(ព្រះវិហារ)៖ លោកជំទាវអ្នកឧកញ៉ា ម៉ៅ ចំណាន គិតម៉េង ក្នុងនាមជាអនុប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់ គ្រុប និងជាប្រធានសមាគមសិល្បករខ្មែរ នៅថ្ងៃទី២៩ ខែសីហា ឆ្នាំ២០២៥នេះ បានដឹកនាំក្រុមការងារមកពីក្រុមហ៊ុន រ៉ូយ៉ាល់ គ្រុប (ធនាគារ វីង, CBS, សែលកាត) និងសិល្បករ-សិល្បការិនី មកពីសមាគមសិល្បករខ្មែរ បានជួបសំណេះសំណាលជាមួយបងប្អូនជនភៀសសឹក ដែលកំពុងតែរស់នៅមណ្ឌលសុវត្ថិភាព និងបានប្រគល់ប៉ាឡែតឈើចំនួន ៣០០បន្ទះ ជូនអាជ្ញាធរនៅជំរុំសុវត្ថិភាពក្នុងវត្តឧត្តមគិរីទួលអណ្តែត ឬហៅថា វត្តថ្នល់បែក នៅខេត្តព្រះវិហារ ដើម្បីសម្រួលដល់ការស្នាក់នៅរបស់ជនភៀសសឹក។

នៅក្នុងឱកាសនោះ លោកជំទាវអ្នកឧកញ៉ា ម៉ៅ ចំណាន គិតម៉េង បានសម្តែងសេចក្តីសោមនស្សរីករាយបំផុត ដែលបានមកជួបសួរសុខទុក្ខ និងស្វែងយល់ពីទុក្ខលំបាករបស់បងប្អូនជនភៀសសឹកទាំងអស់ នៅក្នុងគ្រាដ៏លំបាកមួយនេះ។ ជាមួយគ្នានេះ លោកជំទាវអ្នកឧកញ៉ា ក៏បានសម្តែងនូវការសោកស្តាយចំពោះការបាត់បង់ និងការចាកចេញពីផ្ទះសំបែងទាំងបង្ខំរបស់បងប្អូន ដោយគ្មានការព្រៀងទុក ដើម្បីគេចចេញពីការចិញ្ចឹមចិត្តធ្វើសង្គ្រាមឈ្លានពានម្តងហើយម្តងទៀតរបស់ប្រទេសថៃ មកលើប្រទេសកម្ពុជា។

លោកជំទាវអ្នកឧកញ៉ា ម៉ៅ ចំណាន គិតម៉េង បានបន្តថា នៅក្នុងរយៈពេលជាងមួយខែមកនេះ ទោះបីជាពុកម៉ែបងប្អូនបានទទួលការយកចិត្តទុកដាក់ខ្ពស់ពីអាជ្ញាធរ រាជរដ្ឋាភិបាល និងសប្បុរសជនមកពីគ្រប់ពីទិសទីក៏ដោយ ប៉ុន្តែពួកយើងពិតជាដឹងយ៉ាងច្បាស់ថា ពុកម៉ែបងប្អូនប្រាកដជាមានអារម្មណ៍ឈឺចាប់ ភ័យខ្លាច និងអារម្មណ៍ឯកាជាក់ជាមិនខាន ព្រោះគ្មានទីកន្លែងណា មានក្តីសុខជាផ្ទះរបស់យើងទេ។ ប៉ុន្តែ ទោះបីជាយ៉ាងណា ពួកយើងសង្ឃឹមថា ស្រមោលខ្មៅដ៏អាក្រក់មួយនេះនឹងឆាប់រសាត់បាត់ទៅវិញជាក់ជាមិនខានឡើយ។

លោកជំទាវអ្នកឧកញ៉ា ម៉ៅ ចំណាន គិតម៉េង គូសបញ្ជាក់ថា ពួកយើងទាំងអស់គ្នា រួមជាមួយនឹងរាជរដ្ឋាភិបាល និងប្រជាជនកម្ពុជា ១៧លាននាក់ នឹងនៅបន្តគាំទ្រ និងផ្តល់កម្លាំងចិត្តពុកម៉ែបងប្អូនជាដរាប។ យើងសង្ឃឹមថា ថ្ងៃដ៏ស្រស់ស្រាយនៅមិនឆ្ងាយនោះទេ។ នៅថ្ងៃនេះ យើងនៅក្នុងស្ថានភាពពិបាក ប៉ុន្តែប្រវត្តិសាស្រ្តបានបង្ហាញថា គ្មានភាពងងឹតណាដែលមានអស់កល្បនោះទេ។ សន្តិភាពនឹងត្រឡប់មកវិញ ហើយអ្នកនឹងមានឱកាសសាងជីវិតថ្មី ពោរពេញដោយសុវត្ថិភាព និងសុភមង្គល។

