៍សម្រាប់ប្រទេស និងប្រជាជនទាំងសងខាង។

សូមឯកឧត្តមបណ្ឌិតប្រធានរដ្ឋសភា ទទួលនូវការគោរពរាប់អានដ៏ជ្រាលជ្រៅ និងសូមជូនពរ ឯកឧត្តមបណ្ឌិតប្រធានរដ្ឋសភា ទទួលបាននូវសុខភាពល្អបរិបូរណ៍ និងជោគជ័យគ្រប់ភារកិច្ចដ៏ឧត្តុង្គឧត្តម ក៏ដូចជា វឌ្ឍនភាព និងវិបុលភាព មានដល់ប្រទេស និងប្រជាជនម៉ាឡេស៊ីទាំងមូល៕