(សៀមរាប)៖ សម្ដេចព្រះព្រហ្មរតនមុនី ពិន សែម សិរីសុវណ្ណោ ឧត្តមទីប្រឹក្សាគណៈសង្ឃនាយក និងប្រធានថេរសភាសង្ឃព្រះពុទ្ធសាសនាកម្ពុជា និងមន្រ្តីសង្ឃព្រះខេត្តសៀមរាប ព្រះគ្រូចៅអធិការវត្តក្នុងក្រុងសៀមរាប នារសៀលថ្ងៃទី២៨ ខែសីហា ឆ្នាំ២០២៥នេះ បាននិមន្តសួរសុខទុក្ខ និងនាំយកអំណោយ រួមនិងបច្ច័យជូនដល់គ្រួសារកងទ័ព ដែលបានពលីជីវិតក្នុងបុព្វហេតុជាតិ ការពារបូរណភាពទឹកដី ចំនួន១២គ្រួសារ នៅក្នុងខេត្តសៀមរាប។

សម្ដេចព្រះព្រហ្មរតនមុនី ពិន សែម មានថេរដីកាថា ការពលីជីវិតក្នុងបុព្វហេតុជាតិ ការពារបូរណភាពទឹកដី គឺយើងមិនអាចបំភ្លេចបានទេ ហើយការពលីរបស់យុទ្ធជនជួរមុខកម្ពុជា នឹងត្រូវចងចាំទុកជាវីរភាព ប្រកបដោយ ឆន្ទៈមោះមុត ក្នុងបុព្វហេតុបម្រើជាតិ សាសនា ព្រះមហាក្សត្រ និងការពារបូរណភាពទឹកដីរបស់កម្ពុជា ទោះក្នុងតម្លៃណាក៏ដោយ ពីការរំលោភបំពាន និងឈ្លានពានមកលើដែនអធិបតេយ្យភាពកម្ពុជា ពីការឈ្លានពាន របស់កងទ័ពថៃ កាលពីពេលថ្មីៗកន្លងទៅនេះ។

សម្ដេចព្រះព្រហ្មរតនមុនី ក៏បានសម្ដែងនូវការសោកស្ដាយ ចំពោះការបាត់បង់នូវវីរកងទ័ពកម្ពុជា ដែលបានពលីជីវិត ដើម្បីការពារទឹកដី និងអធិបតេយ្យភាពជាតិខ្មែរ ប្រកបដោយភាពអង់អាចក្លាហាន។ ការពលីជីវិតរបស់ វីរកងទ័ពកម្ពុជាយើង គឺជាការលះបង់ដ៏ធំធេង និងមានគុណបំណាច់មិនអាចកាត់ថ្លៃបានឡើយចំពោះជាតិទាំងមូល ដែលយើងត្រូវតែគោរព និងផ្ដល់តម្លៃជាវីរៈបុរសពិតរបស់ជាតិ ប្រកបដោយកិត្តិយសជាអមតៈសម្រាប់ ប្រវត្តិសាស្ត្រកម្ពុជា ហើយយើងទាំងអស់គ្នាត្រូវតាំងចិត្តចងចាំជានិច្ចនូវគំរូវីរភាពមិនអាចកាត់ថ្លៃបាននេះជារៀងរហូត។

សម្ដេចព្រះព្រហ្មរតនមុនី ពិន សែម និងព្រះមន្រ្តីសង្ឃខេត្តសៀមរាបរួម រួមទាំងព្រះគ្រូចៅអធិការវត្តក្នុងក្រុងសៀមរាប ក៏បានសម្តែងនូវការរំលែកទុក្ខដល់គ្រួសារយុទ្ធជនពលី ដែលនេះ គឺជាការបាត់បង់យុទ្ធជនដ៏អង់អាចក្លាហាន កូនជាទីស្រឡាញ់ បងប្អូនជាទីគោរព ឪពុកដ៏មានព្រហ្មវិហារធម៌ និងស្វាមី ដែលមានភក្តីភាព សម្រាប់ជាតិ ព្រមទាំងក្រុមគ្រួសារ និងសូមឧទ្ទិសកុសល ជូនចំពោះវិញ្ញាណក្ខន្ធយុទ្ធជនពលី បានចាប់កំណើតក្នុងឋានបរម្យសុខ កុំបីឃ្លៀងឃ្លាតឡើយ។

សម្ដេចព្រះព្រហ្មរតនមុនី ពិន សែម មានថេរកាបញ្ជាក់ថា ចំពោះសម្ភារៈប្រើប្រាស់ និងគ្រឿងឧបភោគបរិភោគរួមនឹងបច្ច័យ ដែលយកមកប្រគល់នាពេលនេះ គឺបានមកពីការចូលរួមរបស់សប្បុរសជនទាំងក្នុង និងក្រៅប្រទេស។ ក្នុងនោះដែរ ព្រះមង្គលមុនី គង់ ហេមរង្សី ព្រះចៅអធិការវត្តខេមរារាមនៅសហរដ្ឋអាមេរិក ក៏បានផ្ញើរបច្ច័យមួយចំនួន ដើម្បីចូលរួមរំលែកទុក្ខ ដែលផ្តល់តាមរយៈព្រះមន្ត្រីសង្ឃខេត្តសៀមរាប៕