លោកជំទាវអ្នកឧកញ៉ា ម៉ៅ ចំណាន គិត ម៉េង បន្ថែមថា ការមកដល់របស់ពួកយើងនៅថ្ងៃនេះ គឺមកក្នុងនាមតំណាងឱ្យបងប្អូនប្រជាពលរដ្ឋខ្មែរ រាប់ម៉ឺននាក់ ដែលបានចូលរួមទាំងថវិកា គ្រឿងឧបភោគបរិភោគ និងសម្ភារ ជាមួយនឹងមូលនិធិ ទ្រទ្រង់ជនភៀសសឹករបស់យើង។ ដូច្នេះការមកដល់របស់ពួកយើងនៅថ្ងៃនេះទៀតសោត គឺជាការនាំយកនូវបេះដូង ស្មារតីគោរពស្រឡាញ់របស់បងប្អូនខ្មែរទាំងក្នុង និងក្រៅប្រទេសមកជាមួយ។ ទាំងនេះគឺជាសញ្ញាដែលយើងចង់បញ្ជាក់ថា ពុកម៉ែបងប្អូនមិនឯកា ឬត្រូវបានបំភ្លេចនោះទេ ពោលគឺពុកម៉ែបងប្អូនពិតជាទទួលបានការយកចិត្តទុក្ខដាក់ និងគាំទ្រខ្ពស់បំផុតពីប្រជាជន និងរាជរដ្ឋាភិបាលកម្ពុជា ពិសេសសម្តេចអគ្គមហាសេនាបតីតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត ។

ជាមួយគ្នានេះ លោកជំទាវអ្នកឧកញ៉ា ម៉ៅ ចំណាន គិតម៉េង ក៏សូមអំពាវនាវឱ្យពុកម៉ែបងប្អូន សូមមេត្តាបន្តតាមដានអាន ស្តាប់ព័ត៌មាន និងអនុវត្តន៍ ដោយឈរលើស្មារតីអត់ធ្មត់ខ្ពស់បំផុត ចំពោះរឿងជាតិមាតុភូមិរបស់យើងនាពេលនេះ ពិសេសសូមបន្តផ្តល់ទំនុកចិត្ត និងជឿជាក់លើរាជរដ្ឋាភិបាលកម្ពុជា។ យើងទាំងអស់គ្នាត្រូវចាំថា ការឈឺចាប់របស់ពួកយើងនៅពេលនេះ គឺ ឈឺចាប់ដើម្បីឈ្នះសមរភូមិ ។

លោកជំទាវអ្នកឧកញ៉ា ម៉ៅ ចំណាន គិតម៉េង សូមគោរពថ្លែងអំណរគុណយ៉ាងជ្រាលជ្រៅចំពោះអ្នកឧកញ៉ា គិត ម៉េង ដែលបានផ្តួចផ្តើមបង្កើតមូលនិធិទ្រទ្រង់ជនភៀសសឹក នេះឡើង និងសូមគោរពថ្លែងអំណរគុណដល់បងប្អូនជនរួមជាតិខ្មែរទាំងក្នុង និងក្រៅប្រទេស រួមទាំងជនបរទេសគ្រប់ជាតិសាសន៍ ដែលបានចូលរួមបរិច្ចាគជាថវិកា សម្លៀកបំពាក់ គ្រឿងឧបភោគបរិភោគ និងសម្ភារផ្សេងៗ នៅក្នុងមូលនិធិរបស់យើង។ សូមគោរពជូននូវមហាបុណ្យកុសលដែលកើតចេញពីកម្លាំងសទ្ធាជ្រះថ្លារបស់បងប្អូនទាំងអស់ ឱ្យកើតចេញជាប្រយោជន៍តាមសេចក្តីប្រាថ្នារៀងៗខ្លួន។

សូមជម្រាបថា មូលនិធិទ្រទ្រង់ជនភៀសសឹក បានទទួលការបរិច្ចាគពីកម្លាំងសាមគ្គីរបស់សប្បុរសជនមកពីគ្រប់ទិសទី ទាំងក្នុង និងក្រៅប្រទេស។ «មូលនិធិទ្រទ្រង់ជនភៀសសឹក» បានផ្តួចផ្តើមឡើងដោយអ្នកឧកញ៉ា គិត ម៉េង អគ្គនាយកក្រុមហ៊ុនរ៉ូយ៉ាល់គ្រុប និងលោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ៕