(ភ្នំពេញ)៖ ដោយមានការអនុញ្ញាតដ៏ខ្ពង់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នៅថ្ងៃទី២៨ ខែសីហា ឆ្នាំ២០២៥ លោកបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស និងជាសមាជិកឧត្តមក្រុមប្រឹក្សាជាន់ខ្ពស់ នៃអង្គការសម្ព័ន្ធពិភពឥស្លាម បានអញ្ជើញចូលរួមកិច្ចប្រជុំកំពូលអន្តរជាតិលើកទី២ នៃមេដឹកនាំសាសនា ឆ្នាំ២០២៥ នៅទីក្រុងគូឡាឡាំពួ ប្រទេសម៉ាឡេស៊ី។

កិច្ចប្រជុំកំពូលអន្តរជាតិលើកទី២ នៃមេដឹកនាំសាសនា ឆ្នាំ២០២៥ រៀបចំដោយរាជរដ្ឋាភិបាលម៉ាឡេស៊ី សហការជាមួយអង្គការសម្ព័ន្ធពិភពឥស្លាម (MWL) នៃប្រទេសអារ៉ាប៊ីសាអូឌីត ដែលពិធីបើកប្រារព្ធឡើង ក្រោមអធិបតីភាពលោក Dato Seri Anwar Ibrahim នាយករដ្ឋមន្ត្រីម៉ាឡេស៊ី និងលោកបណ្ឌិត Muhammad Bin Abdulkarim Al-Issa អគ្គលេខាធិការអង្គការសម្ព័ន្ធពិភពឥស្លាម ព្រមទាំងមានអ្នកដឹកនាំសាសនាចម្រុះ ចូលរួម៤០០នាក់ មកពី៤៥ប្រទេស និងមានវាគ្មិន៣០នាក់។

ក្នុងកិច្ចប្រជុំកំពូលនេះ លោក Dato Seri Anwar Ibrahim បានមានប្រសាសន៍ថ្លែង ពីសារៈសំខាន់នៃអ្នកប្រាជ្ញ អ្នកតំណាងសាសនា និងឥស្សរជន ដែលបានចូលរួម គឺមិនមែនគ្រាន់តែ ដើម្បីស្វែងយល់ស៊ីជម្រៅពីបញ្ហាច្បាប់នៅក្នុងសាសនារបស់ពួកគេនីមួយៗនោះទេ ប៉ុន្តែក៏ដើម្បីយល់ដឹងពីផលប្រយោជន៍រួម ដើម្បីមានភាពម៉ឺងម៉ាត់ក្នុងការអំពាវនាវយុត្តិធម៌ គុណតម្លៃ និងមនុស្សធម៌ ក្នុងការដោះស្រាយបញ្ហាប្រឈម នានាលើពិភពលោកនាពេលសព្វថ្ងៃនេះ។

ក្នុងឱកាសនោះ នាយករដ្ឋមន្ត្រីម៉ាឡេស៊ី បានបញ្ជាក់ថា ម៉ាឡេស៊ីប្តេជ្ញាចិត្ត ក្នុងការលើកស្ទួយការអត់ឱន និងការគោរពគ្នារវាងសាសនា ខណៈពេលដែលពិភពលោកកំពុងប្រឈមមុខនឹងភាពតានតឹងកាន់តែខ្លាំងឡើង។ នាយករដ្ឋមន្ត្រី ក៏បានអំពាវនាវដល់មេដឹកនាំសាសនាទាំងអស់ ត្រូវចូលរួមសហការគ្នា ដើម្បីទប់ស្កាត់ការរីករាលដាល នៃមនោគមវិជ្ជាជ្រុលនិយម និងការស្អប់ខ្ពើមដែលកើតចេញពីការបកស្រាយខុសពីគោលការណ៍សាសនា។

