(តាកែវ)៖ នាព្រឹកថ្ងៃសុក្រ ៥កើត ខែភទ្របទ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៩ ខែសីហា ឆ្នាំ២០២៥នេះ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម អមដំណើរដោយ លោក លោកស្រី ជាថ្នាក់ដឹកនាំ មន្ត្រីបច្ចេកទេសក្រសួង និងមន្ទីរធនធានទឹក និងឧតុនិយមខេត្តតាកែវ និងខេត្តកណ្តាល បានអញ្ជើញចុះសិក្សាស្វែងយល់ពីប្រព័ន្ធធារាសាស្ត្រព្រែកគ្រួសចារ និងប្រព័ន្ធធារាសាស្ត្រតាស៊ូង នៃកម្មវិធីខ្សែសង្វាក់តម្លៃផលិតកម្មកសិកម្មកម្ពុជា-អូស្ត្រាលី(កាវ៉ាក់) ក្រោមជំនួយពីរដ្ឋាភិបាលអូស្ត្រាលី ស្ថិតក្នុងភូមិសាស្ត្រខេត្តតាកែវ និងខេត្តកណ្តាល ដោយមានវត្តមានចូលរួមពីលោក Derek Yip ឯកអគ្គរាជទូតអូស្រ្តាលីប្រចាំនៅកម្ពុជា និងលោក វ៉ី សំណាង អភិបាលខេត្តតាកែវ ព្រមទាំងអាជ្ញាធរមូលដ្ឋានជាច្រើនរូប។

សូមជម្រាបថា ប្រព័ន្ធធារាសាស្ត្រព្រែកគ្រួសចារដែលទទួលប្រភពទឹកពីស្ទឹងព្រែកអំបិល ស្រុកស្អាង ខេត្តកណ្តាល បានកសាងឡើងក្នុងឆ្នាំ២០១៨ មានទីតាំងស្ថិតក្នុងឃុំចារ ស្រុកព្រៃកប្បាស ខេត្តតាកែវ និងឃុំព្រែកអំបិល ស្រុកស្អាង ខេត្តកណ្តាល។ ដោយឡែក ប្រព័ន្ធធារាសាស្រ្តតាស៊ូង បានកសាងឡើងក្នុងឆ្នាំ ២០១៧ មានទីតាំងស្ថិតនៅភូមិព្រៃតាពង ឃុំបានកាម ស្រុកព្រៃកប្បាស ខេត្តតាកែវ មានចម្ងាយប្រមាណ ៦៥គីឡូម៉ែត្រ ពីទីរួមខេត្តតាកែវ ។ ក្នុងឱកាសនោះ លោករដ្ឋមន្ត្រី និងគណៈប្រតិភូ ក៏បានអញ្ជើញជួបសំណេះសំណាលប្រកបដោយភាពស្និទ្ធស្នាលជាមួយសហគមន៍កសិករប្រើប្រាស់ទឹកនៃប្រព័ន្ធប្រធារាសាស្ត្រព្រែកគ្រួសចារ និងប្រព័ន្ធធារាសាស្ត្រតាស៊ូង ផងដែរ។

សហគមន៍កសិករប្រើប្រាស់ទឹកព្រែកគ្រួសចារ បានបង្កើតឡើងនៅថ្ងៃទី១៦ ខែឧសភា ឆ្នាំ២០១៩ ដែលមានសមាជិកចំនួន ៣៨៨១គ្រួសារ ផ្ទៃដីស្រោចស្រព ៣០២១ហិកតា ក្នុងនោះផ្ទៃដីបង្កបង្កើនផលបាន ២ដងចំនួន ១៥២១ហិកតា និងបាន ៣ដងចំនួន ១៥០០ហិកតា គ្របដណ្តប់លើភូមិចំនួន ២៧ ឃុំចំនួន ៦ នៃស្រុកព្រៃកប្បាស ស្រុកបាទី ខេត្តតាកែវ និងស្រុកស្អាង ខេត្តកណ្តាល។ ចំណែក សហគមន៍កសិករប្រើប្រាស់ទឹកតាស៊ូង បានបង្កើតឡើងនៅថ្ងៃទី៣០ ខែមីនា ឆ្នាំ២០១៨ ដែលមានសមាជិកចំនួន ២២១៨គ្រួសារ ផ្ទៃដីស្រោចស្រព ២៣៥២ហិកតា គ្របដណ្ដប់លើភូមិចំនួន១៦ ឃុំចំនួន នៃស្រុកព្រៃកប្បាស ខេត្តតាកែវ៕