(ព្រះសីហនុ)៖ លោកស្រី Bridgette L Walker ភារ:ធារី នៃស្ថានទូតសហរដ្ឋអាមេរិកប្រចាំកម្ពុជា បានថ្លែងថា ចំពោះបញ្ហាជម្លោះព្រំដែនកម្ពុជា-ថៃ សេចក្តីថ្លែង និងការតាំងចិត្តរបស់លោកប្រធានាធិបតី Donald J Trump គឺជួយឲ្យមានសន្តិភាព យូរអង្វែង និងការគាំទ្រតាមការប្តេជ្ញាចិត្ត នៃកិច្ចព្រមព្រៀងបទឈប់បាញ់ ដែលសម្រេចបានកាលពីថ្ងៃទី២៨ ខែកក្ដដា ឆ្នាំ២០២៥ នៅប្រទេសម៉ាឡេស៊ី។

នេះជាការបញ្ជាក់ឲ្យដឹងពីមន្រ្តីស្ថានទូតអាមេរិកប្រចាំកម្ពុជា ពេលត្រូវបានលោក ម៉ាង ស៊ីណេត អភិបាលខេត្តព្រះសីហនុ អញ្ជើញទទួលជំនួបសម្តែងការគួសម នៅព្រឹកថ្ងៃទី២៨ ខែសីហា ឆ្នាំ២០២៥។

ជាកិច្ចចាប់ផ្តើម អភិបាលខេត្តព្រះសីហនុ បានស្វាគមន៍ការមកដល់ខេត្តព្រះសីហនុ ដែលជាទឹកដីដ៏ស្រស់បំព្រង ព្រមទាំងអបអរសាទរខួបលើកទី៧៥ នៃការបង្កើតទំនាក់ទំនងការទូតរវាងកម្ពុជា និងសហរដ្ឋអាមេរិក។ លោកអភិបាលខេត្ត សូមអគុណប្រធានាធិបតី Donald J Trump ក្នុងកិច្ចអន្តរាគមន៍បទឈប់បាញ់ដែលបង្កឡើងដោយយោធាថៃកាលពីថ្ងៃទី២៤ ខែកក្កដា ឆ្នាំ២០២៥កន្លងមក ដែលកំពុងបន្តចរចារកសន្តិភាពពេញលេញក្រោមសំណើររបស់លោកប្រធានធិបតី។

លោក ម៉ាង ស៊ីណេត បានជម្រាបជូនមន្រ្តីទូតអាមេរិកថា ខេត្តព្រះសីហនុ មានសក្តានុពលដ៏សម្បុរបែបស្ថិតនៅភាគនីរតី នៃប្រទេសកម្ពុជា។ ខេត្តព្រះសីហនុ មាន៦ក្រុង ស្រុក ២៩ឃុំ សង្កាត់ និង ១១១ភូមិ ហើយប្រជាពលរដ្ឋមានជាង៣១ម៉ឺននាក់។ ខេត្តមានឆ្នេរសមុទ្រប្រវែង ១៧៥គីឡូម៉ែត្រ កោះតូចធំ៣២ ដែលនាំមកនូវសេដ្ឋកិច្ចសង្គម។ ខេត្តព្រះសីហនុ មានផ្លូវគមនាគមន៍ដូចជា៖ ផ្លូវទឹក ផ្លូវគោក និងផ្លូវអាកាស ផ្លូវទឹកមានកំពង់ផែអន្តរជាតិចំនួន៣ ផ្លូវគោកមានផ្លូវជាតិលេខ៣ លេខ៤ ផ្លូវល្បឿនលឿន និងផ្លូវដែក ផ្លុវអាកាស មានអាកាសយានដ្ឋានអន្តរជាតិ ដែលមានផ្លូវរត់ ៣៣០០ម៉ែត្រ តភ្ជាប់ទៅកាន់ពិភពលោក។ ខេត្តព្រះសីហនុត្រូវបានកំណត់ជា៤តំបន់ រួមមាន៖

ទី១៖ តំបន់ភស្តុភាកម្ម
ទី២៖ ទីក្រុងសមាហរណ្មកម្ម លំនៅដ្ឋាន ពាណិជ្ជកម្មអន្តរជាតិ
ទី៣៖ តំបន់ទេសចរណ៍ (តំបន់កោះទេសចរណ៍ល្អប្រណិត)
ទី៤៖ កសិកម្ម (ស្រុកព្រៃនប់ និងស្រុកកំពង់សោលា)។

អភិបាលខេត្ត បានគូសរំលេចថា សហរដ្ឋអាមេរិក បានចូលរួមចំណែកក្នុងវិស័យសំខាន់ៗជាច្រើនដល់កម្ពជា ដូចជា ការធ្វើមាតុភូមិនិវត្តន៍ នៃសម្បត្តិវប្បធម៌ជាតិ និងការលើកតម្កើងបេតិកភ័ណ្ឌវប្បធម៌ជាតិសម្បុរបែបរបស់កម្ពុជា។ អាមេរិកបានចូលរួមចំណែក យ៉ាងច្រើនដល់ការអភិវឌ្ឍសង្គមសេដ្ឋកិច្ចកម្ពុជា តាមរយ:ភាពជាដៃគូពាណិជ្ជកម្ម និងការវិនិយោគ រូមទាំងការគាំទ្រលើប្រព័ន្ធអប់រំ និងកិច្ចខិតខំប្រឹងប្រែងក្នុងការដោះមីន ដែលបញ្ជាក់ថា អាមេរិកបានដើរតួនាទីយ៉ាងសំខាន់ ហើយកម្ពុជានឹងបេជ្ញាចិត្តឥតងាករេ ក្នុងការពង្រឹងចំណងមិត្តភាព ដើម្បីផលប្រយោជនន៍ទៅវិញទៅមក នៃប្រទេសទាំងពីរ។

