(ភ្នំពេញ)៖ រដ្ឋបាលរាជធានីភ្នំពេញ នៅរសៀលថ្ងៃទី២៩ ខែសីហា ឆ្នាំ២០២៥ បានប្រារព្ធពិធីប្រកាសលោក ពេញ ធារម្យ ចូលកាន់តំណែងជាអភិបាលរង នៃគណៈអភិបាលរាជធានីភ្នំពេញ។

ពិធីប្រកាសនេះ ធ្វើឡើងក្រោមវត្តមានលោកសន្តិបណ្ឌិត ម៉ៅ ច័ន្ទតារា រដ្ឋលេខាធិការក្រសួងមហាផ្ទៃ តំណាងអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោក ឃួង ស្រេង អភិបាលរាជធានីភ្នំពេញ ព្រមទាំងអភិបាលរងរាជធានី និងមន្ត្រីពាក់ព័ន្ធជាច្រើនរូបទៀត។

សូមរំលឹកថា លោក ពេញ ធារម្យ ត្រូវបានប្រកាសតែងតាំង និងចូលកាន់តំណែងជាអភិបាលរងខេត្តកំពត កាលពីថ្ងៃទី២៥ ខែសីហា ឆ្នាំ២០២២ ហើយបានប្រកាសផ្ទេរមកជាអភិបាលរងរាជធានីភ្នំពេញ ក្រោយលោក កើត ឆែ ផ្ទេរពីអភិបាលរងរាជធានីទៅអភិបាលរងខេត្តកំពត៕