(កំពង់ធំ)៖ នៅរសៀលថ្ងៃទី១៤ ខែកញ្ញា ឆ្នាំ២០២៥ លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ និងលោកស្រី លឹម អៀងចេង បានដឹកនាំថ្នាក់ដឹកនាំ និងមន្ត្រីនៃស្នងការដ្ឋាននគរបាលខេត្ត ចូលរួម ពិធីសូត្រមន្តកាន់បិណ្ឌទី៨ នៅវត្តទេពនិម្មិត ហៅ(វត្ត ធម្មយុត្តិ) ស្ថិតនៅក្នុងភូមិ កំពង់រទេះ សង្កាត់ កំពង់រទេះ ក្រុង ស្ទឹងសែន ខេត្តកំពង់ធំ ។

នាឱកាសនោះលោកឧត្តមសេនីយ៍ទោ ហេង សុផល និងលោកស្រី បានបូជាផ្កាភ្ញីទានធូបជូនចំពោព្រះរតនត្រ័យ និងសូត្រមន្ត សមាទានសីល ឧទិ្ទសមហាកុសល ផលបុណ្យ ជូនចំពោះដួងវិញ្ញាណក្ខន្ធ បុព្វការីជន ញាតិមិត្តទាំងប្រាំពីរសណ្ដាន និងដួងវិញ្ញាណក្ខន្ធបុព្វបុរសខ្មែរ វីរកងទ័ព ដែលបានពលីជីវិត ជូនជាតិមាតុភូមិ ក្នុងបុព្វហេតុការពារទឹកដី នៃព្រះរាជាណាចក្រកម្ពុជា ក្នុងអំឡុងជម្លោះព្រំដែនកម្ពុជា-ថៃ សូមបានសោយសុខនៅឋានបរមសុខ កុំបីឃ្លៀងឃ្លាតឡើយ ព្រមទាំងទទួលបាននូវមគ្គផលគ្រប់ៗគ្នា ។

ឧត្តមសេនីយ៍ទោស្នងការ និងលោកស្រី បានប្រគេនគ្រឿងឧបភោគបរិភោគ និងបច្ច័យមួយចំនួន ជូនចំពោះព្រះសង្ឃ ដើម្បីឧបត្ថម្ភគាំទ្រ វិស័យព្រះពុទ្ធសាសនា ព្រមទាំងចូលរួមកសាងសមិទ្ធផលនានា ក្នុងទីវត្តអារាមឱ្យមានភាពរីកចម្រើនបន្ថែមទៀត ។

ស្នងការបានបួងសួងដល់វត្ថុសក្តិសិទ្ធិ ក្នុងលោក សូមជួយតាមបីបាច់ ថែរក្សា ថ្នាក់ដឹកនាំ ពុក ម៉ែ បងប្អូនប្រជាពលរដ្ឋ ទូទាំងខេត្តកំពង់ធំ ក៏ដូចជាប្រជាពលរដ្ឋទូទាំងព្រះរាជាណាចក្រកម្ពុជា សូមទទួលបាន សេចក្តីសុខ សេចក្តីចម្រើន សម្បូរ សប្បាយ និងធ្វើដំណើរទៅទីជិតទីឆ្ងាយ ជួបប្រទះតែសុខសុវត្ថិភាពគ្រប់ៗគ្នា ៕