(ព្រះសីហនុ)៖ លោក ម៉ាង ស៊ីណេត អភិបាលខេត្តព្រះសីហនុ និងលោកស្រី ប្រ៊ីដហ្គេត អ៉ិល វ៉កឃើ (Bridgette L Walker) ភារធារីស្តីទី នៃស្ថានទូតសហរដ្ឋអាមេរិកប្រចាំកម្ពុជា និងសហការី បានអញ្ជើញចូលរួមដាំកូនឈើរំលឹកដល់វិថីប្រធានាតី ចន អេហ្វ ខិនណេឌី ដែលបានសម្ពោធជាផ្លូវការកាលពីឆ្នាំ១៩៦៧ និងរំលឹកខួបលើកទី៧៥ នៃទំនាក់ទំនងការទូតរវាងកម្ពុជា និងសហរដ្ឋអាមេរិក។ ពិធីនេះបានធ្វើឡើងនៅព្រឹកថ្ងៃទី២៩ ខែសីហា ឆ្នាំ២០២៥ នៅឆ្នេរអូរឈើទាល២ ស្ថិតក្នុងសង្កាត់លេខ៤ ក្រុងព្រះសីហនុ។

ក្នុងឱកាសនោះ លោក ម៉ាង ស៊ីណេត បានថ្លែងថា ការដាំកូនឈើនាពេលនេះ ជានិមិត្តរូបបង្ហាញពីទំនាក់ទំនង កិច្ចសហប្រតិបត្តិការរវាងកម្ពុជា និងសហរដ្ឋអាមេរិក កាន់តែល្អប្រសើរ និងរឹងមាំពីមួយថ្ងៃ ទៅមួយថ្ងៃ ដើម្បីផលប្រយោជន៍ជាតិមាតុភូមិ និងប្រជាពលរដ្ឋនៃប្រទេសទាំងពីរ រួមទាំងទំនាក់ទំនងការទូតរវាងសហរដ្ឋអាមេរិក និងកម្ពុជាមានតាំងពីឆ្នាំ១៩៥០។ បើគិតមកដល់ឆ្នាំ២០២៥នេះ មានរយៈពេល៧៥ឆ្នាំ ជាពិសេសសកម្មភាពរបស់ស្ថានទូតសហរដ្ឋអាមេរិកនៅខេត្តព្រះសីហនុ ដែលដឹកនាំដោយលោកស្រី (Bridgette L Walker) ភារធារីស្តីទី ដែលបានជ្រើសរើសយកខេត្តព្រះសីហនុ ជាទីតាំងរៀបចំកម្មវិធីសប្តាហ៍ស្ថានទូតសហរដ្ឋអាមេរិក។

អភិបាលខេត្តព្រះសីហនុ និងលោកស្រី ប្រ៊ីដហ្គេត អ៉ិល វ៉កឃើ ក៏មានសកម្មភាពជាច្រើនមានដូចជា ការចុះចែកអំណោយដល់សិស្សានុសិស្សនៅសាលាបឋមសិក្សានៅភូមិព្រែកស្វាយ ឃុំតានៃស្រុកព្រៃនប់, ការចូលរួមផ្សព្វផ្សាយដល់យុវជនជាសិស្ស និស្សិត សម្រាប់អាហារូបករណ៍នៅសហរដ្ឋអាមេរិក, ជំនួបទ្វេភាគីជាមួយរដ្ឋបាលខេត្តព្រះសីហនុ, ពីធីបើកស្លាកសញ្ញាអបអរសាទរខួបលើកទី៧៥ នៅបណ្តោយផ្លូវជាតិលេខ៤ ស្ថិតនៅភូមិ១ សង្កាត់ លេខ១ ក្រុងព្រះសីហនុ, ពិសារអាហារសាមគ្គី ហើយពិធីដាំដើមឈើនាព្រឹកនេះ នៅឆ្នេរអូរឈើទាល២ រួមទាំងកម្មវិធីសុខាភិបាល ផ្នែកជំងឺអេដស៍ និងផ្សព្វផ្សាយវីដេអូឯកសារពាក់ព័ន្ធនឹងការស៊ើបអង្កេត នៃការលួចវត្ថុបុរាណដែលជាបិតិកភ័ណ្ឌរបស់កម្ពុជាដែលបានបាត់បង់នៅពេលប្រទេសកម្ពុជាមានសង្គ្រាម។

លោកស្រី ប្រ៊ីដហ្គេត អ៉ិល វ៉កឃើ (Bridgette L Walker) ភារធារីស្តីទី នៃស្ថានទូតសហរដ្ឋអាមេរិក បានថ្លែងអំណគុណរដ្ឋបាលខេត្តព្រះសីហនុ ក៏ដូចប្រជាពលរដ្ឋខេត្តព្រះសីហនុ បានចូលរួមសហការធ្វើឲ្យកម្មវីធី «សប្តាហ៍ស្តានទូតសហរដ្ឋអាមេរិកនៅខេត្តព្រះសីហនុ ឆ្នាំ២០២៥ ដែលជាខួបលើកទី៧៥ នៃភាពជាដៃគូ និងមិត្តភាព» គឺចាប់ពីថ្ងៃទី២៦ ដល់ថ្ងៃទី៣០ ខែសីហា ឆ្នាំ២០២៥ បានប្រព្រឹត្តទៅប្រកបដោយលទ្ធផលល្អ តាមរយ:សកម្មភាពជាច្រើន ដែលបានដំណើរការដោយរលូនតាមការគ្រោងទុក៕