(តាកែវ)៖ នៅក្នុងឱកាសអញ្ជើញចូលរួមកាន់បិណ្ឌវេនទី១ និងឧទ្ទិសកុសលដល់វិញ្ញាណក្ខន្ធវីរកងទ័ព ដែលពលីជីវិតនៅសមរភូមិមុខ នៅវត្តអង្គក្រឡាញ់សែនជ័យ ស្ថិតក្នុងឃុំគោកពោធិ៍ ស្រុកបូរីជលសារ ខេត្តតាកែវ នៅថ្ងៃទី៨ ខែកញ្ញា ឆ្នាំ២០២៥ លោកបណ្ឌិត ស៊ូ ភិរិន្ទ អ្នកតំណាងរាស្រ្តមណ្ឌលតាកែវ និងប្រធានក្រុមការងារចុះមូលដ្ឋានស្រុកបូរីជលសារ បានអំពាវនាវមន្រ្តីរាជការ បងប្អូនជាពលរដ្ឋក្នុងខេត្តតាកែវសូមកុំមានការព្រួយបារម្ភ និងមានជំនឿជឿជាក់លើរដ្ឋាភិបាល ក្នុងការដោះស្រាយបញ្ហាព្រំដែនជាមួយប្រទេសថៃ។

លោកបណ្ឌិត ស៊ូ ភិរិន្ទ បានថ្លែងថា បញ្ហាព្រំដែនជាមួយប្រទេសថៃនេះមិនមែនជារឿងថ្មីនោះទេ ពោលវាបានកើតឡើងរាប់រយឆ្នាំមកហើយ។ រដ្ឋាភិបាលបានសម្រេចលើកយកតំបន់ប្រាសាទតាមាន់ធំ ប្រាសាទតាមាន់តូច តាក្របី និងតំបន់បុំមី ទៅកាន់តុលាការយុត្តិធម៌អន្តរជាតិ ICJ ដោះស្រាយ និងរកយុត្តិធម៌ជូនប្រទេសជាតិ និងប្រជាជនកម្ពុជា។

អ្នកតំណាងរាស្រ្តបន្តថា ប្រជាពលរដ្ឋក្នុងខេត្តតាកែវទាំងអស់ ត្រូវរួមសាមគ្គីគ្នាជាមួយរាជរដ្ឋាភិបាល ផ្សារភ្ជាប់ និងផ្ដល់ការគាំទ្រដល់កងកម្លាំងប្រដាប់អាវុធ ដើម្បីពង្រឹងខឿនការពារជាតិឱ្យកាន់តែរឹងមាំ ពិសេសវីរកងទ័ពរបស់យើង ដែលកំពុងការពារបូរណភាពទឹកដីនៅតាមខ្សែបន្ទាត់ព្រំដែន ប្រកបដោយជំហរលះបង់ និងការប្ដេជ្ញាចិត្តយ៉ាងមោះមុតបំផុតជូនជាតិមាតុភូមិ។

ឆ្លៀតក្នុងឱកាសនោះ លោកបណ្ឌិត ស៊ូ ភិរិន្ទ បានជំរុញអាជ្ញាធរស្រុកបូរីជលសារ ត្រូវបន្តកិច្ចខិតខំប្រឹងប្រែង អភិវឌ្ឍមូលដ្ឋានឲ្យបានខ្លាំងក្លាបន្ថែមទៀត ពិសេសត្រូវពង្រឹងគោលនយោបាយភូមិ ឃុំ សង្កាត់ មានសុវត្ថិភាព ឲ្យបានល្អប្រសើរ ដើម្បីធានាបាននូវភាពរស់នៅសុខសាន្តជូនប្រជាពលរដ្ឋក្នុងមូលដ្ឋាន ក្រោមដំបូលនៃសុខសន្តិភាព៕