ក្នុងនាមប្រធានអាស៊ានប្តូរវេន នាយករដ្ឋមន្ត្រីម៉ាឡេស៉ី បានលើកឡើងពីកិច្ចព្រមព្រៀងឈប់បាញ់រវាងកម្ពុជា-ថៃ ហើយបានស្នើឲ្យនាយករដ្ឋមន្ត្រីទាំង២ អនុវត្តឲ្យបាននូវបទឈប់បាញ់ និងបន្តចរចាសម្របសម្រួល ឈានទៅរកភាពប្រក្រតីឡើងវិញឆាប់ៗនាពេលខាងមុខ ដើម្បីកុំឲ្យបាត់បង់អាយុជីវិតទាំងកងទ័ព និងប្រជាជនទាំងសងខាង ខូចខាតទ្រព្យសម្បត្តិ និងសេដ្ឋកិច្ច។

លោកបណ្ឌិតទេសរដ្ឋមន្ត្រី អូស្មាន ហាស្សាន់ បានលើកឡើងស្តីអំពី «តួនាទីមេដឹកនាំសាសនាក្នុងការប្រយុទ្ធប្រឆាំងអំពើហិង្សា និងជម្លោះ» ដោយលើកឡើងថា មេដឹកនាំសាសនា គឺជាអ្នកបំផុសកម្លាំងចិត្ត និងជាអ្នកណែនាំមនុស្សឲ្យរស់នៅជាមួយគ្នាប្រកបដោយការគោរពគ្នាទៅវិញទៅមក។ ពួកគេមានសមត្ថភាពក្នុងការផ្សព្វផ្សាយសន្តិភាព និងជំរុញឱ្យមានការអត់ធ្មត់ និងការផ្លាស់ប្ដូរដោយសន្តិវិធី ពេលសង្គមមានជម្លោះ។

លោកបណ្ឌិតទេសរដ្ឋមន្ត្រី បានថ្លែងបន្តថា ប្រទេសកម្ពុជា មានប្រជាជនជាង ៩៣% កាន់សាសនាព្រះពុទ្ធ និង ៥% កាន់សាសនាឥស្លាម មិនធ្លាប់មានជម្លោះសាសនាឡើយ ក្នុងរយៈពេលរាប់រយឆ្នាំមកហើយ។ នេះដោយសារតែការយកចិត្តទុកដាក់ពីរាជរដ្ឋាភិបាល ក្រោមការដឹកនាំរបស់សម្ដេចតេជោ ហ៊ុន សែន អតីតនាយករដ្ឋមន្ត្រី ប្រធានព្រឹទ្ធសភា និងបន្តមកសម្ដេចធិបតី ហ៊ុន ម៉ាណែត បានធ្វើឲ្យកម្ពុជា មានសុខដុមនីយកម្មជាតិសាសន៍ និងសាសនា ប្រជាជនទូទៅ រស់នៅជាមួយគ្នាប្រកបដោយសុខដុមរមនា។

ក្នុងឱកាសនោះ លោកទេសរដ្ឋមន្ត្រី ក៏បានថ្លែងអំណរអរគុណដល់លោក Dato Seri Anwar Ibrahim នាយករដ្ឋមន្ត្រីម៉ាឡេស៊ី ដែលបានដើរតួនាទីយ៉ាងសំខាន់ក្នុងការដឹកនាំ និងសម្របសម្រួលយ៉ាងជោគជ័យ នូវកិច្ចព្រមព្រៀងបទឈប់បាញ់ រវាងកម្ពុជា- ថៃ កាលពីថ្ងៃទី២៨ ខែកក្កដា កន្លងទៅ។

នៅក្នុងកិច្ចប្រជុំកំពូលនេះ អ្នកថ្លែងសុន្ទរកថាដែលតំណាងឲ្យសហគមន៍ឥស្លាម គ្រិស្តសាសនា ហិណ្ឌូ និងព្រះពុទ្ធសាសនា បានពិភាក្សាអំពីតួនាទីរបស់ថ្នាក់ដឹកនាំសាសនា ក្នុងការក្រោកឈរប្រឆាំងអំពើហិង្សា និងជម្លោះ និងទំនាក់ទំនងការទូតតាមបែបសាសនា៕