(កំពង់ធំ)៖ នៅរសៀលថ្ងៃទី១៤ ខែកញ្ញា ឆ្នាំ២០២៥ លោកបណ្ឌិត មាស ច័ន្ទរិទ្ធទីប្រឹក្សាសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានអញ្ជើញសូត្រមន្តកាន់បិណ្ឌវេនទី៧ នៅវត្តច័ន្ទមូលី ភូមិកំពង់ឈើទាល ឃុំតាំងក្រសៅ ស្រុកប្រាសាទសំបូរ ខេត្តកំពង់ធំ។

បណ្ឌិត មាស ច័ន្ទរិទ្ធ បានលើកឡើងថា ការចូលរួមកាន់បិណ្ឌគឺការថែរក្សានូវទំនៀមទំលាប់វប្បធម៌ប្រពៃណីព្រះពុទ្ធសាសនា ក៏ដូចជាផ្សារភ្ជាប់គ្នារវាងអាណាចក្រ និងពុទ្ធចក្រ ជាពិសេសគឺរវាងគណបក្សប្រជាជនកម្ពុជា និងប្រជាពលរដ្ឋនៅមូលដ្ឋាន ដើម្បីឧទ្ទិសកុសលដល់បងប្អូនសាច់សារលោហិត បុព្វបុរសខ្មែរ និងជាពិសេសគឺវីរៈកងទ័ពដែលបានពលីក្នុងការការពារទឹកដីពីចោរសៀមឈ្លានពានក្នុងឱកាសនេះដែរ ។

លោកបាននាំយកសម្ភារគ្រឿងបរិក្ខារ និងបច្ច័យមួយចំនួន ចូលរួមក្នុងបិណ្ឌវេនទី៧ ដោយបានរាប់បាត្រឧទ្ទិសកុសល ជូនដល់វីរៈយុទ្ធជនការពារព្រំដែន និងវរជនស្នេហាជាតិ ដែលបានពលីជីវិតក្នុងបុព្វហេតុការពារជាតិ។

សូមបញ្ជាក់ថា ពិធីកាន់បិណ្ឌមិនត្រឹមតែជាប្រពៃណីវប្បធម៌សាសនាប៉ុណ្ណោះទេ ប៉ុន្ដែជាឱកាសរួមគ្នារបស់ប្រជាពលរដ្ឋក្នុងសហគមន៍ដើម្បីចងក្រងសាមគ្គី និងអនុវត្តកិច្ចធម៌ ។ ហើយបងប្អូនប្រជាពលរដ្ឋក៏បានចូលរួមយ៉ាងសប្បាយរីករាយ បង្ហាញភាពស្នឹទ្ធស្នាល និងទំនាក់ទំនងល្អរវាងសហគមន៍ និងអាជ្ញាធរមូលដ្ឋាន៕