(ភ្នំពេញ)៖ អគ្គលេខាធិការដ្ឋាន នៃគណៈកម្មការគ្រប់គ្រងល្បែងពាណិជ្ជកម្មកម្ពុជា បានរៀបចំកម្មវិធីបណ្តុះបណ្តាល ស្តីពីការអនុវត្តកាតព្វកិច្ចជាក់ស្តែង របស់បុគ្គលរាយការណ៍ ក្រោមច្បាប់ស្តីពីការប្រឆាំងការសម្អាត ប្រាក់ និងហិរញ្ញប្បទានភេរវកម្ម និងច្បាប់ ស្តីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ នៅក្នុងវិស័យល្បែងពាណិជ្ជកម្ម ដោយមានការចូលរួមពីមន្ត្រីជំនាញរបស់ គ.ល.ក., តំណាងក្រសួងយុត្តិធម៌, តំណាងអង្គភាពស៊ើបការណ៍ហិរញ្ញវត្ថុកម្ពុជា, តំណាងអគ្គស្នងការដ្ឋាននគរបាលជាតិ នៃក្រសួងមហាផ្ទៃ និងអភិបាលក្រុមហ៊ុន, នាយកគ្រប់គ្រងទូទៅ, មន្ត្រីប្រតិបត្តិ មកពីក្រុមហ៊ុនកាស៊ីណូចំនួន ១៩ សរុបចំនួន ៤៨រូប។

គោលបំណង នៃកម្មវិធីបណ្តុះបណ្តាលខាងលើ គឺដើម្បីពង្រឹង និងលើកកម្ពស់ការយល់ដឹងអំពី ច្បាប់ និងលិខិតបទដ្ឋានគតិយុត្តពាក់ព័ន្ធនឹងការប្រឆាំងការសម្អាតប្រាក់ ហិរញ្ញប្បទានភេរវកម្ម និងការប្រឆាំងហិរញ្ញប្បទាន ដល់ការរីកសាយភាយអាវុធមហាប្រល័យ, ជំរុញអនុលោមភាព និងចែករំលែកបទពិសោធន៍ ដល់កម្មសិទ្ធិករ និង/ឬប្រតិបត្តិករកាស៊ីណូ ដែលជាបុគ្គលរាយការណ៍ក្នុងវិស័យល្បែងពាណិជ្ជកម្ម ក្នុងការ អនុវត្តកាតព្វកិច្ចនានាស្របតាមច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម និងច្បាប់ ស្តីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ។

កម្មវិធីបណ្តុះបណ្តាល ត្រូវបានរៀបចំឡើងក្រោមប្រធានបទសំខាន់ៗដូចជា ខ្លឹមសារនៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទាន ភេរវកម្ម និងច្បាប់ស្តីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ, ការអនុវត្តជាក់ស្តែង, នីតិវិធីនៃការស្រាវជ្រាវ និងស៊ើបអង្កេតបទល្មើសសម្អាតប្រាក់ក្នុងកាស៊ីណូ, ការទប់ស្កាត់រាល់សកម្មភាព សម្អាតប្រាក់ក្នុងកាស៊ីណូ, វិធីសាស្ត្រសម្អាតប្រាក់របស់ឧក្រិដ្ឋជនក្នុងគ្រឹះស្ថានល្បែងពាណិជ្ជកម្ម, វិធានការ ការពារ, ទប់ស្កាត់ និងលុបបំបាត់សកម្មភាពសម្អាតប្រាក់ក្នុងកាស៊ីណូ, នីតិវិធីដាក់ និងដកឈ្មោះបុគ្គល ឬ អង្គភាពចេញពីបញ្ជីរបស់ក្រុមប្រឹក្សាសន្តិសុខនៃអង្គការសហប្រជាជាតិ និងតុលាការ, វិធីសាស្ត្រសម្រាប់ ផ្ទៀងផ្ទាត់ឈ្មោះបុគ្គល ឬអង្គភាពដែលមានក្នុង UN Consolidated List, ការស៊ើបអង្កេតហិរញ្ញប្បទាន ដល់ការរីកសាយភាយអាវុធមហាប្រល័យ, ការបង្កក និងការរឹបអូសទ្រព្យសម្បត្តិរបស់បុគ្គល ឬអង្គភាពដែលត្រូវបានដាក់ឈ្មោះក្នុងបញ្ជីរបស់ក្រុមប្រឹក្សាសន្តិសុខនៃអង្គការសហប្រជាជាតិ និងចែករំលែកអំពី នីតិវិធីនៃការប្រើប្រាស់ និងការចាត់ចែងទ្រព្យសម្បត្តិបង្កកផងដែរ៕