(ព្រះវិហារ)៖ លោក មាស ធីបញ្ញា តំណាងលោក ធន់ វឌ្ឍនា អនុប្រធានទី២ នៃព្រឹទ្ធសភា, ក្រុមសហគ្រិនវ័យក្មេង ព្រះសង្ឃ និងសហការី បានអញ្ជើញចុះសួរសុខទុក្ខ នាំយកសម្ភារប្រើប្រាស់ វិទ្យុទាក់ទង power bank ថ្នាំពេទ្យ រឿងឧបភោគ-បរិភោគជាច្រើនមុខ រួមនឹងថវិកាសម្រាប់ចូលរួមទ្រទ្រង់ជួយគាំទ្រដល់កងកម្លាំងជួរមុខ ដែលជាការចូលរួមចំណែកជួយជាតិ តាមរយៈសមរភូមិក្រោយ ជាការលើកទឹកចិត្តដល់វីរកងទ័ព ជួរមុខរបស់ប្រទេសកម្ពុជា។

សកម្មភាពនេះ ជាបង្ហាញនូវសេចក្តីគោរពស្រឡាញ់ រួមកម្លាំងចិត្ត និងថ្លែងសេចក្តីដឹងគុណ ចំពោះកងទ័ពជួរមុខកម្ពុជា ដែលបានឈរជើងប្រយុទ្ធការពារដែនអធិបតេយ្យភាពជាតិ យ៉ាងអង់អាច ក្នុងសមរភូមិប្រយុទ្ធរយៈពេល ៥ថ្ងៃ កាលពីខែកក្កដាកន្លងទៅនេះ និងគោរពអនុវត្តន៍បទបញ្ជារបស់រាជរដ្ឋាភិបាលយ៉ាងម៉ឺងម៉ាត់ នូវស្មារតីអត់ធ្មត់ខ្ពស់បំផុត ចំពោះការប្រឈមផ្សេងៗ ដែលអាចបង្កឲ្យកើតសង្គ្រាមសារជាថ្មី ដែលផ្ទុយពីស្មារតីនៃបទឈប់បាញ់។

សូមជម្រាបថា កន្លងមកក្រុមការងារក៏បានចុះទៅសួរសុខទុកជនភៀសសឹក បងប្អូនប្រជាពលករខ្មែរត្រឡប់ពីប្រទេសថៃ និងនាំយកនូវសម្ភារៈ ថវិកា ចំបាច់មួយចំនួនសម្រាប់ប្រើប្រាស់។

ក្នុងជំនួបនេះ បានបង្ហាញអំពីជំហរទៅវិញទៅមក ក្នុងនាមជាខ្មែរតែមួយរវាងវីរកងទ័ពជួរមុខ ក្នុងការការពារដែនបូរណភាពជាតិ និង បងប្អូនប្រជាជនពលរដ្ឋខ្មែរទាំងអស់ ដែលនៅពីក្រោយក្នុងការរួមចំណែកគ្រប់រូបភាព ដើម្បីឲ្យកម្ពុជាទទួលបានជ័យជំនះ ក្រោមយុទ្ធសាស្ត្រនៃការដឹកនាំរបស់រាជរដ្ឋាភិបាលកម្ពុជា៕