(ភ្នំពេញ)៖ លោក កែវ រតនៈ រដ្ឋមន្រ្តីក្រសួងរ៉ែ និងថាមពល បានលើកឡើងថា វិស័យវារីអគ្គិសនី គឺជាវិស័យនាំមុខដ៏សំខាន់ ក្នុងការនាំថាមពលស្អាតចូលក្នុងប្រទេសកម្ពុជា ដែលធ្វើឱ្យអត្រាថាមពលស្អាតនៅក្នុងប្រទេសរបស់កម្ពុជាជាប់លេខ២ បន្ទាប់ពីប្រទេសឡាវមក ក្នុងប្រទេសអាស៊ានទាំង១០ ដែលជាប្រភពនៃការទាក់ទាញ ការវិនិយោគ នៅក្នុងប្រទេសកម្ពុជា។

ការលើកឡើងបែបនេះរបស់ លោករដ្ឋមន្ត្រី កែវ រតនៈ បានធ្វើឡើងនៅថ្ងៃទី២៨ ខែសីហា ឆ្នាំ២០២៥ ក្នុងកម្មវិធីសំណេះសំណាលស្តីពី ការស្នើសុំមូលនិធិរ៉ែទ្រទ្រង់កិច្ចអភិវឌ្ឍន៍សហគមន៍មូលដ្ឋាន។ ពិធីនេះមានការចូលរួមពីមន្ត្រីរដ្ឋបាលឃុំ-សង្កាត់ប្រមាណជិត ៣០០នាក់ នៅទីស្តីការក្រសួងរ៉ែ​ និងថាមពល។

លោករដ្ឋមន្ត្រី កែវ រតនៈ បានលើកឡើងថា វិស័យថាមពល និងវិស័យរ៉ែ គឺជាបេក្ខជន២ធំ ដែលបានទទួលផលផ្ទាល់នៃសន្តិភាពនេះ។ ប្រសិនបើយើងមានសង្គ្រាមយើងមិនអាចអភិវឌ្ឍវារីអគ្គិសនីបាននោះទេ ហើយវារីអគ្គិសនីកម្ពុជាសព្វថ្ងៃនេះ តំណាងឱ្យប្រមាណជា៤០% នៃល្បាយថាមពលជាតិ។ ប្រសិនបើមានវារីអគ្គិសនីច្រើនដូចនេះ ច្បាស់ជាពេលនេះមានភ្លើងគ្រប់គ្រាន់ ឬមួយមានភ្លើងដោយប្រភពថ្លៃ និងស្អាត ដែលធ្វើឱ្យថាមពលខ្ពស់ជាងនេះ ហើយក៏មិនប៉ះពាល់ដល់បរិស្ថាន។

លោករដ្ឋមន្ត្រី បានបញ្ជាក់យ៉ាងដូច្នេះថា «វិស័យវារីអគ្គិសនី គឺជាវិស័យនាំមុខដ៏សំខាន់ ក្នុងការនាំថាមពលស្អាតចូលក្នុងប្រទេសកម្ពុជា ដែលធ្វើឱ្យអត្រាថាមពលស្អាតនៅក្នុងប្រទេសរបស់យើងជាប់លេខ២ បន្ទាប់ពីប្រទេសឡាវមក ក្នុងប្រទេសអាស៊ានទាំង១០ ដែលជាប្រភពនៃការទាក់ទាញ ការវិនិយោគ នៅក្នុងប្រទេសកម្ពុជា។ ក្រសួងបានតាមដានរាល់ខែអំពីការផ្គត់ផ្គង់របស់ទីផ្សារ ក្នុងការបញ្ជាសម្ភារៈគ្រឿងសំណង់ផ្សេងៗ មិនឱ្យមានការលើសថ្លៃ ដោយសារបញ្ហា អស់ថ្ម អស់សាំង ខ្វះប្រេងម៉ាស៊ីននោះទេ»។

