(ព្រះសីហនុ)៖ ឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ នៅព្រឹកថ្ងៃទី១១ ខែកញ្ញា ឆ្នាំ២០២៥នេះ បានអញ្ជើញដឹកនាំមន្ត្រីក្រោមឱវាទ ចំណុះឲ្យស្នងការដ្ឋននជាច្រើនរូប ព្រមទាំងពុទ្ធបរិស័ទចំណុះជើងវត្ត ចូលរួមសូត្រមន្តប្រារព្ធពិធីបុណ្យកាន់បិណ្ឌវេណទី៤ នៅវត្តឥន្ទញាណ ហៅវត្តក្រោម ស្ថិតក្នុងសង្កាត់លេខ៣ ក្រុង-ខេត្តព្រះសីហនុ។

នាឱកាសវេនកាន់បិណ្ឌទី៤នេះ លោកឧត្តមសេនីយ៍ឯក ព្រមទាំងមន្ត្រីទាំងអស់ បានថ្វាយផ្កាភ្ញីដល់ព្រះរតនត្រ័យ សមាទានសីល និមន្ដព្រះសង្ឃចម្រើនព្រះបរិត្ត បង្សុកូល និងប្រគេនទេយ្យវត្ថុដល់ព្រះសង្ឃ ដើម្បីឧទ្ទិសមគ្គផលកុសលផលបុណ្យ ជូនដល់វិញ្ញាណក្ខន្ធបុព្វការីជន ញាតិកាទាំង៧សណ្តាន និងនាយ នាយរង ពលនគរបាល វីរកងទ័ព ដែលពលីជីវិតក្នុងបុព្វហេតុការពារបូរណភាពទឹកដី ដែលបានពលី និងចែកឋានទៅលោកខាងមុខ ក៏បានធ្វើ
ពិធីរាប់បាត្រ ជាកិច្ចបង្ហើយបុណ្យ។

ទេយ្យវត្ថុ និងបច្ច័យដែលជាសទ្ធាជ្រះថ្លា បានវេរប្រគេនដល់ព្រះសង្ឃ សម្រាប់ចាត់ចែងប្រើប្រាស់ក្នុងការកសាងសមិទ្ធផលនានានៅក្នុងវត្តឥន្ទញាណ ហៅវត្តក្រោមនាពេលនេះរួមមាន៖ មីមូឌែន ៥កេសធំ, ត្រីខកំប៉ុង ៥កេសធំ, ទឹកដោះគោកំប៉ុង ៥កេស, ទឹកស៊ីអីវ ៩កេស, ទឹកត្រី ៩កេស, ប្រេងឆា ៩កេស, ស្លាដក់ ៩ឈុត, ចានស្រាក់ និងចង្ហាន់ ៩ឈុត, អង្ករ ១៨បាវ, ទឹកក្រូច កូកា ១៨កេស, ទឹកបរិសុទ្ធ ហាយធិច ១៨កេស ស្ករស ១បាវ (៥០គីឡូក្រាម), តែស្វាធំ ១បាវ និងថវិការ សរុប ២៦.៩៤០.០០០ រៀល៕