(បាងកក)៖ ទឹកជំនន់ភ្លាមៗបានវាយប្រហារយ៉ាងធ្ងន់ធ្ងរទៅលើខេត្តមួយចំនួនរបស់ប្រទេសថៃ ដោយបានប៉ះពាល់ដល់ស្រុក-ឃុំ និងភូមិប្រជាជនយ៉ាងច្រើន។ នេះបើយោងតាមសេចក្តីរាយការណ៍របស់សារព័ត៌មាន ក្នុងស្រុកថៃ។
គ្រោះធម្មជាតិនេះ ក៏បានបណ្តាលឱ្យមនុស្សមួយចំនួនស្លាប់ និងកំពុងបាត់ខ្លួន ព្រមទាំងបានបំផ្លាញផ្លូវជាតិលេខយ៉ាងធ្ងន់ធ្ងរ ដែលបានកាត់ផ្តាច់ស្រុកជាច្រើនពីការធ្វើដំណើរ។ យោងតាមរបាយការណ៍ចំណុចដែលរងការខូចខាតធ្ងន់ធ្ងរបំផុត គឺស្ពាន Huai Pong នៅលើផ្លូវជាតិលេខ ១០៨ ដែលបានបាក់ស្រុតប្រវែងជាង១០០ម៉ែត្រ។

ស្របពេលទឹកជំនន់បន្តវាយប្រហារធ្ងន់ធ្ងរ នៅថ្ងៃទី២៩ ខែសីហា ឆ្នាំ២០២៥នេះ លោកស្រី Paetongtarn Shinawatra ដែលជាកូនស្រីរបស់អតីតនាយករដ្ឋមន្រ្តីថៃ លោក Thaksin Shinawatra ត្រូវបានដកហូតតំណែងនាយករដ្ឋមន្រ្តីជាផ្លូវការ ដោយតុលាការធម្មនុញ្ញនៃប្រទេសថៃ សម្រាប់ការរំលោភបំពានក្រមសីលធម៌នៃរដ្ឋធម្មនុញ្ញ បន្ទាប់ពីលោកស្រីឡើងកាន់អំណាចបានត្រឹម១ឆ្នាំ៕