(ភ្នំពេញ)៖ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសមូលនិធិគន្ធបុប្ផាកម្ពុជា នៅរសៀលថ្ងៃទី២៩ ខែសីហា ឆ្នាំ២០២៥ បានអញ្ជើញសំណេះសំណាលក្នុងពិធីប្រគល់ និងទទួលថវិកាបរិច្ចាគ ចំនួន ៤៣៤លានរៀល ពីសមាគមអ្នកអភិវឌ្ឍន៍លំនៅឋានកម្ពុជា ជូនដល់មូលនិធិគន្ធបុប្ផាកម្ពុជា ក្រោមយុទ្ធនាការ «១ម៉ឺនរៀល ១ម៉ឺននាក់»។

ពិធីនេះក៏មានការអញ្ជើញពីលោកស្រី ប៉ែន សុបភា រដ្ឋលេខាធិការ នៃក្រសួងសេដ្ឋកិច្ចនិងហិរញ្ញវត្ថុ និងជាអនុប្រធានប្រតិបត្តិមូលនិធិគន្ធបុប្ផាកម្ពុជា, លោកអ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា, លោកវេជ្ជបណ្ឌិត គី សន់ទី នាយកមន្ទីរពេទ្យគន្ធបុប្ផា និងក្រុមគ្រូពេទ្យ, ក្រុមការងារមូលនិធិគន្ធបុប្ផាកម្ពុជា និងថ្នាក់ដឹកនាំ សមាជិក-សមាជិកាសមាគមអ្នកអភិវឌ្ឍន៍លំនៅឋានកម្ពុជាជាច្រើនរូបទៀតផងដែរ។

ជាកិច្ចចាប់ផ្ដើមនៃកម្មវិធីគណៈអធិបតី បានគោរពវិញ្ញាណក្ខន្ធយុទ្ធជនដែលបានពលីក្នុងសង្គ្រាមឈ្លានពាន ។បន្ទាប់មកក៏មានការអានរបាយការណ៍សង្ខេប និងមតិស្វាមគមន៍របស់លោកស្រី ប៉ែន សុបភា ដោយបានគោរពថ្លែងអំណរគុណលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដែលតែងតែចំណាយពេលវេលាដ៏មានតម្លៃ និងមមាញឹកដឹកនាំ និងតម្រង់ទិសការអនុវត្តផែនការសកម្មភាពរបស់មូលនិធិគន្ធបុប្ផានាពេលកន្លងមកក៏ដូចជាចូលរួមដឹកនាំយុទ្ធនាកាសំខាន់ៗរបស់មូលនិធិគន្ធបុប្ផាកម្ពុជា ជាពិសេសយុទ្ធនាការ «១ម៉ឺនរៀល ១ម៉ឺននាក់» ដោយទទួលបានជោគជ័យគួរជាទីមោទនៈ។

ក្រោមការដឹកនាំដ៏ខ្ពង់ខ្ពស់របស់លោកជំទាវបណ្ឌិត យុទ្ធនាការនេះ ទទួលបានថវិកាបរិច្ចាគប្រមាណ ៦លានដុល្លារអាមេរិក ពីសប្បុរសជនសរុបជាង ៣០ម៉ឺននាក់ ដោយមិនទាន់បានបញ្ជូលថវិកាចំនួន ៤៣៤លានរៀល ដែលសមាគមអ្នកអភិវឌ្ឍន៍លំនៅឋានកម្ពុជានៅឡើយទេ។

ការចូលរួមបរិច្ចាគថវិការបស់សមាគមខាងលើនេះ បានធ្វើឲ្យថវិកាបរិច្ចាគគាំទ្រយុទ្ធនាការនេះមានការកើនឡើងមួយកម្រិតទៀត។

ក្នុងឳកាសនោះលោកអ្នកឧកញ៉ា លី ហួរ ប្រធានសមាគមលំនៅឋានកម្ពុជា ក៏បានបង្ហាញចំណាប់អារម្មណ៍ផងដែរថា ថ្ងៃនេះជាថ្ងៃដ៏សែននក្ខត្តឬក្សថ្លៃថ្លា ដែលសមាគមអ្នកអភិវឌ្ឍន៍លំនៅឋានកម្ពុជា ទទួលបានកិត្តិយសដ៏ខ្ពង់ខ្ពស់បំផុត ដែលលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអនុញ្ញាតឲ្យរូបលោកក្នុងនាមប្រធានសមាគម បានដឹកនាំសមាជិក-សមាជិកា ចូលជួបសម្តែងការគួរសម និងប្រគល់ថវិកាបរិច្ចាគជូនមូលនិធិគន្ធបុប្ផាកម្ពុជា ក្រោមយុទ្ធនាការ «១ម៉ឺនរៀល ១ម៉ឺននាក់» តាមរយៈលោកជំទាវបណ្ឌិតប្រធានកិត្តិយស ដោយផ្ទាល់។

