(កំពង់ធំ)៖ លោកស្រី ឃួន ឃុនឌី សមាជិករដ្ឋសភា និងជាប្រធានក្រុមការងារគណបក្សចុះមូលដ្ឋានស្រុកកំពង់ស្វាយ និងលោកស្រី យស ថានារី សមាជិករដ្ឋសភា ថ្ងៃទី១៨ ខែកញ្ញា ឆ្នាំ២០២៥នេះ បានអញ្ជើញដាក់បិណ្ឌវេនទី១១ នៅវត្តសុវណ្ណជលសា ហៅវត្តកំពង់ចម្លង ឃុំផាត់សណ្ដាយស្រុកកំពង់ស្វាយ ខេត្តកំពង់ធំ ។

ក្នុងឱកាសនោះលោកស្រី ឃួន ឃុនឌី បាននាំនូវការផ្តាំផ្ញើសាកសួរសុខទុក្ខ និងជម្រាបពីការគិតគូរយកចិត្តទុកដាក់ខ្ពស់ ពីសំណាក់សម្ដេចតេជោ ហ៊ុន សែន និងសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជូនចំពោះបងប្អូនពុកម៉ែប្រជាពលរដ្ឋ ដែលកំពុងមានវត្តមាននៅទីនេះ។

លោកស្រីបានលើកឡើងថា សង្គ្រាមបានបង្កមហន្តរាយ បំផ្លិចបំផ្លាញទ្រព្យសម្បត្តិ និងសោកនាដកម្មផ្តាច់ជីវិតមនុស្សមិនរើសមុខ ទាំងទាហាន និងជនស៊ីវិលស្លូតត្រង់ ប្រជាពលរដ្ឋដែលរស់នៅតាមខ្សែបន្ទាត់ព្រំដែនក៏ត្រូវបង្ខំចិត្តភៀសខ្លួនចាកចេញពីផ្ទះសម្បែង ទ្រព្យសម្បត្តិ និងសត្វចិញ្ចឹម ដែលមិនអាចយកមកជាមួយបាន ទុក្ខលំបាកនេះបានធ្វើឱ្យយើងទាំងអស់គ្នា យល់យ៉ាងច្បាស់ណាស់ ពីតម្លៃនៃសន្តិភាព។

លោកស្រីបន្តថា យើងក៏ចង់បង្ហាញអន្តរជាតិឱ្យបានឃើញថា ប្រជាជនកម្ពុជាត្រូវការសុខសន្តិភាព ហើយក៏មិនចង់បានការឈ្លានពាន ឬជម្លោះណាមួយឡើយ។

ក្នុងនោះដែលោកស្រីបានលើកឡើងថា ក្នុងពិធីបុណ្យភ្ជុំបិណ្ឌកាន់បិណ្ឌនេះថ្នាក់ដឹកនាំព្រឹទ្ធសភា រដ្ឋសភា រាជរដ្ឋាភិបាល ប្រជាពលរដ្ឋបានធ្វើបុណ្យដើម្បីឧទ្ទិសកុសល ជូនដល់បុព្វការីជន ដែលបានលាចាកទៅកាន់លោកខាងមុខ ក៏ដូចជាវិញ្ញាណក្ខន្ធ វីរកងទ័ពដែលបានពលី ជីវិតដើម្បីការពារបូរណភាពដែនដី សូមមកទទួលយកកុសល ផលបុណ្យដែរការពារបូរណៈភាពទឹកដីពីសំណាក់ចោរសៀមឈ្លានពាន ។

ក្នុងពិធីកាន់បិណ្ឌវេនទី ១១ លោកស្រីបាននាំយកថវិកាសម្ភារប្រគេនដល់ព្រះសង្ឃ និងសម្រាប់កសាងពីវត្តអារាមផងដែរ៕