(ព្រះវិហារ)៖ អ្នកឧកញ៉ា ឡេង ណាវ៉ាត្រា ប្រធានសហព័ន្ធយុវជនបូជាការពារយុត្តិធម៌ បាននិងកំពុងបន្តដឹកនាំក្រុមការងាររៀបចំផ្គត់ផ្គង់ ម្ហូបអាហារជូនប្រជាពលរដ្ឋភៀសសឹកចំនួន ៤,៥០៩គ្រួសារ ស្មើ ១៤,៨១៩នាក់ ក្នុងខេត្តព្រះវិហារ ចំនួន ៦គោលដៅ នៅថ្ងៃទី២៨ ខែសីហា ឆ្នាំ២០២៥នេះ។

នៅលើបណ្ដាញសង្គមហ្វេសប៊ុក របស់សហព័ន្ធយុវជនបូជាការពារយុត្តិធម៌ បានឲ្យដឹងថា ការចុះរៀបចំផ្គត់ផ្គង់ម្ហូបអាហារជូនប្រជាពលរដ្ឋភៀសសឹក របស់ក្រុមការងារសហព័ន្ធយុវជនបូជាការពារយុត្តិធម៌ ដឹកនាំដោយអ្នកឧកញ៉ា ឡេង ណាវ៉ាត្រា ធ្វើឡើងក្រោមកិច្ចសហការជាមួយលោកកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ និងលោក គីម រិទ្ធី អភិបាលខេត្តព្រះវិហារ។

សូមបញ្ជាក់ថា អ្នកឧកញ៉ា ឡេង ណាវ៉ាត្រា បានដឹកនាំក្រុមការងារចុះមកផ្ទាល់រៀបចំ ចំអិនម្ហូបផ្គត់ផ្គង់ជូនដល់ជនភៀសសឹក ធ្វើឡើងចាប់តាំងពីថ្ងៃទី២៤ ខែកក្កដា ដែលទាហានថៃចូលឈ្លានពានកម្ពុជាមក ហើយមានប្រជាពលរដ្ឋបានជម្លៀសមកកាន់ទីសុវត្ថិភាព។ អ្នកឧកញ៉ាបានផ្គត់ផ្គង់ម្ហូបអាហារ ជូនដល់ប្រជាពលរដ្ឋភៀសសឹកនៅក្នុងខេត្តឧត្តរមានជ័យ និងខេត្តព្រះវិហារ។

ក្រោយមានបទឈប់បាញ់រវាងកម្ពុជា-ថៃក៏ដោយ ក៏ក្រុមការងារសហព័ន្ធយុវជនបូជាការពារយុត្តិធម៌ បាននឹងកំពុងបន្តផ្គត់ផ្គង់ម្ហូបជូនប្រជាពលរដ្ឋភៀសសឹកចំនួន ៦គោលដៅក្នុងខេត្តព្រះវិហារ ដោយរង់ចាំពេលវេលា ដែលរាជរដ្ឋាភិបាលអនុញ្ញាតឲ្យត្រឡប់ទៅកាន់លំនៅឋានវិញ នាពេលដ៏ឆាប់ខាងមុខនេះ៕