(បាត់ដំបង)៖ លោកកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា នាថ្ងៃទី២៩ ខែសីហា ឆ្នាំ២០២៥ បានអញ្ជើញត្រួតពិនិត្យ ការស្ថាបនាផ្លូវ និងការសាងសង់ផ្ទះ ព្រមទាំងការស្តារប្រឡាយឡើងវិញ សម្រាប់បម្រើជូនអតីតយុទ្ធជន ស្ថិតនៅភូមិព្រៃសិន ឃុំឆ្នាល់មាន់ ស្រុកគាស់ក្រឡ ខេត្តបាត់ដំបង។

ក្នុងពេលចុះពិនិត្យ លោកកិត្តិសង្គហបណ្ឌិត គន់ គីម បានថ្លែងថា យោងតាមអនុសាសន៍ របស់សម្តេចតេជោ ហ៊ុន សែន បានណែនាំឱ្យបន្តការពិនិត្យ លើតម្រូវការជាក់ស្តែង និងដោះស្រាយជូនអតីតយុទ្ធជនគ្រប់រូប ដែលជួបការលំបាក ដើម្បីផ្តល់ដី និងផ្ទះសម្រាប់កសាងជីវភាពរស់នៅប្រចាំថ្ងៃ។

លោកអគ្គលេខាធិការ បានបន្តថា ការរៀបចំហេដ្ឋារចនាសម្ព័ន្ធរូបវន្តបំពេញបន្ថែម ដែលមានដូចជា ការស្ថាបនាផ្លូវ និងការស្តារប្រឡាយនាពេលនេះ ពិតជាមានសារៈសំខាន់សម្រាប់បម្រើ ដល់ជីវភាពរស់នៅប្រចាំថ្ងៃ ជូនអតីតយុទ្ធជន និងក្រុមគ្រួសារ។

លោកអគ្គលេខាធិការ បានសង្កត់ធ្ងន់ថា អស់រយៈពេលជាង១៨ឆ្នាំមកហើយ ដែលសមាគមអតីតយុទ្ធជនកម្ពុជា ត្រូវបានបង្កើតឡើងដោយគំនិតផ្តួចផ្តើម ក្រោមការដឹកនាំរបស់ សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា ជាអតីតនាយករដ្ឋមន្រ្តីដ៏ឈ្លាសវៃប្រកបដោយគតិបណ្ឌិត ធ្វើឲ្យប្រទេសជាតិមានសុខសន្តិភាព មានស្ថិរភាពនយោបាយ មានការអភិវឌ្ឍន៍ឥតឈប់ឈរលើគ្រប់វិស័យ។

លោកអគ្គលេខាធិការ បន្ថែមថា ក្នុងន័យនេះ រាជរដ្ឋាភិបាលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្រ្តី និងជាអនុប្រធានទី១ សមាគមអតីតយុទ្ធជនកម្ពុជា ជានិច្ចកាល បានបន្តអនុវត្ត និងដោះស្រាយជូនអតីតយុទ្ធជន ចុះដោយការចុះជួបផ្ទាល់ ជាមួយបងប្អូនអតីតយុទ្ធជនតាមមូលដ្ឋាន ដើម្បីឈ្វែងយល់ពីសុខទុក្ខ និងការលំបាករបស់បងប្អូន ហើយបានរិះរកគ្រប់មធ្យោបាយ ដើម្បីជួយលើកស្ទួយជីវភាពអតីតយុទ្ធជន ឱ្យទទួលបាននូវអត្ថប្រយោជន៍ជាច្រើន ដោយបានកែប្រែជីវភាពរស់នៅកាន់តែល្អប្រសើរឡើង ជាលំដាប់ស្របតាមការវិវឌ្ឍនៃសេដ្ឋកិច្ចជាតិ៕