(ព្រះវិហារ)៖ លោកស្រី សាន់ដ្រា ប៊ឺនក្លាវ (Ms. Sandra Bernklau) តំណាងមូលនិធិអង្គការសហប្រជាជាតិ សម្រាប់ប្រជាជន (UNFPA) ប្រចាំនៅកម្ពុជា អមដំណេីរដោយ លោកស្រី មុំ នាយិការង នៃនាយកដ្ឋានសុខភាព កាកបាទក្រហមកម្ពុជា បានអញ្ជើញចុះសួរសុខទុក្ខ សំណេះសំណាល និងនាំយកអំណោយ ជាឃីតអនាម័យស្ត្រី ចំនួន ៤៥០ឃីត ចែកជូនប្រជាពលរដ្ឋជាស្រ្តីដែលមានផ្ទៃពោះ និងមានកូនតូច ព្រមទាំងបានចុះជួបស្ត្រីនៅតាមសហគមន៍ដែលរងផលប៉ះពាល់ក្នុងស្រុកជាំក្សាន្ត កំពុងស្នាក់នៅក្នុងមណ្ឌលសុវត្ថិភាពវត្តពោធិ៍ ៥០០០ដេីម ស្ថិតក្នុងស្រុកគូលែន ខេត្តព្រះវិហារ។

ពិធីនេះត្រូវបានទទួលស្វាគមន៍យ៉ាងកក់ក្តៅពីលោក សុខ សាន្តតារា អភិបាលរងខេត្តព្រះវិហារ តំណាងលោក គីម រិទ្ធី អភិបាលខេត្ត ដោយមានការចូលរួមពីថ្នាក់ដឹកនាំសាខាកាកបាទក្រហមកម្ពុជាខេត្ត និងអាជ្ញាធរមូលដ្ឋាន ព្រមទាំងប្រជាពលរដ្ឋភៀសសឹកជាច្រើនរូបទៀត នៅថ្ងៃទី០៨ ខែកញ្ញា ឆ្នាំ២០២៥។

ក្នុងនាមលោក គីម រិទ្ធី អភិបាលខេត្តព្រះវិហារ លោក សុខ សាន្តតារ៉ា បានសម្ដែងនូវសេចក្តីសោមនស្សរីករាយជាអនេកប្បការ និងសូមគោរពថ្លែងអំណរគុណយ៉ាងជ្រាលជ្រៅបំផុតចំពោះវត្តមានលោកស្រី និងក្រុមការងារ ដែលបានចំណាយពេលវេលាដ៏មានតម្លៃចុះសួរសុខទុក្ខ និងនាំយកអំណោយ ជូនបងប្អូនប្រជាពលរដ្ឋភៀសសឹក ព្រមទាំងបានបរិច្ចាគថវិកាផ្ទាល់ខ្លួន ក្នុងបុព្វហេតុជាតិមាតុភូមិ និងប្រជាជននាឱកាសនេះ។

លោកអភិបាលរងខេត្តព្រះវិហារ បានថ្លែងជម្រាបជូនលោកស្រី តំណាងមូលនិធិអង្គការសហប្រជាជាតិសម្រាប់ប្រជាជន (UNFPA) ប្រចាំនៅកម្ពុជា អំពីស្ថានភាពប្រជាពលរដ្ឋភៀសសឹកដែលកំពុងស្នាក់នៅបណ្តោះអាសន្ននៅមណ្ឌលសុវត្ថិភាពវត្តពោធិ៥០០០ដើម ក៏ដូចជាតាមមណ្ឌលសុវត្ថិភាពផ្សេងៗទៀតក្នុងខេត្តព្រះវិហារ ចាប់តាំងពីព្រឹត្តិការណ៍ផ្ទុះអាវុធនៅតាមព្រំដែនដែលបង្ករឡើងដោយកងទ័ពថៃ ក៏ដូចជាការគ្រប់គ្រង ការរៀបចំមើលថែ ការឧបត្ថម្ភផ្សេងៗដល់ប្រជាពលរដ្ឋភៀសសឹក។

លោកស្រី សាន់ដ្រា ប៊ឺនក្លាវ (Ms. Sandra Bernklau តំណាងមូលនិធិអង្គការសហប្រជាជាតិសម្រាប់ប្រជាជន (UNFPA) ប្រចាំនៅកម្ពុជា បានថ្លែងកោតសរសើរដល់ថ្នាក់ដឹកនាំ និងមន្ត្រីពាក់ព័ន្ធក្នុងខេត្តព្រះវិហារ ដែលបានយកចិត្តទុកដាក់ជួយរៀបចំកន្លែងស្នាក់នៅ ផ្តល់សម្ភារ ម្ហូបអាហារ ដល់ប្រជាពលរដ្ឋភៀសសឹក។លោកថ្លែងបញ្ជាក់ទៀតថា ថ្ងៃនេះលោកស្រីនាំអំណោយ ជាឃីតអនាម័យស្ត្រី ចំនួន ៤៥០ឃីត ចែកជូនប្រជាពលរដ្ឋជាស្រ្តីដែលមានផ្ទៃពោះ និងមានកូនតូច ជាមួយនឹងការអំបាវនាវឱ្យយកចិត្តទុកដាក់ថែរក្សាសុខភាព អនាម័យឱ្យបានល្អ៕