(បាត់ដំបង)៖ លោក ជុក គឹមហួរ ប្រធាន​ក្រុមការងាររាជរដ្ឋាភិបាលចុះជួយឃុំដូនបា និង​លោក បណ្ឌិត តាំង គង់ស្រេង ព្រមទាំង​អនុប្រធានក្រុមការងាររាជរដ្ឋាភិបាល និងប្រជាពលរដ្ឋ នៅថ្ងៃទី១៦ ខែកញ្ញា ឆ្នាំ២០២៥ បានអញ្ជើញកាន់បិណ្ឌវេនទី៩ នៅវត្តបុទុមគង្គាររតនារាម បុរាណស្នោ (ហៅវត្តអន្លង់មៀន) ស្រុកគាស់ក្រទ្ប ខេត្តបាត់ដំបង។

នៅក្នុងឱកាសនេះដែរ លោក ជុក គឹមហួរ និង​បលោក បណ្ឌិត តាំង គង់ស្រេង ព្រមទាំង​អនុប្រធានក្រុមការងាររាជរដ្ឋាភិបាល និងសហការី បានអញ្ជើញអុជទៀនធូប បូជាគន្ធពិដោរ និងថ្វាយបង្គំព្រះពុទ្ធបដិមា ព្រមទាំងព្រះសង្ឃ និងសមាទានសីល រម្លឹកដល់គុណព្រះរតនៈត្រៃយ៍តាមគន្លងប្រពៃណីព្រះពុទ្ធសាសនា និងបានរាប់បាត្រ ព្រមទាំងចង្ហាន់ និងបច្ច័យ វេប្រគេនព្រះសង្ឃ ឧទ្ទិសកុសលដល់បុព្វការីជនដែលបានចែកឋានទៅ ជាពិសេសគឺដល់វីរកងទ័ពការពារនៅតាមព្រំដែន ដែលបានពលីក្នុងបុព្វហេតុការពារទឹកដីព្រះរាជាណាចក្រកម្ពុជា។

សូមបញ្ជាក់ថា ពិធីបុណ្យកាន់បិណ្ឌ និងភ្ជុំបិណ្ឌក្នុងឆ្នាំនេះ ប្រព្រឹត្តទៅចាប់ពីថ្ងៃ១ រោច ដល់ថ្ងៃ១៥ រោច ខែភទ្របទ ត្រូវនឹងថ្ងៃទី៨ ខែកញ្ញា ដល់ថ្ងៃទី២៣ ខែកញ្ញា ឆ្នាំ២០២៥ ជាពេលវេលាមួយ ដែលបងប្អូនប្រជាពលរដ្ឋពុទ្ធបរិស័ទ មានឱកាសក្នុងការធ្វើបុណ្យទាន សន្សំកុសល និងជួបជុំសាច់ញាតិបងប្អូន នៅតាមទីវត្តអារាម ដើម្បីឧទ្ទិសកុសលផលបុណ្យ ជូនដល់បុព្វការីជនដែលបានចែកឋានរំលាយខន្ធហើយ បានទៅកាន់សុគតិភពកុំបីឃ្លៀងឃ្លាតឡើយ។

ប្រមូលបច្ច័យរួមគ្នាចំនួន ៣, ៣០០,០០០រៀល ជាមួយគ្នានោះដែរ លោកបណ្ឌិត តាំង គង់ស្រេង បានជូនថវិកាដល់លោកតាអាចារ្រ លោកយាយជី និងបង ប្អូនប្រជាពលរដ្ឋដែលបានមកចូលកាន់វេនទី៩ នៅវត្តអន្លង់មៀន ជាង២០០នាក់ ក្នុងម្នាក់ៗទទួលបានថវិកា ១០,០០០រៀល បន្ទាប់មកលោកបណ្ឌិតតាំង គង់ស្រេង បានប្រគល់រោងប្រជុំមួយខ្នងដែលទើបសាងសង់រួច ឱ្យទៅប្រធានគណបក្សឃុំ ដើម្បីទុក្ខជាទ្រព្យសម្បត្តិរបស់គណបក្សប្រជាជនកម្ពុជា ដែលចំណាយថវិកាទាំងការចាក់ដីលុបស្រះក្នុងបរិវេណគណបក្សប្រជាជនកម្ពុជា ឃុំដូនបា សរុបថវិកាចំនួន ២៦,៧៥០,០០០រៀល។

បន្ទាប់មកលោកបណ្ឌិតបានបន្តប្រគល់ថវិកាកសាងបន្ទប់ទឹកមួយទៀតនៅក្នុងគណបក្សឃុំចំនួនថវិកា ៨,០០០,០០០រៀល ព្រមទាំងផ្ដល់កាំមេរ៉ាសុវត្ថិភាពចំនួន ២គ្រឿង ដល់ប៉ុស្ដិ៍នគរបាលរដ្ឋបាល ឃុំដូនបា ចំណាយថវិកាចំនួន ១៥០ដុល្លារផងដែរ៕