(បន្ទាយមានជ័យ)៖ លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានបញ្ជាក់ឱ្យដឹងថា កំណាត់ចុងក្រោយ ផ្លូវជាតិលេខ៥ សិរីសោភ័ណ-ប៉ោយប៉ែត ខេត្តបន្ទាយមានជ័យប្រវែង ៣៥.១៤គីឡូម៉ែត្រ សម្រចបានលទ្ធផល៣៣.៨%ហើយ គិតត្រឹមចុងខែសីហា ឆ្នាំ២០២៥នេះ។

ថ្លែងប្រាប់បណ្តាញព័ត៌មាន Fresh News នាថ្ងៃទី ២៩ ខែសីហា ឆ្នាំ២០២៥នេះ លោក ផន រឹម បានបញ្ជាក់ទៀតថា បើគ្មានការប្រែប្រួលទេ គម្រោងស្តារ និងលើកកម្រិតគុណភាពផ្លូវជាតិលេខ៥ កំណាត់ចុងក្រោយនេះ នឹងបញ្ចប់ក្នុងអំឡុងឆ្នាំ២០២៦ខាងមុខ។

លោក ផន រឹម ក៏បានអំពាវនាវដល់ប្រជាពលរដ្ឋអ្នកប្រើប្រាស់កំណាត់ផ្លូវជាតិលេខ៥ (សិរីសោភ័ណ-ប៉ោយប៉ែត)បើកបរដោយប្រុងប្រយ័ត្នខ្ពស់ ប្រកបដោយការទទួលខុសត្រួវ ពោលគឺត្រូវបើកបរក្នុងល្បឿនមួយអាចគ្រប់គ្រងបាន ដើម្បីធានាសុវត្ថិភាពខ្លួនឯង និងអ្នកដទៃ និងបើកបរក្នុងល្បឿនសមល្មមកាត់បន្ថយការហុយដី និងខ្ចាយភក់លើបងប្អូនប្រជាពលរដ្ឋរស់នៅតាមដងផ្លូវ និងអ្នកដំណើរដោយយានយន្តធុនស្រាល។

លោកក៏បានថ្លែងអំណរគុណដល់ប្រជាពលរដ្ឋរស់នៅតាមសងខាងផ្លូវ និងប្រជាពលរដ្ឋអ្នកដំណើរ ដែលមានការយោគយល់ និងអធ្យាស្រ័យខ្ពស់ ដល់ដំណើរការការដ្ឋានផ្លូវជាតិលេខ៥កំណាត់ចុងក្រោយ នារដូវវស្សាភ្លៀងធ្លាក់ជោគជាំនេះ៕