(កំពង់ធំ)៖ លោក កែ ក្រានីត បានដឹកនាំសប្បុរសជន នាំយកនូវគ្រឿងឧបភោគបរិភោគ សម្ភារប្រើប្រាស់ និងជួបសំណេះសំណាលសួរសុខទុក្ខ លើកទឹកចិត្តវីរៈកងទ័ព និងពុកម៉ែបងប្អូនប្រជាជន នៅជំរុំភៀសខ្លួនទិសព្រះវិហារ។
លោក កែ ក្រានីត បានសម្ដែង នូវការគោរពដឹងគុណ កោតសរសើរខ្ពស់ដល់វីរភាព វីរៈយុទ្ធជនកងទ័ពរបស់យើងដែលបាន ខិតខំតស៊ូពុះពារប្រយុទ្ធប្រឆាំង តទល់ជាមួយទាហានថៃ នៅក្នុងសមរភូមិ និងក្រាញននៀលការពារជាតិមាតុភូមិមិនឱ្យបាត់បង់មួយមីលីម៉ែត្រ ដើម្បីរក្សាបូរណភាពទឹកដីសុវណ្ណភូមិនៃយើង ដែលជាកេរដំណែលរបស់ដូនតា និងរក្សាបាននូវសុខសុវត្ថិភាព ជូនពុកម៉ែបងប្អូនប្រជាពលរដ្ឋខ្មែរគ្រប់រូបដោយសុខក្សេមក្សាន្ត។

លើសពីនេះ លោក កែ ក្រានីត បានអំពាវនាវពុកម៉ែបងប្អូនប្រជាពលរដ្ឋខ្មែរគ្រប់រូប ត្រូវនាំគ្នាមានស្មារតីជាតិនិយមឱ្យបានខ្ពស់បំផុត ជាពិសេសត្រូវប្រឆាំងដាច់ខាត នូវការបង្កឱ្យមានសង្គ្រាមឈ្លានពានរបស់ថៃមកលើកម្ពុជា ហើយគាំទ្រពេញទំហឹងនូវយុទ្ធសាស្ត្រនិងការដោះស្រាយប្រកបដោយសន្តិវិធី និងឈរលើគោលការណ៍ច្បាប់អន្តរជាតិជាធរមាន ប្រកបដោយភាពឈ្លាសវៃបំផុតរបស់សម្ដេចតេជោ ហ៊ុន សែន ប្រធានព្រឹទ្ធសភា និងសម្ដេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

ជាមួយគ្នានេះ វីរៈកងទ័ពយើង បានគោរពថ្លែងអំណរគុណយ៉ាងជ្រាលជ្រៅបំផុត ដល់លោក កែ ក្រានីត និងក្រុមការងារដែលតែងតែគិតគូរយកចិត្តទុកដាក់ ក្នុងនាមសមរភូមិ ក្រោយគាំពារសមរភូមិមុខ និងនាំយកគ្រឿងឧបភោគបរិភោគសម្ភារប្រើប្រាស់ ព្រមទាំងថវិកាមួយចំនួន មកសួរសុខទុក្ខលើកទឹកចិត្តកងទ័ពជួរមុខ ក្នុងឱកាសនេះ និងក្នុងពេលកន្លងមក។

ក្នុងឱកាសនេះលោក កែ ក្រានីត បានជួបសំណេះសំណាលវីរៈកងទ័ពជាច្រើនទីតាំង ព្រមទាំងជំរុំជនភៀសសឹក១កន្លែង គឺវត្តពើកព្រះគោ ហើយបានឧបត្ថម្ភ ជនភៀសសឹកចំនួន១០០គ្រួសារផងដែរ៕