ក្នុងនោះសមាគមបាននាំយកថវិកាចំនួន ៤៣៤លានរៀល ប្រគល់ជូនមូលនិធិគន្ធបុប្ផាកម្ពុជា ហើយថវិកាទាំងនេះ គឺទទួលបានពីការចូលរួមបរិច្ចាគពីសប្បុរសធម៌ ដែលជាសមាជិក នៃសមាគមអ្នកអភិវឌ្ឍន៍លំនៅឋានកម្ពុជា។ នៅឆ្នាំ២០២៤កន្លងមក សមាគមបានចូលរួមបរិច្ចាគជូនមូលនិធិគន្ធបុប្ផាកម្ពុជា ថវិកាសរុបចំនួន ៥៩,៩៩៩ដុល្លារអាមេរិក។

លោកអ្នកឧកញ៉ា លី ហួរ បានគោរពថ្លែងអំណរគុណយ៉ាងជ្រាលជ្រៅជូនលោកជំទាវបណ្ឌិត ដែលបានផ្តល់កិត្តិយសក្នុងថ្ងៃនេះ ។ក្នុងនាមប្រធានសមាគម និងតំណាងឲ្យសមាជិក-សមាជិកានៃសមាគម សូមគាំទ្រយ៉ាងពេញទំហឹងនូវការផ្តួចផ្តើមដ៏ខ្ពង់ខ្ពស់ក្នុងការបង្កើតយុទ្ធនាការ «១ម៉ឺនរៀល ១ម៉ឺននាក់» របស់មូលនិធិគន្ធបុប្ផាកម្ពុជា ដែលជាយុទ្ធនាការដ៏មានតម្លៃក្នុងការកៀរគរថវិកាបរិច្ចាគប្រចាំឆ្នាំមួយដ៏ធំ។

ឆ្លៀតក្នុងឱកាសនោះ លោកអ្នកឧកញ៉ា លី ហួរ សូមសម្តែងនូវការគោរពដឹងគុណយ៉ាងជ្រាលជ្រៅបំផុតជូន សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាស្ថាបនិក ចំពោះគំនិតផ្ដួចផ្ដើមដ៏ខ្ពង់ខ្ពស់ថ្លៃថ្លា ក្នុងការបង្កើត និងការសម្ពោធដាក់ឱ្យដំណើរការជាផ្លូវការ មូលនិធិគន្ធបុប្ផាកម្ពុជា និង សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដែលបានផ្តល់កិត្តិយសដ៏ឧត្តុង្គឧត្តម ធ្វើជាប្រធានកិត្តិយសនៃមូលនិធិគន្ធបុប្ផាកម្ពុជា ក្នុងបុព្វហេតុសង្គ្រោះជីវិតទារក និងកុមារ ព្រមទាំងស្រ្តីមានផ្ទៃពោះ។

ជាមួយគ្នានោះលោកជំទាវបណ្ឌិត ពេជ ចន្ទ មុន្នី ហ៊ុន ម៉ាណែត ក៏បានមានមតិសំណេះសំណាល និងថ្លែងអំណរគុណយ៉ាងជ្រៅចំពោះលោកអ្នកឧកញ៉ា លី ហួរ និងថ្នាក់ដឹកនាំ សមាជិក-សមាជិកា សមាគមអ្នកអភិវឌ្ឍន៍លំនៅឋានកម្ពុជាទាំងអស់ ដែលតែងតែចូលរួមយ៉ាងសកម្មក្នុងការងារមនុស្សធម៌។

ជាក់ស្ដែងនៅថ្ងៃនេះ លោកអ្នកឧកញ៉ា បាននាំថវិកាបរិច្ចាគចំនួន ថវិកាចំនួន ៤៣៤លានរៀល ស្មើនឹងជាង១០ម៉ឺនដុល្លារអាមេរិកជូនដល់មូលនិធិគន្ធបុប្ផាកម្ពុជា ដែលនេះជាការចូលរួមមួយដ៏សំខាន់បំផុត ក្នុងការចូលរួមជួយសង្គ្រោះជីវិតកុមារ ក៏ដូចជាក្តីសង្ឃឹមដល់កុមារកម្ពុជាយើង៕