លោករម្លឹកថា សហរដ្ឋអាមេរិក បានកសាងផ្លូវហាយវេផ្លូវជាតិលេខ៤ នៅឆ្នាំ១៩៥៥ មានប្រវែង ២៣០គីឡូម៉ែត្រ តភ្ជាប់ពីរាជធានីភ្នំពេញ មកខេត្តព្រះសីហនុ ហើយការកសាងស្របពេលជាមួយនិងការសាងសង់កំពង់ផែសមុទ្ររបស់កម្ពុជា ខេត្តព្រះសីហនុ ចាប់ទទួលនាវាយោធាសហរដ្ឋអាមេរិក ចូលចតចាប់ពីឆ្នាំ២០០៧ រហូតដល់ឆ្នាំ២០២៤ មានចំនួន៣០លើក ដែលមាននាវាសរុបចំនួន៣៧គ្រឿង។ ទន្ទឹមនោះ រាជរដ្ឋាភិបាល ក៏អនុញ្ញាតិឲ្យនាវាទេសចរណ៍ WESTERDAM ចូលចតនៅកំពង់ផែស្វយ័ត ក្រុងព្រះសីហនុ ពេលជំងឺកូវីដកំពុងរាតត្បាត ហើយការចូលចតនេះទៀតសោត៍ គឺមានការទទួលស្វាគមន៍ពីសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា ដែលប្រទេសមួយចំនួនមិនអនុញ្ញាតឲ្យចូលចត។

ជាការឆ្លើយតប លោកស្រីភារៈធារី បានថ្លែងអំណគុណ និងវាយតម្លៃខ្ពស់ចំពោះកិច្ចសហប្រតិបត្តិការអភិវឌ្ឍសេដ្ឋកិច្ចកម្ពុជា ដែលនឹងក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលខ្ពស់នៅឆ្នាំ២០៥០។

លោកស្រី បានបន្តថា សហរដ្ឋអាមេរិក ទាំងរដ្ឋាភិបាល និងវិស័យឯកជន នឹងចូលរួមធ្វើកិច្ចការនេះជាមួយកម្ពុជា ដើម្បីជួយគាំទ្រការលូតលាស់របស់កម្ពុជា ក៏ដូចជាបង្កើតឱកាសសម្រាប់វិស័យធុរកិច្ចរវាងសហរដ្ឋអាមេរិក និងការវិនិយោគនៅកម្ពុជាផងដែរ។
លោកស្រីថា «ក្រៅពីវិស័យធុរកិច្ច និងវិស័យសេដ្ឋកិច្ច យើងមានក្តីសង្ឃឹមចំពោះការគោរពខួន៧៥ឆ្នាំ នៃទំនាក់ទំនងការទូត ដើម្បីសម្លឹងទៅរកការពង្រឹងវិស័យដ៏ទៃទៀត នៃទំនាក់ទំនងរវាងប្រជាពលរដ្ឋ និងប្រជាពលរដ្ឋ ទំនាក់ទំនងនឹងវិស័យអប់រំ និងអប់រំ ទំនាក់ទំនងវប្បធម៌ និងវប្បធម៌ និងការបង្កើនកិច្ចសហប្រតិបត្តិការយោធា និងមន្ត្រីអនុវត្តច្បាប់ ហើយភាពជាដៃគូរនេះធ្វើឲ្យកម្ពុជា និងសហរដ្ឋអាមេរិក កាន់តែមានភាពរីកចម្រើនបន្ថែមទៀត ក្នុងនោះយើងសម្លឹងទៅរកការពង្រឹង កិច្ចសហប្រតិបត្តិការវិស័យសុខភាពសាធារណៈ ប្រយុទ្ធប្រឆាំងនឹងបទឆបោកបច្ចេកវិទ្យាជាដើម»។

លោកស្រី បានបញ្ជាក់ថា ក្នុងការគោរពទិវាសប្តាហ៍ស្ថានទូតអាមេរិកនៅខេត្តព្រះសីហនុ នាពេលនេះ យើងមានសកម្មភាពរហូតដល់៨០ និងសកម្មភាពធ្វើការជាមួយដៃគូរលើវិស័យទាំងអស់ ព្រមទាំងអញ្ជើញអភិបាលខេត្ត និងសហការរី ចូលរួមមើលខ្សែភាពយន្តឯកសារ (លួច ឬចោកម្ម) ដែលរៀបរាប់ពីសកម្មភាពស៊ើបអង្កេតរកវត្ថុបុរាណរបស់កម្ពុជាប្រគល់ជូនកម្ពុជាវិញ ហើយគ្រប់សកម្មភាពដែលយើងធ្វើនៅក្នុងខេត្តព្រះសីហនុ ដូចជាការបើកស្លាករំលឹកខួបលើកទី៧៥ នៃការភ្ជាប់ការទូតរវាងកម្ពុជា និងសហរដ្ឋអាមេរិក៕