(ភ្នំពេញ)៖ លោកស្រី ម៉ឺន ពេជ្រសុវណ្ណដារ៉ា កម្មការិនីក្នុងរោងចក្រស្បែកជើង លីន វេន ជី សាន់បូ អេនធើប្រាយ LIN WEN CHIH SUNBOW ENTERPRISES CO., LTD. បានអំពាវនាវដល់ពលករខ្មែរកំពុងធ្វើការនៅថៃ ដែលមានអារម្មណ៍មិនសូវមានសុវត្ថិភាព វិលត្រឡប់មកធ្វើការនៅមាតុភូមិវិញ ព្រោះជាបទពិសោធន៍របស់លោកស្រី នៅស្រុកយើងធ្វើការដោយកក់ក្តៅ នៅជិតផ្ទះ ទំនិញធូរថ្លៃ និងមានអាហារទទួលទានច្រើនយ៉ាង។

លោកស្រី បានថ្លែងបែបនេះក្នុងឱកាស អ្នកឧកញ៉ា លី ឃុនថៃ ប្រធានសមាគមស្បែកជើងកម្ពុជា និងជាទីប្រឹក្សាសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ចុះចុះសួរសុខទុក្ខ ពលករខ្មែរមកពីថៃជាង ៥០០នាក់ ដែលទទួលបានការងារធ្វើ ក្នុងរោងចក្រផលិតស្បែកជើង។

តំណាងពលករខ្មែរដែលវិលត្រឡប់មកពីថៃ និងធ្វើការបានជិត ១ខែហើយនោះ បានបញ្ជាក់យ៉ាងដូច្នេះ «ខ្ញុំប្តេជ្ញាចិត្តថា អត់ទៅវិញទេ ព្រោះខ្ញុំធ្វើការនៅស្រុកខ្មែរកក់ក្តៅ ណាមួយនៅជិតផ្ទះផង ហើយរបស់របរក៏ថោកទៀត ហើយសម្បូរអីញ៉ាំណាស់។ ខ្ញុំអំពាវនាវឲ្យបងប្អូននៅស្រុកថៃ មកប្រទេសយើងវិញមក កុំនៅប្រទេសគេ ឲ្យមករីកចម្រើនប្រទេសយើង កុំនៅរីកចម្រើនប្រទេសគេ អត់មានបានប្រយោជន៍អីទេ»។

លោកស្រីក៏បានថ្លែងអំណរគុណដល់ រាជរដ្ឋាភិបាលដែលបានយកចិត្តទុកដាក់ ដោយផ្ដល់ការងារដល់រូបលោកស្រី។ លោកស្រី បានអំពាវនាវដល់បងប្អូនប្រជាពលរដ្ឋ ជាពិសេស បងប្អូនពលករខ្មែរនៅប្រទេសថៃ ឱ្យត្រឡប់មកស្រុកកំណើតវិញ ព្រោះបច្ចុប្បន្នកម្ពុជាសម្បូរការងារធ្វើ ទទួលបានចំណូលមិនចាញ់ការងារនៅប្រទេសថៃ មានអត្ថប្រយោជន៍ច្រើន និងនៅជិតផ្ទះស្រាប់ទៀតផង។

នាឱកាសនោះដែរ អ្នកឧកញ៉ា លី ឃុនថៃ ប្រធានសមាគមស្បែកជើងកម្ពុជា និងជាទីប្រឹក្សាសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា រោងចក្រស្បែកជើង ដែលជាសមាជិកសមាគមស្បែកជើងកម្ពុជា ត្រូវការកម្មករនិយោជិតរាប់ម៉ឺននាក់។

បើតាមអ្នកឧកញ៉ា លី ឃុនថៃ សម្រាប់ពលករដែលមិនទាន់មានការងារធ្វើ សូមទាក់ទងសមាគមស្បែកជើង (លេខទូរសព្ទ 098 329 222) និងក្រសួងការងារនិងបណ្តុះបណ្តាលវិជ្ជាជីវៈ (លេខទូរសព្ទ 1297)។

ក្នុងរយៈពេល ២ខែកន្លងមកនេះ ក្រសួងការងារ និងបណ្ដុះបណ្ដាលវិជ្ជាជីវៈ បានស្វែងរកឱកាសការងារជូនបងប្អូនអតីតពលករខ្មែរ ដែលទើបត្រឡប់មកពីប្រទេសថៃវិញ រាប់សែនកន្លែង។ ក្នុងនោះ មានអតីតពលករប្រមាណ ២១ម៉ឺននាក់ បានទទួលការងារធ្វើនៅតាមរោងចក្រ សហគ្រាស និងគ្រឹះស្ថាននានា ដែលស្ថិតនៅក្នុងប្រព័ន្ធ៕