(កណ្តាល)៖ នៅរសៀលថ្ងៃទី២៨ ខែសីហា ឆ្នាំ២០២៥ លោក អេង ចំរើន រដ្ឋលេខាធិការ តំណាងលោករដ្ឋមន្រ្តី ជា សុមេធី បានដឹកនាំកិច្ចប្រជុំ ស្តីពីការពិនិត្យវឌ្ឍនភាពការងាររបស់មន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តកណ្តាល ដោយមានការចូលរួមពីទីប្រឹក្សាក្រសួង លោកប្រធានមន្ទីរស្តីទី លោកស្រីអនុប្រធាននាយកដ្ឋានមនុស្សចាស់ និងអតីតយុទ្ធជន និងមន្រ្តីជំនាញ នៅសាលប្រជុំ នៃមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តកណ្តាល។

លោក វង្ស ចំណាន ប្រធានមន្ទីរស្តីទី បានលើកឡើងថា ក្រោមការដឹកនាំរបស់លោករដ្ឋមន្ត្រី ថ្នាក់ដឹកនាំក្រសួង លោកប្រធានក្រុមប្រឹក្សាខេត្ត និងលោកអភិបាលនៃគណៈអភិបាលខេត្ត និងការខិតខំប្រឹងប្រែងយកចិត្តទុកដាក់ អនុវត្តពីថ្នាក់ដឹកនាំមន្ទីរ និងមន្ត្រីរាជការទាំងអស់ និងដោយមានកិច្ចសហការល្អ យកចិត្តទុកដាក់ពីសំណាក់អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធ សង្គមស៊ីវីល វិស័យឯកជន និងអ្នកពាក់ព័ន្ធទាំងអស់ បានធ្វើឱ្យមន្ទីរសង្គមកិច្ច អតីតយុទ្ធជន និងយុវនីតិសម្បទា សម្រេចបានលទ្ធផលគួរជាទីមោទនៈក្នុងមូលដ្ឋានកន្លងមកនេះ។

លោក អេង ចំរើន បានពាំនាំនូវប្រសាសន៍ផ្តាំផ្ញើសួរសុខទុក្ខ និងកោតសរសើររបស់លោករដ្ឋមន្រ្តី ជា សុមេធី និងលោកស្រី ដល់បងប្អូនមន្ត្រីរាជការទាំងអស់ នៃមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តកណ្តាល ដែលបានខិតខំប្រឹងប្រែងបំពេញការងារបានល្អកន្លងមកនេះ និងសូមថ្លែងអំណរគុណដល់បងប្អូនមន្ត្រីរាជការ នៃមន្ទីរទាំងអស់គ្នា ដែលបំពេញការងារជារួមទទួលបានលទ្ធផលល្អក្នុងមន្ទីររបស់យើង។

លោក អេង ចំរើន សូមឲ្យបងប្អូនមន្ត្រីនៃមន្ទីរ រួបរួមគ្នាប្រឹងប្រែងបន្តទៀត ដើម្បីបំពេញនូវតម្រូវការមូលដ្ឋានសម្រាប់គ្រួសាររងគ្រោះ និងងាយរងគ្រោះ គាំទ្រដល់សមាជិកគ្រួសារឱ្យមានជំនាញវិជ្ជាជីវៈ បង្កើតមុខរបរ កាត់បន្ថយភាពក្រីក្រនៅក្នុងគ្រួសារ សហគមន៍ ជាពិសេសការជំរុញសមាគមមនុស្សចាស់តាមឃុំ-សង្កាតឲ្យមានដំណើរការល្អ និងមាននិរន្តរភាព។

ជាចុងក្រោយលោក អេង ចំរើន បានជំរុញឲ្យមន្រ្តីមន្ទីររួបរួមសាមគ្គីគ្នា អនុវត្តការងារឲ្យបានជោគជ័យបន្តទៀត ដើម្បីប្រទេសជាតិយើង ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី បន្តមានការរីកចម្រើនរុងរឿងបន្ថែមទៀត៕