(សិង្ហបុរី)៖ នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងថា កម្ពុជានិងបណ្ដារដ្ឋអាស៊ាន ប្ដេជ្ញារួមគ្នាប្រយុទ្ធប្រឆាំងគ្រឿងញៀនដោយមិនលើកលែង។

លោកថ្លែងបែបនេះ ក្នុងឱកាសដឹកនាំប្រតិភូកម្ពុជាចូលរួមក្នុងកិច្ចប្រជុំមន្ត្រីជាន់ខ្ពស់អាស៊ាន លើកទី៤៦ ស្តីពីបញ្ហាគ្រឿងញៀន និងកិច្ចប្រជុំពាក់ព័ន្ធ (Plenary Meeting of 46TH ASEAN Senior Officials Meeting on Drug Matters and Its Related Meeting) ចាប់ពីថ្ងៃទី២៦ ដល់ថ្ងៃទី២៨ ខែសីហា ឆ្នាំ២០២៥។

ក្រោយកិច្ចប្រជុំនោះដែរ នាយឧត្តមសេនីយ៍ មាស វិរិទ្ធ អគ្គលេខាធិការ បានបន្តថា កិច្ចប្រជុំលើកទី ៤៦ នេះ បណ្ដាលរដ្ឋអាស៊ានបានរួមគ្នាពិនិត្យនិងពិភាក្សាលើវឌ្ឍនភាពការងារត្រួតពិនិត្យគ្រឿងញៀនអាស៊ាន និងផែនការសកម្មភាពនៃកិច្ចប្រជុំក្រុមការងារត្រួតពិនិត្យគ្រឿងញៀនប្រចាំកំពង់ផែសមុទ្រលើកទី៩ (9th ASITF) កិច្ចប្រជុំក្រុមការងារអាកាសយានដ្ឋានអន្តរជាតិលើកទី១៤ (14th AAITF) និងផែនការសកម្មភាពអាស៊ានក្នុងការប្រយុទ្ធប្រឆាំងគ្រឿងញៀនឆ្នាំ២០១៦-២០២៥ និងបន្តពិភាក្សាលើប្រធានបទចំនួន០៥ គឺ ទី១. ការងារអប់រំ បង្ការ ទី២. ការងារព្យាបាលស្ដារនីតិសម្បទា ទឺ៣. ការងារអនុវត្តច្បាប់ ទី៤. ដំណាំជំនួសគ្រឿងញៀន និងទី៥. ការងារស្រាវជ្រាវ។

ជាមួយគ្នានេះ នាយឧត្តមសេនីយ៍ មាស វិរិទ្ធ ក៏បានប្រាប់បន្តទៀតថា កម្ពុជាបានចូលរួមក្នុងកិច្ចប្រជុំមន្ត្រីជាន់ខ្ពស់អាស៊ានស្តីពីគ្រឿងញៀន ASOD ជាមួយដៃគូសន្ទនា រួមមាន:ប្រទេសចិន ជប៉ុន កូរ៉េ ឥណ្ឌា អូស្រ្តាលី និងប្រទេសរុស្សុី ផងដែរ។

ជាមួយគ្នានេះក្នុងព្រឹត្តិការណ៍នៃកិច្ចប្រជុំលើកទី៤៦ នោះដែរ នាយឧត្តមសេនីយ៍ មាស វិរិទ្ធ បានបន្ថែមដោយសង្កត់ធ្ងន់ថា កម្ពុជាបានប្ដេជ្ញាចិត្តចូលរួមប្រយុទ្ធប្រឆាំងគ្រឿងញៀនទាំងក្នុងតំបន់ និងសកលលោក ដោយប្រកាន់នូវគោលការណ៍មិនលើកលែងចំពោះករណីគ្រឿងញៀនដើម្បីឆ្លើយតបទៅនឹងចក្ខុវិស័យអាស៊ានគ្មានគ្រឿងញៀនតាមរយៈយុទ្ធនាការប្រយុទ្ធប្រឆាំងគ្រឿងញៀននិងផែនការសកម្មភាពការងារប្រយុទ្ធប្រឆាំងគ្រឿងញៀននៅកម្ពុជា២០២៤-២០២៨ និងចូលរួមគ្រប់យន្តការទ្វេភាគី ត្រីភាគី និងអន្តរជាតិ ការប្រយុទ្ធប្រឆាំងគ្រឿងញៀនតាមប្រព័ន្ធបច្ចេកវិទ្យាឌីជីថលលើទូរសព្ទដៃ NoDrug ដែលផ្ដល់ចំណេះដឹង និងការរាយការណ៍ដើម្បីយកគ្រឿងញៀនចេញពីសហគមន៍៕