(ភ្នំពេញ)៖ នាយកដ្ឋានពេទ្យការងារ នៃក្រសួងការងារ និងបណ្តុះបណ្តាលវិជ្ជាជីវៈ បានសហការជាមួយគម្រោង GIZ FABRIC Cambodia រៀបចំបើកវគ្គបណ្តុះបណ្តាលស្តីពី ការប្រើប្រាស់ឧបករណ៍បច្ចេកទេសសម្រាប់អធិការការងារចុះត្រួតពិនិត្យអនុលោមភាពលក្ខខណ្ឌសុវត្ថិភាព និងសុខភាពការងារនៅកន្លែងធ្វើការ តាមសហគ្រាស គ្រឹះស្ថាន កាលពីរសៀលថ្ងៃទី២៦ ខែសីហា ឆ្នាំ២០២៥ នៅទីស្តីការក្រសួង។

លោក ម៉ាញ ណារិទ្ធ ប្រធាននាយកដ្ឋានពេទ្យការងារ បានបញ្ជាក់ថា វគ្គបណ្តុះបណ្តាលនេះ រៀបចំឡើងក្នុងគោលបំណងរួមចំណែកពង្រឹងយន្តការអធិការកិច្ចការងារ ជាពិសេស ការធ្វើឱ្យប្រសើរឡើងនូវលក្ខខណ្ឌសុវត្ថិភាពនិងសុខភាពការងាររបស់បងប្អូនកម្មករនិយោជិតដែលកំពុងបម្រើការងារនៅតាមសហគ្រាស ក្រុមហ៊ុន រោងចក្រ។

ឧបករណ៍បច្ចេកទេសទាំងនេះ ជាអំណោយរបស់គម្រោង GIZ FABRIC Cambodia ក្នុងការបន្តរួមចំណែកពង្រឹងសមត្ថភាពនិងប្រសិទ្ធភាពអធិការការងារ ដោយប្រើប្រាស់ឧបករណ៍បច្ចេកវិទ្យាឌីជីថលក្នុងការត្រួតពិនិត្យលើអនុលោមភាពលក្ខខណ្ឌសុវត្ថិភាព និងសុខភាពការងារស្របតាមច្បាប់ស្តីពីការងារ និងលិខិតបទដ្ឋានគតិយុត្តពាក់ព័ន្ធ។

សូមបញ្ជាក់ថា ថ្មីៗកន្លងទៅនេះ គម្រោង GIZ FABRIC Cambodia ទើបបានផ្តល់ឧបករណ៍បច្ចេកទេស ជូនក្រសួងការងារ និងបណ្តុះបណ្តាលវិជ្ជាជីវ: សរុបចំនួន ៦ប្រភេទ រួមមាន ឧបករណ៍វាស់កម្រិតសំឡេង (Sound Level Meter and calibrator), ឧបករណ៍វាស់កម្រិតសំឡេងរំខាន (Personal Noise Dosimeter and calibrator), ឧបករណ៍វាស់កម្រិតពន្លឺ (Lux meter), ឧបករណ៍វាស់បរិយាការណ៍កម្តៅ (Heat index WBGT meter), ឧបករណ៍កំណត់សញ្ញាណឧស្ម័នពុលក្នុងបរិយាកាស (Gas Detector) និងឧបករណ៍ចាប់យកសារធាតុគ្រោះថ្នាក់នៅក្នុងខ្យល់ (Personal Air Sampling Pump)៕