លោករដ្ឋមន្ត្រី ក៏បានបញ្ជាក់ថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកទឹកចិត្ដ និងដាក់ផែនការឱ្យក្រសួងរ៉ែ និងថាមពល ដើម្បីរុញផលប្រយោជន៍ឱ្យសហគមន៍ឱ្យបានកាន់តែច្រើន នៅក្នុងឆ្នាំ២០២៥នេះ ហើយនិងបន្ដទៅមុខទៀត ក្រសួងនឹងរុញផលដែលទទួលបានពីថវិកាស្ម័គ្រចិត្ដ របស់ប្រតិបត្តិកររ៉ែ ដើម្បីជួយអភិវឌ្ឍមូលដ្ឋានឱ្យបានកាន់តែច្រើនបន្ថែមទៀត។

បន្ថែមពីនេះ លោក អ៉ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែ បានលើកឡើងថា​ មូលនិធីរ៉ែទ្រទ្រង់កិច្ចអភិវឌ្ឍន៍សហគមន៍មូលដ្ឋាន ត្រូវបានបង្កើតឡើងតាំងពីឆ្នាំ២០១៥ ក្នុងគោលបំណងបង្កើនសុខដុមនីយកម្មរវាងសហគមន៍មូលដ្ឋានជាមួយនឹងការដ្ឋានរ៉ែ តាមរយៈការផ្តល់ផលប្រយោជន៍ដោយផ្ទាល់ ឬដោយប្រយោលជូនដល់សហគមន៍មូលដ្ឋាន ដែលមានប្រតិបត្តិការធនធានរ៉ែ។ ជាគោលការណ៍មូលនិធិរ៉ែ ត្រូវបានអនុញ្ញាតឱ្យប្រើប្រាស់សម្រាប់អនុវត្តគម្រោងអភិវឌ្ឍន៍ចំនួន ៤ប្រភេទធំៗ ដូចជា ការអភិវឌ្ឍហេដ្ឋារចនាសម្ព័ន្ធ ទឹកប្រើប្រាស់ ការងារអប់រំ និងគម្រោងនានាពាក់ព័ន្ធទៅនឹងសុខុមាលភាពសហគមន៍មូលដ្ឋាន។

លោក អ៊ឹង ឌីប៉ូឡា បានបញ្ជាក់ថា​ គិតត្រឹមខែកក្កដា ឆ្នាំ២០២៥ ក្រសួងរ៉ែនិងថាមពល បានប្រើប្រាស់មូលនិធិរ៉ែ ចូលរួមកសាងហេដ្ឋារចនាសម្ព័ន្ធក្នុងមូលដ្ឋានទូទាំងប្រទេស បានចំនួន ៩៩ គម្រោង ដែលចំណាយថវិកាអស់ប្រមាណ ៦,៥លានដុល្លារអាមេរិក និងមាន ៣១ គម្រោង ទៀតគ្រោងនឹងអនុវត្តក្នុងឆមាសទី២ ឆ្នាំ២០២៥នេះ ដែលគិតជាថវិកាប្រមាណជាង ២,៦លានដុល្លារអាមេរិក បន្ថែមទៀត។

សូមជម្រាបដែរថា ចាប់ពី២០១៥មក ថវិកាជិត១០លានដុល្លារត្រូវបានផ្តល់ដល់ឃុំសង្កាត់ទូទាំងប្រទេសសម្រាប់ជួយផ្នែកហេដ្ឋារចនាសម្ព័ន្ធ ទឹក វិស័យអប់រំនិងសុខាភិបាល។ នេះជាមូលនិធិរ៉ែទ្រទ្រង់កិច្ចអភិវឌ្ឍសហគមន៍ ហៅថាមូលនិធិរ៉ែ ដែលជាវិភាគទានស្ម័គ្រចិត្តពីប្រតិបត្តិកររ៉ែ បង្កើតឡើងនៅឆ្នាំ២០១៥ ដោយសម្តេចតេជោ ហ៊ុន សែន និងបន្តពង្រីកដោយសម្តេចធិបតី ហ៊ុន ម៉ាណែត សំដៅជួយជ្រោមជ្រែងមូលដ្ឋានទូទាំងប្រទេស៕